Mungu hakimu wa mahakimu

¹Enyi watawala, je, mwahukumu kwa haki kweli?[#58:1 au Miungu.]

Je, mnawahukumu watu kwa adili?

²La! Nyinyi mwafikiria tu kutenda maovu;

nyinyi wenyewe mwaeneza dhuluma nchini.

³Waovu wamepotoka tangu kuzaliwa kwao,

waongo hao, wamekosa tangu walipozaliwa.

⁴Wana sumu kama sumu ya nyoka;

viziwi kama joka lizibalo masikio,

⁵ambalo halisikii hata sauti ya mlozi,

au utenzi wa mganga stadi wa uchawi.

⁶Ee Mungu, wavunje meno yao,

yangoe, ee Mwenyezi-Mungu, meno ya simba hao.

⁷Watoweke kama maji yanayodidimia mchangani,

kama nyasi wakanyagwe na kunyauka,

⁸watoweke kama konokono ayeyukavyo,

kama mimba iliyoharibika isiyoona kamwe jua!

⁹Kabla hawajatambua, wangolewe

kama miiba, michongoma au magugu.

Kwa hasira ya Mungu, wapeperushwe mbali,

wakiwa bado hai.

¹⁰Waadilifu watafurahi waonapo waovu wanaadhibiwa;

watatembea katika damu ya watu wabaya.

¹¹Watu wote watasema: “Naam, waadilifu hupata tuzo!

Hakika yuko Mungu anayeihukumu dunia!”