Zaburi 56

Kumtumaini Mungu

¹Ee Mungu unihurumie, maana watu wananifuatia vikali;

mchana kutwa wanazidisha mashambulizi yao.

²Wasingiziaji wangu wananifuatia mchana kutwa,

wengi wananishambulia kwa kiburi chao.

³Wakati ninaogopa,

nitakutumaini wewe.

⁴Katika Mungu, ambaye neno lake ninalisifu,

katika Mungu ninatumaini, sitaogopa.

Mwanadamu mwenye kufa

atanitenda nini?

⁵Mchana kutwa wanayageuza maneno yangu,

siku zote wanapanga njama za kunidhuru.

⁶Wananifanyia hila, wanajificha,

wanatazama hatua zangu,

wakiwa na shauku ya kuutoa uhai wangu.

⁷Wasiepuke kwa vyovyote,

Ee Mungu, katika hasira yako yaangushe mataifa.

⁸Andika maombolezo yangu;

andika machozi yangu katika kitabu chako:

je, haya hayapo katika kumbukumbu zako?

⁹Ndipo adui zangu watarudi nyuma

ninapoita msaada.

Kwa hili nitajua kwamba Mungu

yuko upande wangu.

¹⁰Katika Mungu, ambaye neno lake ninalisifu,

katika Bwana , ambaye neno lake ninalisifu,

¹¹katika Mungu ninatumaini, sitaogopa.

Mwanadamu anaweza kunitenda nini?

¹²Ee Mungu, nina nadhiri kwako,

nitakutolea wewe sadaka zangu za shukrani.

¹³Kwa kuwa umeniokoa toka kwenye mauti

na miguu yangu kwenye kujikwaa,

ili niweze kuenenda mbele za Mungu

katika nuru ya uzima.