Yesu anapelekwa kwa Pilato

¹Kulipopambazuka, makuhani wakuu wote na wazee wa watu walifanya mashauri juu ya Yesu wapate kumuua.[#27:1 Taz Mat 26:57 maelezo.]

²Wakamfunga pingu, wakamchukua, wakamkabidhi kwa Pilato, mkuu wa mkoa.[#27:2 Huyu alikuwa mtawala wa Kiroma au gavana. Alitawala huko Yudea mnamo mwaka 26-36 B.K. Taz Mat 27:11 maelezo.]

Kifo cha Yuda

³Hapo, Yuda, ambaye ndiye aliyemsaliti, alipoona kwamba wamekwisha mhukumu Yesu, akajuta, akawarudishia makuhani wakuu vile vipande thelathini vya fedha.

⁴Akawaambia, “Nimekosa kwa kumtoa mtu asiye na hatia auawe.” Lakini wao wakasema, “Yatuhusu nini sisi? Hilo ni shauri lako.”

⁵Naye akazitupa zile fedha hekaluni, akatoka nje, akaenda akajinyonga.

⁶Makuhani wakuu wakazichukua zile fedha, wakasema, “Haifai kuziweka katika hazina ya hekalu kwa maana ni fedha za damu.”

⁷Basi, wakashauriana, wakazitumia kununua shamba la mfinyanzi liwe mahali pa kuzika wageni.

⁸Ndio maana mpaka leo shamba hilo linaitwa Shamba la Damu.

⁹Hivyo maneno ya nabii Yeremia yakatimia: “Walichukua vipande thelathini vya fedha, thamani ya yule ambaye watu wa Israeli walimtia bei,[#27:9b-10 Maneno yamekaririwa kutoka Zek 11:12-13 pamoja na mengine kutoka Yer 18:2-3; 19:1-2; 32:6-15.]

¹⁰wakanunua nazo shamba la mfinyanzi, kama Bwana alivyoniagiza.”

Pilato anamhoji Yesu

¹¹Yesu alisimamishwa mbele ya mkuu wa mkoa. Basi, mkuu wa mkoa akamwuliza, “Je, wewe ndiwe Mfalme wa Wayahudi?” Yesu akamwambia, “Wewe umesema.”[#27:11 Swali la Pilato na jibu la Yesu ni kama lile swali na jibu wakati wa kikao cha Halmashauri Kuu katika Mat 26:63-64. Jibu “Wewe umesema” laweza kueleweka kama “Ndiyo” au kwamba Yesu anakubali kuwa yeye ni mfalme lakini si kwa maana anayofikiria Pilato. Taz Mat 26:64 maelezo.]

¹²Lakini makuhani wakuu na wazee walipokuwa wanamshtaki, hakujibu neno.

¹³Hivyo Pilato akamwuliza, “Je, husikii mashtaka hayo yote wanayotoa juu yako?”

¹⁴Lakini Yesu hakumjibu hata neno moja; hata huyo mkuu wa mkoa akashangaa sana.[#27:12-14 Isa 53:7; Mat 26:63; Luka 23:9; Yoh 19:19.]

Yesu anapewa hukumu ya kifo

¹⁵Ilikuwa kawaida wakati wa sikukuu ya Pasaka mkuu wa mkoa kuwafungulia Wayahudi mfungwa mmoja waliyemtaka.

¹⁶Wakati huo kulikuwa na mfungwa aliyejulikana sana, jina lake Baraba.[#27:16 Hati nyingine za kale zina jina “Yesu” kabla ya jina Baraba kama ilivyo katika aya ifuatayo.]

¹⁷Hivyo, watu walipokusanyika pamoja, Pilato akawauliza, “Mwataka nimfungue yupi kati ya wawili hawa, Baraba ama Yesu aitwaye Kristo?”

¹⁸Alisema hivyo maana alijua wazi kwamba walimleta kwake kwa sababu ya wivu.

¹⁹Pilato alipokuwa amekaa katika kiti cha hukumu, mke wake akampelekea ujumbe: “Usijitie katika shauri la mtu huyu mwema, maana leo nimeteseka sana katika ndoto kwa sababu yake.”

²⁰Lakini makuhani wakuu na wazee wakawashawishi watu waombe Baraba afunguliwe na Yesu auawe.

²¹Mkuu wa mkoa akawauliza, “Ni yupi kati ya hawa wawili mnayetaka nimfungue?” Wakamjibu, “Baraba!”

²²Pilato akawauliza, “Sasa, nifanye nini na Yesu aitwaye Kristo?” Wote wakasema, “Asulubiwe!”

²³Pilato akauliza, “Kwa nini? Amefanya ubaya gani?” Wao wakazidi kupaza sauti: “Asulubiwe!”

