Zaburi 94

Mungu, Mlipiza kisasi kwa ajili ya wenye haki

¹Ee Bwana , ulipizaye kisasi,

Ee Mungu ulipizaye kisasi, uangaze sasa.

²Ee Mhukumu wa dunia, inuka,

uwalipize wenye kiburi kama wanavyostahili.

³Ee Bwana , hadi lini waovu,

hadi lini waovu watashangilia?

⁴Wanamimina maneno ya kiburi,

watenda maovu wote wamejaa majivuno.

⁵Ee Bwana , wanawaponda watu wako;

wanawatesa walio urithi wako.

⁶Wanamchinja mjane na mgeni,

na kuwaua yatima.

⁷Nao husema, “Bwana haoni,

Mungu wa Yakobo hafahamu.”

⁸Sikizeni, enyi wajinga miongoni mwa watu;

enyi wapumbavu, lini mtakuwa na hekima?

⁹Je, aliyeweka sikio asisikie?

Aliyeumba jicho asione?

¹⁰Je, anayeadhibisha mataifa asiadhibu?

Je, awafundishaye wanadamu asiwe na maarifa?

¹¹Bwana anajua mawazo ya mwanadamu;

anajua kwamba ni ubatili.

¹²Ee Bwana , heri mtu anayeadhibishwa na wewe,

mtu unayemfundisha kwa sheria yako,

¹³unampa utulivu siku za shida,

hadi shimo litakapokuwa limechimbwa

kwa ajili ya mwovu.

¹⁴Kwa kuwa Bwana hatawakataa watu wake,

hatauacha urithi wake.

¹⁵Hukumu itasimamishwa tena kwenye haki,

wote walio na mioyo minyofu wataifuata.

¹⁶Ni nani atakayeinuka dhidi ya mwovu kwa ajili yangu?

Ni nani atakayenikinga dhidi ya watenda maovu?

¹⁷Kama Bwana hangenisaidia upesi,

ningeishi katika kimya cha kifo.

¹⁸Niliposema, “Mguu wangu unateleza,”

Ee Bwana , upendo wako ulinishikilia.

¹⁹Wasiwasi ulipokuwa mwingi ndani yangu,

faraja yako ilinipa furaha nafsini mwangu.

²⁰Je, kiti cha utawala wa udhalimu kitajiunga nawe,

ule utawala uletao taabu kutokana na sheria zake?

²¹Huungana kuwashambulia wenye haki,

kuwahukumu kufa wasio na hatia.

²²Lakini Bwana amekuwa ngome yangu,

na Mungu wangu amekuwa mwamba ninaoukimbilia.

²³Yeye atawalipa kwa ajili ya dhambi zao

na atawaangamiza kwa ajili ya maovu yao;

Bwana Mungu wetu atawaangamiza.