Kawikaan 10

Ang mga Kawikaan ni Solomon

¹Narito ang mga kawikaan ni Solomon:

Ang anak na marunong ay ligaya ng magulang,

ngunit ang anak na hangal

ay nagbibigay ng kalungkutan.

²Ang kayamanang nakuha sa masamang paraan

ay hindi makapagbibigay ng anumang kabutihan,

ngunit ang matuwid na pamumuhay

ay makapagliligtas sa iyo sa kamatayan.

³Hindi hinahayaan ng Panginoon

na magutom ang mga matuwid,

ngunit ipinagkakait naman niya

ang hangad ng mga masama.

⁴Nagpapahirap ang katamaran,

ngunit ang kasipagan ay nagpapayaman.

⁵Ang nag-iimbak ng pagkain kapag anihan

ay anak na maalam,

ngunit ang anak na laging tulog

kapag anihan ay kahiya-hiya.

⁶Ang taong matuwid ay pinagpapala;

ang bibig ng masamang tao ay nakakapinsala.

⁷Ang alaala ng taong matuwid

ay isang pagpapala magpakailanman

ngunit ang masamang tao

ay makakalimutan.

⁸Sumusunod sa mga utos

ang taong marunong,

ngunit ang nagsasalita ng kamangmangan

ay mawawasak.

⁹May kapayapaan ang taong namumuhay

nang matuwid,

ngunit ang masama ang pamumuhay

ay malalantad.

¹⁰Ang taong mandaraya ay gulo ang nililikha

at ang taong nagsasalita

ng kamangmangan ay mapapahamak.

¹¹Ang salita ng taong matuwid

ay makakatulong sa buhay ng iba,

ngunit ang mga salita ng taong masama

ay makapipinsala.

¹²Ang galit ay nagpapasimula ng kaguluhan,

ngunit ang pag-ibig ay nagpapatawad

ng lahat ng kasalanan.

¹³Nagsasalita ng karunungan

ang taong may pang-unawa,

ngunit ang walang pang-unawa

ay nagsasalita tungo sa kanyang kapahamakan.

¹⁴Nagdadagdag ng kaalaman

ang taong may karunungan,

ngunit ang mga hangal ay nagsasalita

tungo sa kanilang kapahamakan.

¹⁵Panatag ang mayaman

dahil sa kanyang kayamanan,

ngunit napapahamak ang mahirap

dahil sa kanyang kahirapan.

¹⁶Ang gantimpala ng matuwid ay buhay,

ngunit ang gantimpala ng masama

ay kaparusahan.

¹⁷Ang taong nakikinig sa pagtutuwid sa kanyang pag-uugali

ay mapapabuti at hahaba ang buhay,

ngunit ang taong hindi nakikinig

ay maliligaw ng landas.

¹⁸Ang nagkikimkim ng galit ay sinungaling,

at ang naninira sa kanyang

kapwa ay hangal.

¹⁹Ang taong masalita ay madaling magkasala.

Ang taong maalam

ay pinipigilan ang kanyang dila.

²⁰Ang salita ng matuwid

ay mahalaga tulad ng pilak,

ngunit ang isip ng masama

ay walang kabuluhan.

²¹Sa salita ng matuwid marami

ang nakikinabang,

ngunit ang mga hangal ay mamamatay

dahil walang pang-unawa.

²²Ang pagpapala ng Panginoon

ay nagpapayaman

at hindi niya ito dinadagdagan

ng anumang kalungkutan.

²³Ang kaligayahan ng hangal

ay ang paggawa ng kasamaan,

ngunit ang kaligayahan nang nakakaunawa

ay ang mamuhay nang may karunungan.

²⁴Ang kinatatakutan ng taong masama

ay mangyayari sa kanya,

ang hinahangad naman ng taong matuwid

ay kanyang makakamit.

²⁵Kapag dumating ang mga bagyo sa buhay,

tatangayin ang mga masasama,

subalit mananatiling matatag

ang mga matutuwid magpakailanman.

²⁶Tulad ng sukang nakakangilo

at usok na nakakaluha,

ganyan ang tamad sa nagpadala sa kanya.

²⁷Ang may paggalang sa Panginoon

ay hahaba ang buhay,

ngunit ang taong masama

ay iikli ang buhay.

²⁸Ang pag-asa ng matuwid

ay magbibigay ng kaligayahan,

ngunit ang pag-asa ng masama

ay walang katuparan.

²⁹Ang pagsunod sa pamamaraan ng Panginoon

ay kanlungan ng matuwid,

ngunit ang mga suwail dito

ay mapapahamak.

³⁰Ang matuwid ay hindi gagambalain

sa kanyang lupain,

ngunit ang masama

ay palalayasin.

³¹Ang bibig ng matuwid

ay puno ng karunungan,

ngunit ang dila ng sinungaling ay puputulin.

³²Ang bibig ng matuwid

ay nagsasalita ng kaaya-aya,

ngunit kabuktutan ang sinasabi

ng taong masama.