Zaburi 10

Sala kwa ajili ya haki

¹Kwa nini, Ee Bwana , unasimama mbali?

Kwa nini unajificha wakati wa shida?

²Katika kiburi chake, mwovu humtesa maskini,

waovu na wanaswe katika hila wanazozitunga.

³Hujivunia tamaa za moyo wake;

humbariki mlafi na kumtukana Bwana .

⁴Katika kiburi chake, mwovu hamtafuti Mungu,

katika mawazo yake yote

hakuna nafasi ya Mungu.

⁵Njia zake daima hufanikiwa;

hujivuna na amri zako ziko mbali naye,

huwacheka kwa dharau adui zake wote.

⁶Anajisemea mwenyewe, “Hakuna kitakachonitikisa,

daima nitakuwa na furaha,

kamwe sitakuwa na shida.”

⁷Kinywa chake kimejaa laana, uongo na vitisho;

shida na ubaya viko chini ya ulimi wake.

⁸Huvizia karibu na vijiji;

kutoka mafichoni huwanasa wasio na hatia,

akivizia wapitaji.

⁹Huvizia kama simba aliye mawindoni;

huvizia kumkamata mnyonge,

huwakamata wanyonge na kuwaburuza

katika wavu wake.

¹⁰Mateka wake hupondwa, huzimia;

wanaanguka katika nguvu zake.

¹¹Anajisemea mwenyewe, “Mungu amesahau,

huficha uso wake na haoni kabisa.”

¹²Inuka Bwana ! Inua mkono wako, Ee Mungu.

Usiwasahau wanyonge.

¹³Kwa nini mtu mwovu anamtukana Mungu?

Kwa nini anajiambia mwenyewe,

“Hataniita nitoe hesabu”?

¹⁴Lakini wewe, Ee Mungu, unaona shida na huzuni,

umekubali kuyapokea mkononi mwako.

Mhanga anajisalimisha kwako,

wewe ni msaada wa yatima.

¹⁵Vunja mkono wa mtu mbaya na mwovu;

mwite mtu mbaya atoe hesabu ya uovu wake

ambao usingejulikana vinginevyo.

¹⁶Bwana ni Mfalme milele na milele,

mataifa wataangamia watoke nchini mwake.

¹⁷Unasikia, Ee Bwana , shauku ya wanaoonewa;

wewe huwatia moyo, na kusikiliza kilio chao,

¹⁸ukiwatetea yatima na waliodhulumiwa,

ili mwanadamu ambaye ni udongo asiogopeshe tena.