²⁴Basi, Pilato alipotambua kwamba hafanikiwi chochote na kwamba maasi yalikuwa yanaanza, alichukua maji, akanawa mikono mbele ya ule umati wa watu, akasema, “Mimi sina lawama juu ya kifo cha mtu huyu; shauri lenu wenyewe.”[#27:24 Kama ishara ya kutokuwa na hatia (Kumb 21:6-9; Zab 26:6).]

²⁵Watu wote wakasema, “Damu yake na iwe juu yetu na juu ya watoto wetu!”[#27:25 Yaani wako tayari kulaumiwa kutokana na kifo hicho (taz 2Sam 1:13-16; 3:29; Yer 51:35 n.k. kuhusu namna hii ya kusema).]

²⁶Hapo Pilato akawafungulia Baraba kutoka gerezani, na baada ya kumpiga Yesu mijeledi, akamtoa asulubiwe.

Askari wanamdhihaki Yesu

²⁷Kisha askari wa mkuu wa mkoa wakamwingiza Yesu ndani ya ikulu, wakamkusanyikia kikosi kizima.

²⁸Wakamvua nguo zake, wakamvika joho la rangi nyekundu.

²⁹Kisha wakasokota taji ya miiba, wakamvika kichwani, wakamwekea pia mwanzi katika mkono wake wa kulia. Wakapiga magoti mbele yake, wakamdhihaki wakisema, “Shikamoo mfalme wa Wayahudi!”

³⁰Wakamtemea mate, wakauchukua ule mwanzi, wakampiga nao kichwani.

³¹Baada ya kumdhihaki, wakamvua lile joho, wakamvika nguo zake, kisha wakampeleka kumsulubisha.

Yesu anasulubiwa

³²Walipokuwa wakienda, wakamkuta mtu mmoja jina lake Simoni, mwenyeji wa Kurene, wakamlazimisha kuuchukua msalaba wake Yesu.[#27:32 Mji uliopo pwani ya Afrika Kaskazini.; #27:32-56 Mwandishi anarudiarudia yaliyomo katika Zab 22 na Zaburi nyingine ambazo aliziona kuwa zenye ujumbe wa kinabii kuhusu kifo cha Yesu.]

³³Walipofika mahali paitwapo Golgotha, maana yake, mahali pa Fuvu la Kichwa,[#27:33 Labda paliitwa hivyo kwa sababu palikuwa kilima ambacho kilionekana hivyo.]

³⁴wakampa mchanganyiko wa divai na kitu kichungu. Lakini Yesu alipoonja akakataa kunywa.[#27:34 Zab 69:21.]

³⁵Walimsulubisha, kisha wakagawana mavazi yake kwa kuyapigia kura.[#27:35 Maneno yanayokumbusha Zab 22:18.]

³⁶Wakaketi, wakawa wanamchunga.

³⁷Juu ya kichwa chake wakaweka shtaka dhidi yake lililoandikwa, “Huyu ni Yesu, Mfalme wa Wayahudi.”[#27:37 Ilikuwa kawaida kutangaza hadharani kosa la mtu aliyehukumiwa kuuawa. Katika kisa hiki cha Yesu, ilani hiyo aliyowekewa inaonekana kuwa ya uhaini kwani inaonesha au kuwafanya watu wafikiri alijitakia kuwa mfalme.]

³⁸Wanyang'anyi wawili walisulubiwa pia pamoja naye, mmoja upande wa kushoto na mwingine upande wa kulia.

³⁹Watu waliokuwa wanapita mahali hapo walimtukana wakitikisa vichwa vyao na kusema,[#27:39 Mwandishi anatumia picha ya Zab 22:7; rejea Zab 109:25.]

⁴⁰“Wewe! Si ulijidai kulivunja hekalu na kulijenga kwa siku tatu? Sasa jiokoe mwenyewe. Kama wewe ni Mwana wa Mungu, basi, shuka msalabani!”

⁴¹Hali kadhalika na makuhani wakuu pamoja na waalimu wa sheria na wazee walimdhihaki wakisema,

⁴²“Aliwaokoa wengine, lakini kujiokoa mwenyewe hawezi! Ati yeye ni mfalme wa Wayahudi! Basi, sasa na ashuke msalabani, nasi tutamwamini.

⁴³Alimtumainia Mungu na kusema ati yeye ni Mwana wa Mungu; basi, Mungu na amwokoe kama anamtaka.”[#27:43 Maneno haya yamekaririwa kutoka Zab 22:8.]

⁴⁴Hali kadhalika na wale waliosulubiwa pamoja naye wakamtukana.

Yesu anakufa msalabani

⁴⁵Tangu saa sita mchana mpaka saa tisa, giza likaikumba nchi yote.

⁴⁶Mnamo saa tisa Yesu akalia kwa sauti kubwa, “Eli, Eli, lema sabakthani?” Maana yake, “Mungu wangu, Mungu wangu, mbona umeniacha?”[#27:46 Maneno ya kwanza ya Zab 22:1. “Eli” ni Kiebrania maana yake “Mungu wangu”; na “lema sabakthani” ni Kiaramu, maana yake “Mbona umeniacha”.]

