Hukumu dhidi ya Babuloni

¹“Teremka uketi mavumbini[#Taz Isa 13:1–14:23; Yer 50:1–51:64]

ewe Babuloni binti mzuri!

Keti chini pasipo kiti cha enzi

ewe binti wa Wakaldayo!

Tokea sasa hutaitwa tena mwororo wala nadhifu.

²Twaa mawe ya kusagia, usage unga kama mtumwa!

Vua utaji wako, ukavue na mavazi yako!

Pandishia vazi lako miguuni, ukavuke mito.

³Watu watauona uchi wako;

naam, wataiona aibu yako.

Mimi nitalipiza kisasi,

wala sitamhurumia yeyote.”

⁴Mkombozi wetu ndiye Mtakatifu wa Israeli;

Mwenyezi-Mungu wa majeshi ndilo jina lake.

⁵Mwenyezi-Mungu asema:

“Ewe taifa la Wakaldayo

lililo kama binti mzuri,

keti kimya na kutokomea gizani.

Maana umepoteza hadhi yako

ya kuwa bimkubwa wa falme.

⁶Niliwakasirikia watu wangu Israeli,

nikawafanya watu wangu kuwa haramu.

Niliwatia mikononi mwako,

nawe hukuwaonea huruma;

na wazee uliwatwisha nira nzito mno.

⁷Ulijisemea moyoni: ‘Nitakuwa malkia milele’,

nawe hukuyatafakari mambo yanayotokea,

wala kufikiri mwisho wake.

⁸“Sasa, basi, sikiliza ewe mpenda anasa,[#Taz Ufu 18:7-8]

wewe unayedhani kuwa u salama,

na kujisemea: ‘Ni mimi tu,

na hakuna mwingine isipokuwa mimi.

Kamwe sitakuwa mjane,

wala sitafiwa na wanangu.’

⁹Haya yote mawili yatakupata,

ghafla, katika siku moja:

Kupoteza watoto wako na kuwa mjane,

ijapokuwa una wingi wa uchawi wako,

na nguvu nyingi za uganga wako.

¹⁰“Ulijiona salama katika uovu wako;

ukajisemea, ‘Hakuna mtu anayeniona.’

Hekima na elimu yako vilikupotosha,

ukajisemea moyoni mwako, ‘Mimi ndiye;

hakuna mwingine anayenishinda.’

¹¹Lakini maafa yatakupata

ambayo hutaweza kujiepusha nayo.

Balaa litakukumba

ambalo hutaweza kulipinga;

maangamizi yatakujia ghafla

ambayo hujapata kamwe kuyaona.

¹²Endelea basi na uganga wako,

tegemea wingi wa uchawi wako.

Wewe uliyapania hayo tangu ujana wako

ukitumainia kwamba utafanikiwa

au kusababisha kitisho kwa watu!

¹³Wewe umejichosha bure na washauri wako.

Basi, na wajitokeze hao wanajimu wakuokoe!

Wao huzigawa mbingu sehemusehemu,

huzichunguza nyota

na kubashiri kila mwezi yatakayokupata.

¹⁴“Kumbuka, wao ni kama mabua makavu:

Moto utayateketezea mbali!

Hawawezi hata kujiokoa wenyewe

mbali na ukali wa moto huo.

Moto huo si wa kujipatia joto,

huo si moto wa kuota!

¹⁵Ndivyo watakavyokuwa hao uliowategemea hivyo,

hao uliojishughulisha nao tangu ujana wako.

Watatangatanga kila mmoja njia yake;

hakuna hata mmoja atakayeweza kukuokoa.”