Salmo 107

ikalimang Aklat

Salmo 107

¹Magpasalamat kayo sa Panginoon ,

sapagkat siyaʼy mabuti;

ang pag-ibig niyaʼy magpakailanman.

²Sabihin ninyo ito, kayong mga iniligtas niya

sa kamay ng mga kaaway.

³Dahil tinipon niya kayo mula sa mga bansa;

sa silangan, kanluran, timog at hilaga.

⁴May mga taong naglakbay sa ilang;

hindi nila makita ang daan papunta sa lungsod

na maaari nilang tirhan.

⁵Silaʼy nagutom at nauhaw

at halos mamatay na.

⁶Sa kanilang kagipitan,

tumawag sila sa Panginoon ,

at silaʼy iniligtas niya sa kanilang pagdurusa.

⁷At pinatnubayan niya sila

papunta sa lungsod

na kanilang matitirahan.

⁸Kaya dapat silang magpasalamat sa Panginoon

dahil sa pag-ibig niya

at kahanga-hanga niyang gawa sa mga tao.

⁹Dahil pinaiinom niya ang mga nauuhaw,

at pinakakain ang mga nagugutom.

¹⁰May mga taong ibinilanggo at kinadenahan

na nakaupo sa napakadilim na piitan.

¹¹Nabilanggo sila dahil nagrebelde sila

sa mga sinabi ng Kataas-taasang Diyos

at hindi sumunod sa kanyang mga payo.

¹²Kaya pinahirapan niya sila

sa kanilang mabigat na trabaho.

Nabuwal sila ngunit walang sinumang sumaklolo.

¹³Sa kanilang kagipitan,

tumawag sila sa Panginoon ,

at silaʼy iniligtas niya sa kanilang pagdurusa.

¹⁴Pinutol niya ang kanilang mga kadena

at silaʼy kinuha niya sa napakadilim na piitan.

¹⁵Kaya dapat silang magpasalamat sa Panginoon ,

dahil sa pag-ibig niya

at kahanga-hangang gawa sa mga tao.

¹⁶Dahil giniba niya ang mga pintuang tanso

at binali ang mga rehas na bakal.

¹⁷May mga naging hangal

dahil sa kanilang likong pamumuhay,

at silaʼy naghirap dahil sa kanilang kasalanan.

¹⁸Nawalan sila ng gana sa kahit anong pagkain

at malapit nang mamatay.

¹⁹Sa kanilang kagipitan, tumawag sila sa Panginoon ,

at silaʼy iniligtas niya sa kanilang pagdurusa.

²⁰Sa kanyang salita silaʼy nagsigaling

at iniligtas niya sila sa kamatayan.

²¹Kaya dapat silang magpasalamat sa Panginoon ,

dahil sa pag-ibig niya at kahanga-hangang gawa sa mga tao.

²²Dapat silang mag-alay ng handog ng pasasalamat sa kanya

at ihayag ang kanyang mga ginawa

nang may masayang pag-aawitan.

²³May mga taong sumakay sa mga barko

at nagbiyahe sa karagatan,

dahil ito ang kanilang hanapbuhay.

²⁴Nakita nila ang kahanga-hangang mga gawa

ng Panginoon sa karagatan.

²⁵Sa utos niya, ang hangin ay lumakas

at lumaki ang mga alon.

²⁶Kaya pumapaitaas ang kanilang barko

nang napakataas at pumapailalim.

At silaʼy nangatakot sa nagbabantang kapahamakan.

²⁷Silaʼy susuray-suray na parang mga lasing,

at hindi na alam kung ano ang gagawin.

²⁸Sa kanilang kagipitan, tumawag sila sa Panginoon ,

at silaʼy iniligtas niya sa kanilang pagdurusa.

²⁹Pinatigil niya ang malakas na hangin

at kumalma ang dagat.

³⁰At nang kumalma ang dagat, silaʼy nagalak,

at silaʼy pinatnubayan ng Diyos

hanggang sa makarating sila sa nais nilang daungan.

³¹Kaya dapat silang magpasalamat sa Panginoon ,

dahil sa pag-ibig niya

at kahanga-hangang gawa sa mga tao.

³²Dapat nilang parangalan ang Diyos

sa kanilang pagtitipon,

at purihin siya sa pagtitipon

ng mga namamahala sa kanila.

³³Nagagawa ng Panginoon ang ilog

na maging ilang,

at ang mga bukal na maging tuyong lupa.

³⁴Nagagawa rin ng Panginoon

na walang maani sa matabang lupa,

dahil sa kasamaan ng mga naninirahan doon.

³⁵Nagagawa rin niya ang ilang

na maging tubigan,

at sa mga tuyong lupain

ay magkaroon ng mga bukal.

³⁶Doon niya pinapatira ang mga taong nagugutom,

at nagtatayo sila ng lungsod

na kanilang tatahanan.

³⁷Nagsasabog sila ng binhi sa bukirin

at nagtatanim ng ubas,

kaya sagana sila pagdating ng anihan.

³⁸Silaʼy pinagpapala ng Diyos,

at pinararami ang kanilang angkan.

Kahit ang kanilang mga alagang hayop

ay nadadagdagan.

³⁹Ngunit dahil sa pang-aapi,

kahirapan at pagkabagabag,

silaʼy nabawasan at napahiya.

⁴⁰Isinusumpa ng Diyos ang mga umaapi sa kanila,

at silaʼy ililigaw at gagala sa ilang na walang daan.

⁴¹Ngunit tinulungan niya ang mga dukha

sa kanilang kahirapan,

at pinarami ang kanilang

sambahayan na parang kawan.

⁴²Nakita ito ng mga matuwid

at silaʼy nagalak,

ngunit tumahimik ang masasamâ.

⁴³Ang mga bagay na itoʼy dapat ingatan

sa puso ng mga taong marunong,

at dapat din nilang isipin

ang dakilang pag-ibig ng Panginoon .