Mga Awit 2

Ang Haring Pinili ni Yahweh

¹Bakit nagbabalak maghimagsik ang mga bansa?[#Gw. 4:25-26.]

Sa sabwatan nilang ito'y anong kanilang mapapala?

²Mga hari ng lupa'y nagkasundo at sama-samang lumalaban,

hinahamon si Yahweh at ang kanyang hinirang:

³Sinasabi nila: “Ang paghahari nila sa atin ay dapat nang matapos;

dapat na tayong lumaya at kumawala sa gapos.”

⁴Si Yahweh na nakaupo sa langit ay natatawa lamang,

lahat ng plano nila ay wala namang katuturan.

⁵Sa tindi ng kanyang galit, sila'y kanyang binalaan;

sa tindi ng poot, sila'y kanyang sinabihan,

⁶“Doon sa Zion, sa bundok na banal,

ang haring pinili ko'y aking itinalaga.”

⁷“Ipahahayag ko ang sinabi sa akin ni Yahweh,[#Gw. 13:33; Heb. 1:5; 5:5.]

‘Ikaw ang aking anak,

mula ngayo'y ako na ang iyong ama.

⁸Hingin mo ang mga bansa't ibibigay ko sa iyo,

maging ang buong daigdig ay ipapamana ko.

⁹Dudurugin mo sila ng tungkod na bakal;[#Pah. 2:26-27; 12:5; 19:15.]

tulad ng palayok, sila'y magkakabasag-basag.’”

¹⁰Kaya't magpakatalino kayo, mga hari ng mundo,

ang babalang ito'y unawain ninyo:

¹¹Paglingkuran ninyo si Yahweh nang may takot at paggalang,

sa paanan ng kanyang anak

¹²yumukod kayo't magparangal,

baka magalit siya't bigla kayong parusahan.

Mapalad ang taong ang Diyos ang kanlungan.