Zaburi 27

Sala ya kusifu

¹Bwana ni nuru yangu na wokovu wangu,

nimwogope nani?

Bwana ni ngome ya uzima wangu,

nimhofu nani?

²Waovu watakaposogea dhidi yangu

ili wale nyama yangu,

adui zangu na watesi wangu watakaponishambulia,

watajikwaa na kuanguka.

³Hata jeshi linizingire pande zote,

moyo wangu hautaogopa;

hata vita vitokee dhidi yangu,

hata hapo nitakuwa na ujasiri.

⁴Jambo moja ninamwomba Bwana ,

hili ndilo ninalolitafuta:

niweze kukaa nyumbani mwa Bwana

siku zote za maisha yangu,

niutazame uzuri wa Bwana

na kumtafuta hekaluni mwake.

⁵Kwa kuwa siku ya shida,

atanihifadhi salama katika maskani yake,

atanificha uvulini mwa hema lake,

na kuniweka juu kwenye mwamba.

⁶Kisha kichwa changu kitainuliwa

juu ya adui zangu wanaonizunguka.

Katika maskani yake nitatoa dhabihu kwa kelele za shangwe;

nitamwimbia Bwana na kumsifu.

⁷Isikie sauti yangu nikuitapo, Ee Bwana ,

unihurumie na unijibu.

⁸Moyo wangu unasema kuhusu wewe,

“Utafute uso wake!”

Uso wako, Bwana “Nitautafuta.”

⁹Usinifiche uso wako,

usimkatae mtumishi wako kwa hasira;

wewe umekuwa msaada wangu.

Usinikatae wala usiniache,

Ee Mungu Mwokozi wangu.

¹⁰Hata baba yangu na mama yangu wakiniacha,

Bwana atanipokea.

¹¹Nifundishe njia yako, Ee Bwana ,

niongoze katika njia iliyo nyoofu,

kwa sababu ya watesi wangu.

¹²Usiniachilie kwa nia za adui zangu,

kwa maana mashahidi wa uongo

wameinuka dhidi yangu,

wakipumua ujeuri.

¹³Nami bado nina tumaini hili:

nitauona wema wa Bwana

katika nchi ya walio hai.

¹⁴Mngojee Bwana ;

uwe hodari na mwenye moyo mkuu,

na umngojee Bwana .