Zaburi 132

Maskani ya Mungu ya milele huko Sayuni

¹Ee Mwenyezi Mungu, mkumbuke Daudi

na taabu zote alizozistahimili.

²Aliapa kiapo kwa Mwenyezi Mungu

na akaweka nadhiri kwa Yule Mwenye Nguvu wa Yakobo:

³“Sitaingia nyumbani mwangu

au kwenda kitandani mwangu:

⁴sitaruhusu usingizi katika macho yangu,

wala kope zangu kusinzia,

⁵hadi nitakapompatia Mwenyezi Mungu mahali,

makao kwa ajili ya Yule Mwenye Nguvu wa Yakobo.”

⁶Tulisikia habari hii huko Efrata,

tulikutana nayo katika mashamba ya Yaara:

⁷“Twendeni kwenye makao yake,

na tuabudu kwenye kiti cha kuwekea miguu yake;

⁸inuka, Ee Mwenyezi Mungu, uje mahali pako pa kupumzikia,

wewe na Sanduku la nguvu zako.

⁹Makuhani wako na wavikwe haki,

watakatifu wako na waimbe kwa furaha.”

¹⁰Kwa ajili ya Daudi mtumishi wako,

usimkatae mpakwa mafuta wako.

¹¹Mwenyezi Mungu alimwapia Daudi kiapo,

kiapo cha uhakika ambacho hatakitangua:

“Nitamweka mmoja wa wazao wako mwenyewe

kwenye kiti chako cha ufalme,

¹²kama wanao watashika agano langu

na sheria ninazowafundisha,

ndipo wana wao watakalia kiti chako cha ufalme

milele na milele.”

¹³Kwa maana Mwenyezi Mungu ameichagua Sayuni,

amepaonea shauku pawe maskani yake:

¹⁴“Hapa ni mahali pangu pa kupumzika milele na milele;

hapa ndipo nitakapoketi nikitawala,

kwa sababu nimepaonea shauku:

¹⁵Nitambariki kwa kumpa mahitaji tele:

nitashibisha maskini wake kwa chakula.

¹⁶Nitawavika makuhani wake wokovu,

nao watakatifu wake watadumu wakiimba kwa furaha.

¹⁷“Hapa nitamchipushia Daudi pembe,[#132:17 pembe inawakilisha nguvu]

na kuweka taa kwa ajili ya masiya wangu.

¹⁸Adui zake nitawavika aibu,

bali taji kichwani pake litang’aa sana.”