Mga Awit 67

Awit ng Pagpapasalamat

¹O Diyos, pagpalain kami't kahabagan,

kami Panginoo'y iyong kaawaan, (Selah)

²upang sa daigdig mabatid ng lahat

ang iyong kalooban at ang pagliligtas.

³Purihin ka nawa ng lahat ng tao,

purihin ka nila sa lahat ng dako.

⁴Nawa'y purihin ka ng mga nilikha,

pagkat matuwid kang humatol sa madla;

ikaw ang patnubay ng lahat ng bansa. (Selah)

⁵Purihin ka nawa ng lahat ng tao,

purihin ka nila sa lahat ng dako.

⁶Nag-aning mabuti ang mga lupain,

pinagpala kami ni Yahweh, Diyos namin!

⁷Magpatuloy nawa iyong pagpapala

upang igalang ka ng lahat ng bansa.