Salmo 59

Salmo 59

¹O Diyos, iligtas nʼyo ako sa aking mga kaaway.

At sa mga kumakalaban sa akin, ako ay inyong ingatan.

²Iligtas nʼyo ako sa masasama at sa mga mamamatay-tao.

³Panginoon , tingnan nʼyo!

Inaabangan nila ako upang patayin,

kahit na wala akong nagawang kasalanan sa kanila.

^4-5Wala akong nagawang kasalanan,

ngunit handa silang salakayin ako.

Sige na po, Panginoong Diyos ng mga Hukbo,

Diyos ng Israel.

Tingnan nʼyo na ang nangyayari;

tulungan nʼyo ako!

Kumilos na kayo, at parusahan nʼyo

ang mga bansang hindi sumasampalataya sa inyo.

Huwag nʼyong kahabagan

ang mga taksil na iyon.

⁶Tuwing gabi ay pabalik-balik sa lungsod ang aking mga kaaway;

para silang mga asong umaalulong

habang silaʼy naglilibot sa bayan.

⁷Pakinggan nʼyo ang kanilang pananalita;

kasinsakit ng tusok ng espada.

At sinasabi pa nila,

“Wala namang nakakarinig sa atin.”

⁸Ngunit, pinagtatawanan nʼyo lang sila Panginoon .

Kinukutya nʼyo ang mga taong

hindi sumasampalataya sa inyo.

⁹O Diyos ikaw ang aking kalakasan.

Maghihintay ako sa inyo

dahil ikaw ang aking tagapagtanggol,

¹⁰at Diyos na nagmamahal sa akin.

Manguna ka sa akin at ipakita mo sa akin

ang pagbagsak ng aking mga kaaway.

¹¹Ngunit huwag nʼyo silang patayin agad

upang hindi makalimutan ng aking mga kababayan

kung paano nʼyo pinarurusahan

ang inyong mga kaaway.

O Panginoon na aming pananggalang,

iligaw nʼyo at ibagsak ang aking mga kaaway

sa pamamagitan ng inyong kapangyarihan.

¹²Silaʼy nagkakasala sa kanilang mga labi

sapagkat masasama ang kanilang sinasabi.

Mahuli sana sila sa kanilang kayabangan,

pagmumura at kasinungalingan.

¹³Sa inyong galit, lipulin nʼyo sila

hanggang sa silaʼy maglaho.

Sa gayoʼy malalaman ng buong mundo

na kayo, O Diyos, ang naghahari sa Israel.

¹⁴Tuwing gabi ay pabalik-balik

sa lungsod ang aking mga kaaway;

para silang mga asong umaalulong

habang silaʼy naglilibot sa bayan.

¹⁵Silaʼy naglilibot para humanap ng pagkain

at umaalulong kapag hindi nabusog.

¹⁶Ngunit ako ay aawit

tungkol sa inyong kapangyarihan.

Tuwing umaga, akoʼy aawit

nang may kagalakan

tungkol sa inyong pag-ibig.

Sapagkat kayo ang aking kanlungan

sa oras ng kagipitan.

¹⁷O Diyos, kayo ang aking kalakasan.

Aawit ako ng mga papuri sa inyo,

dahil kayo ang aking kanlungan

at Diyos na sa akin ay nagmamahal.