Mapokeo ya mababu

¹Kisha Mafarisayo na waalimu wa sheria wakafika kutoka Yerusalemu, wakamwendea Yesu, wakamwuliza,

²“Kwa nini wanafunzi wako hawajali mapokeo tuliyopokea kwa wazee wetu? Hawanawi mikono ipasavyo kabla ya kula!”[#15:2 Luka 11:38. Yahusu ufafanuzi wa jadi wa sheria ya Mose uliofanywa na waalimu wa Kiyahudi na kusimuliwa kizazi hata kizazi kuhusu kutawadha; taz Marko 7:3 maelezo. Hawanawi mikono ipasavyo: Kama ilivyotakiwa ili kumfanya mtu awe safi kidini, kwa maneno mengine “kutawadha” (15:20).]

³Yesu akawajibu, “Kwa nini nanyi hamjali sheria ya Mungu ila mnapendelea mapokeo yenu wenyewe?

⁴Mungu amesema: ‘Waheshimu baba yako na mama yako,’ na ‘Anayemtukana baba yake au mama yake, lazima auawe.’[#15:4 Kuhusu sheria hizo mbili zinazotajwa hapa, taz Kut 20:12; Kumb 5:16.]

⁵Lakini nyinyi mwafundisha ati mtu akiwa na kitu ambacho angeweza kumsaidia nacho baba yake au mama yake, lakini akasema: ‘Kitu hiki nimemtolea Mungu,’[#15:5 Kiebrania “korbani”. Yaani ni kitu kilichowekwa wakfu kwa Mungu na hivyo hakiwezi kutumiwa namna nyingine (taz maelezo katika Marko 7:11).]

⁶basi, hapaswi tena kumheshimu baba yake! Ndivyo mnavyodharau neno la Mungu kwa kufuata mafundisho yenu wenyewe.[#15:6 Hati nyingine za kale kadhaa zina: “baba yake au mama yake”.]

⁷Enyi wanafiki! Isaya alitabiri sawa kabisa juu yenu:

⁸‘Mungu asema: Watu hawa huniheshimu kwa maneno tu,

lakini mioyoni mwao wako mbali nami.

⁹Kuniabudu kwao hakufai,

maana mambo wanayofundisha ni maagizo ya kibinadamu tu.’”

Mambo yanayomtia mtu unajisi

¹⁰Yesu aliuita ule umati wa watu, akawaambia, “Sikilizeni, mkaelewe![#15:10 Mara kwa mara Mathayo anarudiarudia umuhimu wa kuelewa mafundisho ya Yesu. Jambo hilo linahitaji usikivu, unyenyekevu na utii. Taz 13:13,51; 16:9-12.]

¹¹Kitu kinachomtia mtu unajisi si kile kiingiacho kinywani, bali kile kitokacho kinywani. Hicho ndicho kimtiacho mtu unajisi.”[#15:11 Ni kitu kimfanyacho mtu kuwa mwiko kidini (Lawi 11). Jambo la kuwa safi na najisi kidini lilitiliwa maanani sana na Wayahudi nyakati za Yesu. Yesu aliweka muundo na msimamo mpya ambao ni kinyume kabisa cha desturi hiyo: uovu uko ndani ya mtu na huo ndio wenye kumfanya mtu kuwa najisi kwelikweli. Huo ni mbaya zaidi; taz Marko 7:2.]

¹²Kisha wanafunzi wakamwendea, wakamwambia, “Je, unajua kwamba Mafarisayo walichukizwa waliposikia maneno yako?”

¹³Lakini yeye akawajibu, “Kila mmea ambao Baba yangu aliye mbinguni hakupanda, utang'olewa.

¹⁴Waacheni wenyewe! Wao ni vipofu, viongozi wa vipofu; na kipofu akimwongoza kipofu, wote wawili hutumbukia shimoni.”

¹⁵Petro akasema, “Tufafanulie huo mfano.”

¹⁶Yesu akasema, “Hata nyinyi hamwelewi?

¹⁷Je, hamwelewi kwamba kila kinachoingia kinywani huenda tumboni na baadaye hutolewa nje chooni?

¹⁸Lakini mambo yatokayo kinywani hutoka moyoni, na hayo ndiyo yanayomtia mtu unajisi.

¹⁹Maana moyoni hutoka mawazo ya uuaji, uzinzi, uasherati, wizi, ushahidi wa uongo na kashfa.

²⁰Hayo ndiyo yanayomtia mtu unajisi. Lakini kula chakula bila kunawa mikono hakumtii mtu unajisi.”

