Zaburi 39

Maombi ya mtu mwenye uchungu

¹Nilisema, “Nitaziangalia njia zangu

na kuuzuia ulimi wangu usije ukatenda dhambi;

nitaweka lijamu kinywani mwangu

wakati wote waovu wanapokuwa karibu nami.”

²Lakini niliponyamaza na kutulia,

hata pasipo kusema lolote jema,

uchungu wangu uliongezeka.

³Moyo wangu ulipata moto ndani yangu,

nilipotafakari, moto uliwaka,

ndipo nikasema kwa ulimi wangu:

⁴“Ee Bwana , nijulishe mwisho wa maisha yangu

na hesabu ya siku zangu;

nijalie kujua jinsi maisha yangu

yanavyopita upesi.

⁵Umefanya maisha yangu mafupi kama nyanda;

muda wangu wa kuishi ni kama

hauna thamani kwako.

Maisha ya kila mwanadamu

ni kama pumzi.

⁶Hakika kila binadamu ni kama njozi

aendapo huku na huko:

hujishughulisha na mengi, lakini ni ubatili;

anakusanya mali nyingi,

wala hajui ni nani atakayejifaidi nayo.

⁷“Lakini sasa Bwana, nitafute nini?

Tumaini langu ni kwako.

⁸Niokoe kutoka makosa yangu yote,

usinifanye kuwa dhihaka ya wapumbavu.

⁹Nilinyamaza, sikufumbua kinywa changu,

kwa sababu wewe ndiwe uliyetenda hili.

¹⁰Niondolee mjeledi wako,

nimeshindwa kwa mapigo ya mkono wako.

¹¹Unakemea na kuadhibu wanadamu

kwa ajili ya dhambi zao;

unaharibu utajiri wao kama nondo aharibuvyo:

kila mwanadamu ni kama pumzi tu.

¹²“Ee Bwana , usikie maombi yangu,

usikie kilio changu unisaidie,

usiwe kiziwi kwa kulia kwangu.

Kwani mimi ninaishi na wewe kama mgeni,

mhamiaji, kama walivyokuwa baba zangu wote,

¹³Tazama mbali nami, ili niweze kufurahi tena

kabla sijaondoka na nisiwepo tena.”