Mga Bilang 32

Ang mga Lahi sa Silangan ng Ilog Jordan

¹Napakaraming hayop ng mga lahi nina Ruben at Gad. Kaya nang makita nila na masagana ang lupain ng Jazer at Gilead para sa mga hayop

²nagpunta sila kina Moises at sa paring si Eleazar at sa mga pinuno ng mamamayan ng Israel at sinabi,

³“Ang mga lugar ng Atarot, Dibon, Jazer, Nimra, Hesbon, Eleale, Sebam, Nebo at Beon

⁴na sinakop ng Panginoon para sa mga Israelita ay mabuting lugar para sa mga hayop at kami na mga alagad ninyo ay napakaraming hayop.

⁵Kaya kung nalulugod kayo sa amin, ibigay ninyo ang mga lupaing ito sa amin, bilang bahagi namin at huwag na ninyo kaming dalhin sa kabila ng Ilog ng Jordan.”

⁶Sinabi ni Moises sa mga lahi nina Gad at Ruben, “Ano ang ibig ninyong sabihin, magpapaiwan na lang kayo dito habang ang mga kapwa ninyo Israelita ay sasabak sa labanan?

⁷Pahihinain lang ninyo ang loob ng mga Israelita na pumunta sa lupaing ibinigay ng Panginoon sa kanila.

⁸Ganito rin ang ginawa noon ng inyong mga ninuno nang ipinadala ko sila mula sa Kades-barnea para tingnan ang lupaing ito.

⁹Nang makarating sila sa Lambak ng Eshcol, at nakita nila ang lupain, pinahina nila ang loob ng mga Israelita na pumunta sa lupaing ibinigay ng Panginoon sa kanila.

¹⁰Matindi ang galit ng Panginoon nang araw na iyon at sumumpa siya:

¹¹‘Dahil sa hindi sila sumunod sa akin nang buong puso nila, wala ni isa man sa kanila na dalawampung taóng gulang pataas na nagmula sa Ehipto, ang makakakita ng lupaing ipinangako ko kay Abraham, Isaac, at Jacob,

¹²maliban lang kay Caleb na anak ni Jefune na Kenizeo at kay Josue na anak ni Nun, dahil sumunod sila sa Panginoon nang buong puso nila.’

¹³Nagalit nang matindi ang Panginoon sa mga Israelita, kaya pinaikot-ikot niya sila sa ilang sa loob ng apatnapung taon hanggang sa nangamatay ang buong henerasyon na gumawa ng masama sa kanyang paningin.

¹⁴“At ngayon, kayo namang lahi ng mga makasalanan ang pumalit sa inyong mga ninuno at dinagdagan pa ninyo ang galit ng Panginoon sa mga Israelita.

¹⁵Kung hindi kayo susunod sa Panginoon , pababayaan niyang muli kayong mga mamamayan dito sa ilang at kayo ang magiging dahilan ng pagkalipol ng mga Israelita.”

¹⁶Ngunit lumapit pa sila kay Moises at sinabi, “Gagawa na lang po kami rito ng mga kulungan para sa aming mga hayop at mga lungsod para sa aming mga kababaihan at anak.

¹⁷Ngunit handa po kaming pangunahan ang aming mga kapwa Israelita sa pakikipaglaban hanggang sa madala namin sila sa kanilang mga lugar. Habang nakikipaglaban kami, dito po maninirahan ang aming mga anak sa napapaderang lungsod na aming ipapatayo para maging ligtas sila sa mga naninirahan sa lupaing ito.

¹⁸Hindi po kami uuwi hanggang sa matanggap ng lahat ng mga Israelita ang lupaing kanilang mamanahin.

¹⁹Ngunit ayaw naming makatanggap ng lupa kasama nila sa kabila ng Jordan. Mas gusto po namin dito sa bandang silangan ng Jordan dahil nakakuha na kami ng parte namin dito sa silangan ng Jordan.”

