Salmo 104

Salmo 104

¹Pupurihin ko ang Panginoon !

Panginoon kong Diyos,

kayo ay dakila sa lahat.

Nadadamitan kayo ng kadakilaan

at karangalan.

²Nababalutan kayo ng liwanag

na parang inyong damit.

At inilaladlad nʼyo na parang

tolda ang langit.

³Itinayo nʼyo ang inyong tahanan

sa itaas pa ng kalawakan.

Ginawa nʼyo ang mga alapaap

na inyong sasakyan,

at inililipad ng hangin habang

kayoʼy nakasakay.

⁴Ginagawa nʼyong tagapaghatid ng balita ang hangin,

at ang kidlat na inyong utusan.

⁵Inilagay nʼyo ang mundo sa matibay na pundasyon,

kaya hindi ito matitinag magpakailanman.

⁶Ang tubig ay ginawa nʼyong parang tela na ipinambalot sa mundo,

at umapaw hanggang sa kabundukan.

⁷Sa inyong pagsaway na parang kulog,

nahawi ang tubig;

sa inyong utos, ito ay tumalima;

⁸at itoʼy umagos sa mga kabundukan

at mga kapatagan,

hanggang sa mga lugar na inyong inilaan

na dapat nitong kalagyan.

⁹Nilagyan nʼyo ito ng hangganan,

upang hindi umapaw ang tubig,

upang hindi na muling matabunan ang mundo.

¹⁰Lumikha ka ng mga bukal

sa mga lambak,

at umagos ang tubig sa pagitan

ng mga bundok.

¹¹Kaya lahat ng mga hayop sa gubat,

pati mga asnong-gubat ay may tubig na maiinom.

¹²At malapit sa tubig, may mga pugad ang mga ibon,

at sa mga sanga ng punongkahoy silaʼy nagsisiawit.

¹³Mula sa langit na inyong luklukan,

ang mga bundok ay inyong pinapaulanan.

At dahil sa inyong ginawa,

tumatanggap ang mundo ng pagpapala.

¹⁴Pinatutubo nʼyo ang mga damo para sa mga hayop,

at mga tanim para sa mga tao

upang silaʼy may maani at makain,

¹⁵may alak na maiinom

na magpapasaya sa kanila,

may langis na pampakinis ng mukha,

at may tinapay

na makapagpapalakas sa kanila.

¹⁶Nadidiligang mabuti ang inyong mga punongkahoy,

Panginoon ;

ang puno ng sedro sa Lebanon

na kayo rin ang nagtanim.

¹⁷Doon nagpupugad ang mga ibon,

at ang mga tagak ay tumatahan

sa mga puno ng abeto.

¹⁸Ang mga matataas na kabundukan

ay tirahan ng mga kambing-gubat.

Ang mga mababatong lugar naman

ay kanlungan ng mga badyer.

¹⁹Nilikha nʼyo ang buwan bilang tanda ng panahon;

at ang araw namaʼy lumulubog

sa oras na inyong itinakda.

²⁰Nilikha nʼyo ang kadiliman

na tinawag na gabi;

at kung gabiʼy gumagala

ang maraming hayop sa kagubatan.

²¹Umaatungal ang mga leon

habang naghahanap ng kanilang makakain

na sa inyo nagmumula.

²²At pagsapit ng umaga,

bumabalik sila sa kanilang mga lungga,

at doon nagpapahinga.

²³Ang mga tao naman

ay lumalabas papunta sa kanilang gawain,

at nagtatrabaho hanggang takip-silim.

²⁴Kay dami ng inyong mga ginawa, Panginoon .

Nilikha nʼyo ang lahat ayon

sa inyong karunungan.

Ang buong mundo

ay puno ng inyong nilikha.

²⁵Ang dagat ay napakalawak,

at hindi mabilang

ang inyong mga nilalang dito,

may malalaki at maliliit.

²⁶Ang mga barko ay parooʼt parito sa karagatan,

at doon din lumalangoy-langoy

ang nilikha nʼyong Leviatan.

²⁷Lahat ng inyong nilikha ay umaasa sa inyo

ng kanilang pagkain,

sa oras na kanilang kailanganin.

²⁸Binibigyan nʼyo sila ng pagkain

at kinakain nila ito,

at silaʼy nabubusog.

²⁹Ngunit kung pababayaan nʼyo sila,

matatakot sila;

at kapag binawi nʼyo ang kanilang buhay,

silaʼy mamamatay at babalik sa lupa.

³⁰Nalilikha sila

kapag binigyan mo ng hininga,

at sa ganoong paraan, binibigyan nʼyo

ng bagong nilalang ang mundo.

³¹Panginoon , sana ay magpatuloy

ang inyong kaluwalhatian magpakailanman.

Sanaʼy magalak kayo sa lahat

ng inyong nilikha.

³²Nayayanig ang mundo

kapag inyong tinitingnan.

Kapag hinipo nʼyo ang bundok,

itoʼy umuusok.

³³Aawit ako sa Panginoon

habang akoʼy nabubuhay.

Aawit ako ng papuri sa aking Diyos

habang akoʼy may hininga.

³⁴Sanaʼy matuwa siya sa aking pagbubulay-bulay.

Akoʼy magagalak sa Panginoon .

³⁵Lipulin sana ang masasama,

at ang mga makasalanan sa mundo

ay tuluyan nang mawala.

Pupurihin ko ang Panginoon .

Purihin ang Panginoon !