Zaburi 64

Kuomba ulinzi dhidi ya adui

¹Ee Mungu, unisikie ninapoeleza lalamiko langu,

uyahifadhi maisha yangu kutokana na vitisho vya adui.

²Unifiche kutokana na njama za waovu,

kutokana na fitina za kundi la watenda maovu.

³Wananoa ndimi zao kama panga

na kuelekeza maneno yao kama mishale ya kufisha.

⁴Hurusha mishale kutoka mavizio kwa mtu asiye na hatia,

humrushia ghafula bila woga.

⁵Kila mmoja humtia moyo mwenzake

katika mipango mibaya;

huzungumza kuhusu kuficha mitego yao,

nao husema, “Ni nani ataiona?”

⁶Hupanga njama la dhuluma na kusema,

“Tumebuni mpango mkamilifu!”

Hakika nia na moyo wa mwanadamu vina hila.

⁷Bali Mungu atawapiga kwa mishale,

nao ghafula wataangushwa.

⁸Atageuza ndimi zao wenyewe dhidi yao

na kuwaleta kwenye maangamizi;

wote wawaonao watatikisa vichwa vyao

kwa dharau.

⁹Wanadamu wote wataogopa,

watatangaza kazi za Mungu

na kutafakari yale aliyoyatenda.

¹⁰Wenye haki na wafurahi katika Bwana ,

na wakimbilie kwake;

wanyofu wote wa moyo na wamsifu yeye!