Sala ya kuomba ulinzi wa Mungu

¹Ee Mwenyezi-Mungu, uniokoe na watu wabaya,

unikinge na watu wakatili.

²Watu hao huwaza mabaya daima,

huzusha magomvi kila mara.

³Ndimi zao hatari kama za nyoka;[#Taz Rom 3:13]

midomoni mwao mna maneno ya sumu kama ya joka.

⁴Ee Mwenyezi-Mungu, unilinde na makucha ya wabaya;

unikinge na watu wakatili

ambao wamepanga kuniangusha.

⁵Wenye kiburi wamenitegea mitego,

wametandaza kamba kama wavu,

wameficha mitego njiani wanikamate.

⁶Namwambia Mwenyezi-Mungu, “Wewe ndiwe Mungu wangu.”

Usikilize, ee Mwenyezi-Mungu, sauti ya ombi langu.

⁷Ee Mwenyezi-Mungu, Bwana wangu, mkombozi wangu mkuu,

umenikinga salama wakati wa vita.

⁸Ee Mwenyezi-Mungu, usiwape waovu wanayotaka;

wala mipango yao mibaya usiifanikishe.

⁹Hao wanaonizingira wanainua vichwa;

uovu wa maneno yao uwapate wao wenyewe!

¹⁰Makaa ya moto yawaangukie;

watumbukizwe mashimoni, wasiinuke tena.

¹¹Wanaowasengenya wengine wasifanikiwe katika nchi;

uovu uwapate wakatili na kuwaangamiza mara!

¹²Najua Mwenyezi-Mungu hutetea kisa cha wanaoteswa,

na kuwapatia haki maskini.

¹³Hakika waadilifu watalisifu jina lako;

wanyofu watakaa kwako.