Salmo 35

Salmo 35

¹Panginoon , kontrahin nʼyo po

ang mga kumukontra sa akin.

Labanan nʼyo ang mga kumakalaban sa akin.

²Kunin nʼyo ang inyong kalasag,

at akoʼy inyong tulungan.

³Ihanda nʼyo ang inyong mga sibat,

para sa mga taong humahabol sa akin.

Gusto kong marinig na sabihin nʼyo,

“Ako ang magpapatagumpay sa iyo.”

⁴Mapahiya sana ang mga taong naghahangad na akoʼy patayin.

Paatrasin nʼyo at biguin ang mga nagpaplano

ng masama sa akin.

⁵Maging gaya sana sila ng ipa

na tinatangay ng hangin,

habang silaʼy itinataboy ng inyong anghel.

⁶Maging madilim sana at madulas

ang kanilang dinadaanan,

habang silaʼy hinahabol ng inyong anghel.

⁷Naghukay sila at naglagay ng bitag

para sa akin,

kahit wala akong ginawang masama sa kanila.

⁸Dumating sana sa kanila ang kapahamakan

nang hindi nila inaasahan.

Sila sana ang mahuli sa bitag

na kanilang ginawa,

at sila rin ang mahulog sa hukay

na kanilang hinukay.

⁹At akoʼy magagalak

dahil sa inyong pagliligtas sa akin,

Panginoon .

¹⁰Buong puso kong isisigaw,

“Panginoon , wala kayong katulad!

Kayo ang nagliligtas sa mga dukha

at api mula sa mga mapagsamantala.”

¹¹May mga malupit na taong sumasaksi

laban sa akin.

Ang kasalanang hindi ko ginawa

ay ibinibintang nila sa akin.

¹²Ginagantihan nila ako ng masama

sa mga kabutihang aking ginawa,

kaya akoʼy labis na nagdaramdam.

¹³Kapag silaʼy nagkakasakit akoʼy nalulungkot

para sa kanila;

nagdaramit ako ng sako

at nag-aayuno pa.

At kung ang aking dalangin

para sa kanilaʼy hindi sinasagot,

¹⁴palakad-lakad akong nagluluksa

na parang nawalan ng kapatid o kaibigan.

Akoʼy yumuyuko at nagdadalamhati

para sa kanila

na para bang nawalan ako ng ina.

¹⁵Ngunit nang ako na ang nahihirapan,

nagtitipon sila at nagtatawanan.

Nagsasama-sama ang mga kumakalaban sa akin;

kahit ang mga hindi ko kilala

ay sumasamaʼt walang tigil

na akoʼy hinahamak.

¹⁶Kinukutya nila ako

nang walang pakundangan,

at ang kanilang mga ngipin

ay nagngangalit sa sobrang galit.

¹⁷Panginoon , hanggang kailan kayo

manonood lang?

Iligtas nʼyo na ako sa mga sumasalakay na ito

na parang mga leon na gusto

akong lapain.

¹⁸At sa gitna ng karamihan,

kayoʼy aking papupurihan

at pasasalamatan.

¹⁹Huwag nʼyong payagan na matuwa

ang aking mga kaaway

sa aking pagkatalo.

Ang mga galit sa akin

nang walang dahilan

ay huwag nʼyong payagang kutyain ako.

²⁰Walang maganda sa sinasabi nila,

sa halip sinisiraan nila ang namumuhay

nang tahimik.

²¹Sumisigaw sila sa akin

na nagpaparatang,

“Aha! Nakita namin ang ginawa mo!”

²²Panginoon , alam nʼyo ang lahat ng ito,

kaya huwag kayong manahimik.

Huwag kayong lumayo sa akin.

²³Panginoon kong Diyos, ipagtanggol po ninyo

ako sa kanila.

²⁴Ipahayag po ninyo na akoʼy

walang kasalanan,

O Panginoon kong Diyos,

dahil kayo ay matuwid kung humatol.

Huwag ninyong hayaang

akoʼy kanilang pagtawanan.

²⁵Huwag nʼyong hayaang sabihin nila

sa kanilang sarili,

“Sa wakas, nangyari rin ang gusto

naming mangyari,

natalo na rin namin siya!”

²⁶Mapahiya sana silang nagmamalaki sa akin

at nagagalak sa aking mga paghihirap.

²⁷Sumigaw sana sa kagalakan

ang mga taong

nagagalak sa aking kalayaan.

Palagi sana nilang sabihin,

“Purihin ang Panginoon

na nagagalak sa tagumpay

ng kanyang mga lingkod.”

²⁸Ihahayag ko sa mga tao

ang inyong pagkamakatuwiran,

at buong maghapon ko kayong

papupurihan.