Imani ya mama mmoja

²¹Yesu aliondoka mahali hapo akaenda kukaa katika sehemu za Tiro na Sidoni.[#15:21 Sehemu ambazo zilikaliwa na watu wasio Wayahudi, watu wa mataifa mengine, na ambao Wayahudi waliwaona kuwa watu wasiomjua Mungu.]

²²Basi, mama mmoja Mkanaani wa nchi hiyo alimjia, akapaza sauti: “Bwana, Mwana wa Daudi, nionee huruma! Binti yangu anasumbuliwa na pepo.”[#15:22 Jina la sifa la kumtaja Masiha; taz Mat 1:1 maelezo.]

²³Lakini Yesu hakumjibu neno. Basi, wanafunzi wake wakamwendea, wakamwambia, “Mwambie aende zake kwa maana anatufuatafuata akipiga kelele.”[#15:23 Tafsiri nyingine yamkini ni: “Msikilize huyu mama”. Lakini kutokana na maneno ya Yesu: “Si vizuri kuchukua chakula cha watoto na kuwatupia mbwa”, maneno ambayo yanarudia maoni ya hao wanafunzi kwamba huyu ni mama asiye Myahudi (mbwa), yeye anamwezesha huyo mama kusema ukweli wa hali ilivyo: “hata mbwa huokota …” na kumfanyia huyo mama ombi lake. Yaani, hata wasio Wayahudi watapewa baraka za Kimasiha.]

²⁴Yesu akajibu, “Sikutumwa ila kwa watu wa Israeli waliopotea kama kondoo.”

²⁵Hapo huyo mama akaja, akamsujudia, akasema, “Bwana, nisaidie.”

²⁶Yesu akamjibu, “Si vizuri kuchukua chakula cha watoto na kuwatupia mbwa.”[#15:26 Wayahudi waliwaita watu wasio Wayahudi “mbwa”; inaonekana kwamba Yesu, kutokana na maneno ya wanafunzi ya kumtaka amwambie huyo mama aende zake (aya ya 23), anatumia neno hilo anapoongea na huyo mama Mkanaani (asiye Myahudi) kama kwa kejeli, lakini si kwa kupinga kabisa ombi la huyo mama ambaye katika aya ya 27 anasisitiza naye Yesu mwishowe anamjalia ombi lake (aya ya 28). Wasio Wayahudi watashiriki neema za watu wa Mungu kama Wayahudi.]

²⁷Huyo mama akajibu, “Ni kweli, Bwana; lakini hata mbwa hula makombo yanayoanguka kutoka meza ya bwana wao.”

²⁸Hapo Yesu akamjibu, “Mama, imani yako ni kubwa; basi, ufanyiwe kama unavyotaka.” Yule binti yake akapona wakati huohuo.

Yesu anawaponya watu wengi

²⁹Yesu alitoka hapo akaenda kando ya ziwa Galilaya, akapanda mlimani, akaketi.

³⁰Watu wengi sana wakamjia wakiwaleta vilema, vipofu, viwete, bubu na wengine wengi waliokuwa wagonjwa, wakawaweka mbele ya miguu yake, naye Yesu akawaponya.

³¹Umati ule wa watu ulishangaa sana ulipoona bubu wakiongea, waliokuwa wamelemaa wamepona, viwete wakitembea na vipofu wakiona; watu wakamsifu Mungu wa Israeli.

Yesu anawapa chakula watu elfu nne

³²Basi, Yesu aliwaita wanafunzi wake, akasema, “Nawaonea huruma watu hawa kwa sababu wamekuwa nami kwa siku tatu, wala hawana chakula. Sipendi kuwaacha waende zao bila kula, wasije wakazimia njiani.”

³³Wanafunzi wakamwambia, “Hapa tuko nyikani; tutapata wapi chakula cha kuwatosha watu wengi hivi?”

³⁴Yesu akawauliza, “Mnayo mikate mingapi?” Wakamjibu, “Saba na visamaki vichache.”

³⁵Basi, Yesu akawaamuru watu wakae chini.

³⁶Akaitwaa ile mikate saba na vile visamaki, akamshukuru Mungu, akavimega, akawapa wanafunzi, nao wakawagawia watu.

³⁷Wote wakala, wakashiba. Kisha wakakusanya mabaki, wakajaza vikapu saba.

³⁸Hao waliokula walikuwa wanaume 4,000, bila kuhesabu wanawake na watoto.

³⁹Basi, Yesu akawaaga watu, akapanda mashua, akaenda katika eneo la Magadani.[#15:39 Haijulikani ni wapi hasa. Hati nyingine za kale zina: “Magdala”.]