²⁰Sinabi ni Moises sa kanila, “Kung talagang gagawin ninyo ʼyan, kapag handa na kayo sa pakikipaglaban kasama ang Panginoon ,

²¹at kapag tumawid ang lahat ng sundalo ninyo sa Jordan hanggang sa maitaboy ng Panginoon ang kanyang mga kaaway

²²at maangkin ang lupa, maaari na kayong makabalik dito dahil natupad na ninyo ang inyong tungkulin sa Panginoon at sa kapwa ninyo Israelita. At magiging inyo na ang lupaing ito sa harapan ng Panginoon .

²³“Subalit kung hindi ninyo ito gagawin, magkakasala kayo sa Panginoon at siguradong pagbabayaran ninyo ang inyong mga kasalanan.

²⁴Sige, magtayo kayo ng mga lungsod para sa inyong mga asawaʼt anak at gumawa ng mga kulungan para sa inyong mga hayop, ngunit dapat ninyong tuparin ang inyong ipinangako.”

²⁵Sumagot ang mga lahi nina Gad at Ruben kay Moises, “Susundin namin ang inyong mga utos.

²⁶Maiiwan dito sa mga lungsod ng Gilead ang aming mga asawa, mga anak at mga hayop.

²⁷Subalit kami na iyong mga lingkod na may kakayahang makipaglaban ay tatawid sa Jordan para makipaglaban kasama ang Panginoon ayon sa iyong utos.”

²⁸Kaya nag-utos si Moises sa paring si Eleazar, kay Josue na anak ni Nun at sa mga pinuno ng lahi ng Israel.

²⁹Sinabi niya, “Kung ang mga tauhan ng lahi nina Gad at Ruben na may kakayahang makipaglaban ay tatawid sa Jordan para sumáma sa pakikipaglaban sa laban ng Panginoon at kung maagaw na ninyo ang lupaing iyon, ibigay ninyo sa kanila ang lupain ng Gilead bilang lupain nila.

³⁰Ngunit kung hindi sila tatawid kasama ninyo dapat silang tumanggap ng lupa kasama ninyo, roon sa lupain ng Canaan.”

³¹Sinabi ng mga lahi nina Gad at Ruben, “Susundin namin kung ano ang sinabi ng Panginoon .

³²Tatawid kami sa Jordan sa presensya ng Panginoon , ngunit ang mamanahin naming lupain ay ang nasa silangan sa tabi ng Jordan.”

³³Kaya ibinigay ni Moises sa mga lahi nina Gad, Ruben at sa kalahati ng lahi ni Manases na anak ni Jose ang kaharian ni Sihon na hari ng mga Amoreo at ang kaharian ni Haring Og ng Bashan – ang buong lupain pati na ang lungsod at mga teritoryo sa palibot nito.

³⁴Itinayong muli ng lahi ni Gad ang Dibon, Atarot, Aroer,

³⁵Atrot-sofan, Jazer, Jogbeha,

³⁶Bet-nimra at Bet-haran. Ang mga lungsod na ito ay pinalibutan nila ng pader. Gumawa rin sila ng mga kulungan para sa kanilang mga hayop.

³⁷At itinayong muli ng mga lahi ni Ruben ang Hesbon, Eleale, Kiryataim

³⁸pati ang mga lugar na tinatawag noon na Nebo at Baal-meon at ang Sibma. Pinalitan nila ang mga pangalan ng mga lungsod na muli nilang itinayo.

³⁹Sinalakay ng mga angkan ni Maquir na anak ni Manases ang Gilead at naagaw nila ito, at itinaboy nila ang mga Amoreo na naninirahan doon.

⁴⁰Kaya ibinigay ni Moises ang Gilead sa mga angkan ni Maquir, na lahi rin ni Manases at doon sila nanirahan.

⁴¹Naagaw ni Jair na mula rin sa lahi ni Manases, ang mga nayon sa Gilead at tinawag niya itong, “Mga Bayan ni Jair”.[#32:41 Sa Hebreo, .]

⁴²Naagaw ni Noba ang Kenat at ang mga baryo sa palibot nito at tinawag niya itong, “Noba” ayon sa pangalan niya.