Mga Awit 150

Purihin si Yahweh

¹Purihin si Yahweh!

Sa banal na templo, ang Diyos ay awitan,

purihin sa langit ang lakas na taglay!

²Siya ay purihin sa kanyang ginawa,

siya ay purihin, sapagkat dakila.

³Purihin sa tugtog ng mga trumpeta,

awitan sa saliw ng alpa at lira!

⁴Sa tugtog ng tambol, magsayaw, purihin,

mga alpa't plauta, lahat ay tugtugin!

⁵Ang Diyos ay purihin sa tugtog ng pompiyang,

sa lakas ng tugtog siya'y papurihan.

⁶Purihin si Yahweh lahat ng nilalang!

Purihin si Yahweh!