Yesu kuhani wetu mkuu

¹Basi, jambo muhimu katika hayo tunayosema ni hili: sisi tunaye kuhani mkuu wa namna hiyo, ambaye anaketi upande wa kulia wa kiti cha enzi cha Mkuu mbinguni.[#8:1 Katika Ebr 8:1—10:18 wadhifa wa Yesu kama kuhani mkuu halisi au wa kweli unaelezwa kwa uangalifu. Taz Ebr 2:17 maelezo.]

²Yeye hutoa huduma ya kuhani mkuu mahali patakatifu katika maskani, yaani ndani ya ile hema ya kweli iliyojengwa na Bwana, siyo na binadamu.[#8:2 Kwa kutofautisha na ile hema ya mkutano waliyojifanyia Waisraeli kule jangwani (rejea Kut 26) na ambayo mwandishi anaiona kuwa mfano tu wa ile ya kweli (taz 8:3-5 maelezo).; #8:1-2 Rejea Zab 110:1. Mawazo mawili: “mfalme” (upande wa kulia wa Mungu Mkuu) na “kuhani” (aya 2; Zab 110:4) inatumiwa hapa juu ya Yesu. Taz Ebr 1:13 maelezo, na 2:17 maelezo.]

³Kila kuhani mkuu ameteuliwa kumtolea Mungu zawadi na tambiko, na hivyo kuhani mkuu wetu lazima naye awe na kitu cha kutolea.[#8:3 Taz Ebr 7:27 maelezo, rejea Ebr 10:10.]

⁴Kama yeye angekuwa wa hapa duniani, asingekuwa kamwe kuhani, kwani wako makuhani wengine wanaotoa sadaka kufuatana na sheria.

⁵Huduma zao za kikuhani ni mfano tu na kivuli cha yale yaliyoko mbinguni. Maana Mose alipokuwa karibu kuitengeneza ile maskani, Mungu alimwambia: “Tengeneza kila kitu kufuatana na ule mfano uliooneshwa kule mlimani.”[#8:3-5 Rejea Ebr 9:11,23-24; 10:1. Rejea pia Kut 25:40. Yesu Kristo na ile hema ya kweli (aya 2) ni kweli zisizoonekana kwa macho, kweli ambazo kuhani wa Wayahudi na hema ya A.K. vilikuwa vielelezo tu vya kweli hizo; kwa kifupi, Agano Jipya (aya 7) ni ukweli ambao ulitanguliwa kuelezwa kwa mfano tu katika A.K.]

⁶Lakini sasa Yesu amepewa huduma ya kikuhani iliyo bora kuliko yao, kama vile agano alilothibitisha kati ya watu na Mungu ni bora zaidi, kwani lina msingi wake katika ahadi za mambo yaliyo bora zaidi.[#8:6 Au, “Amekuwa mpatanishi bora zaidi kati ya Mungu na watu”: Ebr 9:15; 12:24; taz 1Tim 2:5. Ukuu wa Yesu Kristo unatiliwa mkazo.]

⁷Maana kama lile agano la kwanza halingalikuwa na dosari, hakungalikuwa na haja ya agano la pili.[#8:7 Mkataba aliouweka Mungu pamoja na Waisraeli Mlimani Sinai (aya 9; rejea Kut 19—20; 24:3-8).]

⁸Lakini Mungu aliwalaumu watu wake aliposema:

“Siku zinakuja, asema Bwana,

ambapo nitafanya agano jipya

na watu wa Israeli na wa Yuda.

⁹Agano hili halitakuwa kama lile nililofanya na babu zao

siku nilipowaongoza kwa mkono kutoka Misri.

Hawakuwa waaminifu kwa agano langu;

na hivyo mimi sikuwajali, asema Bwana.

¹⁰Hili ndilo agano nitakalofanya na watu wa Israeli siku zijazo, asema Bwana:

Nitaweka sheria zangu akilini mwao,

na kuziandika mioyoni mwao.

Mimi nitakuwa Mungu wao,

nao watakuwa watu wangu.

¹¹Hakuna atakayemfundisha mwananchi mwenzake,

wala atakayemwambia ndugu yake:

‘Mjue Bwana’.

Maana wote, wadogo na wakubwa, watanijua mimi.

¹²Nitawasamehe makosa yao,

wala sitakumbuka tena dhambi zao.”

¹³Kwa kusema juu ya agano jipya, Mungu alilichakaza lile la kwanza; na chochote kinachochakaa na kuwa kikuukuu kitatoweka karibuni.