⁴⁷Lakini wale waliosimama pale waliposikia hivyo wakasema, “Anamwita Elia.”[#27:47 Wayahudi walitumaini kurudi kwa nabii Elia na waliamini kwamba Elia angekuja kuwasaidia wanaoteseka (rejea aya 49). Taz Mat 16:14 maelezo.]

⁴⁸Mmoja wao akakimbia, akachukua sifongo, akaichovya katika siki, akaiweka juu ya mwanzi, akampa anywe.[#27:48 Kitendo ambacho kinakumbusha Zab 69:21.]

⁴⁹Wengine wakasema, “Acha tuone kama Elia anakuja kumwokoa.”

⁵⁰Basi, Yesu akalia tena kwa sauti kubwa, akakata roho.

⁵¹Hapo pazia la hekalu likapasuka vipande viwili, toka juu mpaka chini; nchi ikatetemeka; miamba ikapasuka;[#27:51 Tukio hili la kupasuka pazia la hekalu, kulingana na Ebr 9:19; 9:3-12; 10:19-20, limefafanuliwa kama ishara ya uhuru wa kumwendea Mungu sasa bila kizuizi kwa njia ya kifo chake Yesu Kristo.]

⁵²makaburi yakafunguka na watu wengi wa Mungu waliokufa wakafufuliwa;

⁵³nao, baada ya kufufuka kwake, wakatoka makaburini, wakaingia katika mji mtakatifu, wakaonekana na watu wengi.

⁵⁴Basi, jemadari na wale waliokuwa wakimlinda Yesu walipoona tetemeko la ardhi na yale mambo yaliyotukia, wakaogopa sana, wakasema, “Hakika mtu huyu alikuwa Mwana wa Mungu.”

⁵⁵Mahali hapo walikuwapo wanawake wengi wakitazama kwa mbali. Hao ndio wale waliomfuata Yesu kutoka Galilaya wakimtumikia.[#27:55 Yaani tangu wakati ule Yesu alipoanza mahubiri yake kule Galilaya (rejea Luka 8:1-3).; #27:55-56 Luka 8:2 maelezo.]

⁵⁶Miongoni mwao walikuwa Maria Magdalene, Maria mama yao Yakobo na Yosefu, pamoja na mama yao wana wa Zebedayo.[#27:56 Rejea Mat 4:21 na taz 20:20 maelezo. Kuhusu watu wengine wanaotajwa hapa taz maelezo katika Marko 15:40.]

Kuzikwa kwake Yesu

⁵⁷Ilipokuwa jioni, akaja mtu mmoja tajiri mwenyeji wa Arimathaya, jina lake Yosefu. Yeye pia alikuwa mwanafunzi wa Yesu.

⁵⁸Akamwendea Pilato, akaomba apewe mwili wa Yesu. Basi, Pilato akaamuru apewe.

⁵⁹Yosefu akauchukua ule mwili, akauzungushia sanda safi ya kitani,

⁶⁰akauweka ndani ya kaburi lake jipya alilokuwa amelichonga katika mwamba. Kisha akavingirisha jiwe kubwa mbele ya mlango wa kaburi, akaenda zake.[#27:60 Wayahudi wengine walikuwa na desturi ya kuzika maiti wao kwenye nafasi zilizochongwa miambani kisha wakafunika kwa jiwe kubwa la mviringo ambalo waliliviringishia kwenye mahali pa kuingia.]

⁶¹Maria Magdalene na yule Maria mwingine walikuwa wameketi kulielekea kaburi.[#27:61 Yahusu wale Maria wawili wa aya ya 56.]

Kaburi linalindwa

⁶²Kesho yake, yaani siku iliyofuata ile ya Maandalio, makuhani wakuu na Mafarisayo walimwendea Pilato,[#27:62 Yaani siku ya Ijumaa ambayo iliitwa hivyo kwa kuwa Wayahudi walijitayarisha kuadhimisha siku iliyofuata ya Sabato.]

⁶³Wakasema, “Mheshimiwa, tunakumbuka kwamba yule mdanganyifu alisema kabla ya kufa ati, ‘Baada ya siku tatu nitafufuka.’[#27:63 16:21; 17:23; 20:19; Marko 8:31; 9:31; 10:33-34; Luka 9:22; 18:31-33.]

⁶⁴Kwa hiyo amuru kaburi lilindwe mpaka siku ya tatu ili wanafunzi wake wasije wakamwiba na kuwaambia watu kwamba amefufuka. Uongo huu wa mwisho utakuwa mbaya zaidi kuliko ule wa awali.”

⁶⁵Pilato akawaambia, “Haya, mnao walinzi; nendeni mkalinde kadiri mjuavyo.”

⁶⁶Basi, wakaenda, wakalilinda kaburi, wakatia mhuri juu ya lile jiwe na kuacha hapo askari walinzi.