Zaburi 31

Maombi na sifa kwa kuokolewa kutoka kwa adui

¹Ee Bwana , nimekukimbilia wewe,

usiache nikaaibika kamwe,

kwa haki yako uniokoe.

²Nitegee sikio lako,

uje uniokoe haraka;

uwe kwangu mwamba wa kimbilio,

ngome imara ya kuniokoa.

³Kwa kuwa wewe ni mwamba wangu na ngome yangu,

uniongoze na kunilinda kwa ajili ya jina lako.

⁴Uniepushe na mtego niliotegewa,

maana wewe ndiwe kimbilio langu.

⁵Ninaikabidhi roho yangu mikononi mwako,

unikomboe Ee Bwana , uliye Mungu wa kweli.

⁶Ninawachukia wale wanaoshikilia sanamu batili;

bali mimi ninamtumaini Bwana .

⁷Nitafurahia na kushangilia upendo wako,

kwa kuwa uliona mateso yangu

na ulijua maumivu ya nafsi yangu.

⁸Hukunikabidhi kwa adui yangu

bali umeiweka miguu yangu mahali penye nafasi.

⁹Ee Bwana unihurumie, kwa kuwa niko kwenye shida;

macho yangu yanafifia kwa huzuni,

nafsi yangu na mwili wangu kwa sikitiko.

¹⁰Maisha yangu yamedhoofika kwa majonzi,

naam, miaka yangu kwa kulia kwa maumivu makali;

nguvu zangu zinaisha kwa ajili ya mateso,

na mifupa yangu inachakaa.

¹¹Kwa sababu ya adui zangu wote,

nimedharauliwa kabisa na majirani zangu,

hata kwa rafiki zangu nimekuwa tisho,

wale wanaoniona barabarani wananikimbia.

¹²Nimesahaulika miongoni mwao kama mtu aliyekufa,

nimekuwa kama chombo cha mfinyanzi kilichovunjika.

¹³Kwa maana nimesikia maneno niliyosingiziwa na wengi;

vitisho viko pande zote;

kwa kuwa wamefanya mashauri dhidi yangu,

na kula njama kuniua.

¹⁴Lakini mimi ninakutumaini wewe peke yako, Ee Bwana ;

nimesema, “Wewe ndiwe Mungu wangu.”

¹⁵Siku za maisha yangu ziko mikononi mwako,

uniokoe mikononi mwa adui zangu

na wale wanifuatiao.

¹⁶Mwangazie mtumishi wako uso wako,

uniokoe kwa ajili ya upendo wako usiokoma.

¹⁷Usiniache niaibike, Ee Bwana ,

kwa maana nimekulilia wewe,

bali waovu waaibishwe

na kunyamazishwa Kuzimu.

¹⁸Midomo yao isemayo uongo na inyamazishwe,

kwa maana kwa kiburi na dharau

wao husema kwa majivuno

dhidi ya wenye haki.

¹⁹Tazama jinsi wema wako ulivyo mkuu,

uliowawekea akiba wanaokucha,

unaowapa wale wanaokukimbilia

machoni pa watu wote.

²⁰Unawahifadhi katika uvuli wa uwepo wako

kutokana na hila za wanadamu;

katika makao yako huwaweka salama

kutokana na ndimi za mashtaka.

²¹Atukuzwe Bwana ,

kwa kuwa amenionesha upendo wake wa ajabu

nilipokuwa katika mji uliozingirwa.

²²Katika hofu yangu nilisema,

“Nimekatiliwa mbali na macho yako!”

Hata hivyo ulisikia kilio changu

ukanihurumia nilipokuita unisaidie.

²³Mpendeni Bwana ninyi watakatifu wake wote!

Bwana huwahifadhi waaminifu,

lakini wenye kiburi huwalipiza kikamilifu.

²⁴Kuweni hodari na mjipe moyo,

ninyi nyote mnaomtumaini Bwana .