Bwana anaahidi kuibariki Yerusalemu

¹Neno la Bwana wa majeshi likanijia tena.

²Hili ndilo asemalo Bwana wa majeshi: “Nina wivu sana kwa ajili ya Sayuni, ninawaka wivu kwa ajili yake.”

³Hili ndilo asemalo Bwana : “Nitarudi Sayuni na kufanya makao Yerusalemu. Kisha Yerusalemu utaitwa mji wa kweli, mlima wa Bwana wa majeshi utaitwa Mlima Mtakatifu.”

⁴Hili ndilo asemalo Bwana wa majeshi: “Kwa mara nyingine tena wanaume na wanawake walioshiba umri wataketi katika barabara za Yerusalemu, kila mmoja akiwa na mkongojo wake mkononi kwa sababu ya umri wake.

⁵Barabara za mji zitajaa wavulana na wasichana wanaocheza humo.”

⁶Hili ndilo asemalo Bwana wa majeshi: “Mambo haya yanaweza kuonekana ya ajabu kwa mabaki ya watu wakati huo, lakini yaweza kuwa ya ajabu kwangu?” asema Bwana wa majeshi.

⁷Hili ndilo asemalo Bwana wa majeshi: “Nitawaokoa watu wangu kutoka nchi za mashariki na magharibi.

⁸Nitawarudisha waje kuishi Yerusalemu, watakuwa watu wangu nami nitakuwa mwaminifu na wa haki kwao kama Mungu wao.”

⁹Hili ndilo asemalo Bwana wa majeshi: “Ninyi ambao sasa mnasikia maneno haya yanayozungumzwa na manabii ambao walikuwepo wakati wa kuwekwa kwa msingi wa nyumba ya Bwana wa majeshi, mikono yenu na iwe na nguvu ili Hekalu liweze kujengwa.

¹⁰Kabla ya wakati huo, hapakuwa na ujira kwa mtu wala mnyama. Hakuna mtu aliyeweza kufanya shughuli yake kwa usalama kwa sababu ya adui yake, kwa kuwa nilikuwa nimemfanya kila mtu adui wa jirani yake.

¹¹Lakini sasa sitawatendea mabaki ya watu hawa kama nilivyowatenda zamani,” asema Bwana wa majeshi.

¹²“Mbegu itakua vizuri, mzabibu utazaa matunda yake, ardhi itatoa mazao yake, na mbingu zitadondosha umande wake. Vitu hivi vyote nitawapa mabaki ya watu kama urithi wao.

¹³Jinsi mlivyokuwa kitu cha laana katikati ya mataifa, ee Yuda na Israeli, ndivyo nitakavyowaokoa, nanyi mtakuwa baraka. Msiogope, bali iacheni mikono yenu iwe na nguvu.”

¹⁴Hili ndilo asemalo Bwana wa majeshi: “Kama nilivyokuwa nimekusudia kuleta maangamizi juu yenu, wakati baba zenu waliponikasirisha na sikuonesha huruma,” asema Bwana wa majeshi,

¹⁵“hivyo sasa nimeazimia kufanya mema tena kwa Yerusalemu na Yuda. Msiogope.

¹⁶Haya ndio mtakayoyafanya: Semeni kweli kila mtu kwa mwenzake, na mtoe hukumu ya kweli na haki kwenye mahakama zenu,

¹⁷usipange mabaya dhidi ya jirani yako, wala msipende kuapa kwa uongo. Nayachukia haya yote,” asema Bwana .

¹⁸Neno la Bwana wa majeshi likanijia tena.

¹⁹Hili ndilo asemalo Bwana wa majeshi: “Saumu ya mwezi wa nne, ya mwezi wa tano, ya mwezi wa saba, na ya mwezi wa kumi zitakuwa sikukuu za furaha na za shangwe kwa Yuda. Kwa hiyo uipende kweli na amani.”

²⁰Hili ndilo asemalo Bwana wa majeshi: “Mataifa mengi na wakazi wa miji mingi watakuja,

²¹na wenyeji wa mji mmoja wataenda kwenye mji mwingine na kusema, ‘Twende mara moja na tukamsihi Bwana , na kumtafuta Bwana wa majeshi. Mimi mwenyewe ninaenda.’

²²Pia watu wa kabila nyingi na mataifa yenye nguvu yatakuja Yerusalemu kumtafuta Bwana wa majeshi na kumsihi.”

²³Hili ndilo asemalo Bwana wa majeshi: “Katika siku hizo watu kumi kutoka lugha zote na mataifa, watangʼangʼania upindo wa joho la Myahudi mmoja na kusema, ‘Twende pamoja nawe kwa sababu tumesikia kwamba Mungu yu pamoja nawe.’ ”