Zaburi 72

Maombi kwa ajili ya mfalme

¹Ee Mungu, mjalie mfalme aamue kwa haki yako,

mwana wa mfalme kwa haki yako.

²Atawaamua watu wako kwa haki,

watu wako walioonewa kwa haki.

³Milima italeta mafanikio kwa watu,

vilima tunda la haki.

⁴Atawatetea walioonewa miongoni mwa watu

na atawaokoa watoto wa wahitaji,

ataponda mdhalimu.

⁵Atadumu kama jua linavyodumu, kama mwezi, vizazi vyote.

⁶Atakuwa kama mvua inavyonyesha juu ya shamba lililofyekwa,

kama manyunyu yanavyonyeshea ardhi.

⁷Katika siku zake wenye haki watastawi;

mafanikio yatakuwepo hadi mwezi utakapokoma.

⁸Atatawala kutoka bahari hadi bahari

na kutoka Mto hadi miisho ya dunia.

⁹Makabila ya jangwani watamsujudia,

na adui zake wataramba mavumbi.

¹⁰Wafalme wa Tarshishi na wa pwani za mbali

watamletea ushuru;

wafalme wa Sheba na Seba

watampa zawadi.

¹¹Wafalme wote watamsujudia

na mataifa yote yatamtumikia.

¹²Kwa maana atamwokoa mhitaji anayemlilia,

aliyeonewa asiye na wa kumsaidia.

¹³Atawahurumia wanyonge na wahitaji

na kuwaokoa wahitaji kutoka mauti.

¹⁴Atawaokoa kutoka uonevu na ukatili,

kwani damu yao ni ya thamani machoni pake.

¹⁵Aishi maisha marefu!

Na apewe dhahabu ya Sheba.

Watu wamwombee daima

na kumbariki mchana kutwa.

¹⁶Nafaka ijae tele katika nchi yote,

juu ya vilele vya vilima na istawi.

Tunda lake na listawi kama Lebanoni,

listawi kama majani ya kondeni.

¹⁷Jina lake na lidumu milele,

na lidumu kama jua.

Mataifa yote yatabarikiwa kupitia kwake,

nao watamwita aliyebarikiwa.

¹⁸Ahimidiwe Bwana Mungu, Mungu wa Israeli,

ambaye peke yake hutenda mambo ya ajabu.

¹⁹Jina lake tukufu lihimidiwe milele,

ulimwengu wote ujae utukufu wake.

²⁰Huu ndio mwisho wa maombi ya Daudi mwana wa Yese.