Yeremia anafungwa na kupigwa.

¹Sedekia, mwana wa Yosia, akawa mfalme mahali pake Konia, mwana wa Yoyakimu, aliyemweka Nebukadinesari, mfalme wa Babeli, kuwa mfalme wa Yuda.[#2 Fal. 24:17.]

²Yeye na watumishi wake na watu wa nchi yake hawakuyasikia maneno ya Bwana, aliyoyasema kwa kumtumia mfumbuaji Yeremia.

³Mfalme Sedekia akamtuma Yukali, mwana wa Selemia, na Sefania, mwana wa mtambikaji Masea, kwenda kwa Yeremia kumwambia: Tuombee kwake Bwana Mungu wetu![#Yer. 42:2; Yes. 37:4.]

⁴Kwani Yeremia alikuwa akiingia, tena akitoka kwa watu, hawakumfunga katika nyumba ya kifungo.

⁵Ndipo, vikosi vya Farao vilipotoka Misri; Wakasidi waliousonga Yerusalemu walipousikia uvumi wao, wakaondoka hapo Yerusalemu.

⁶Neno la Bwana likamjia mfumbuaji Yeremia kwamba:

⁷Hivi ndivyo, Bwana Mungu wa Isiraeli anavyosema: Haya ndiyo, mmwambie mfalme wa Yuda aliyewatuma kwangu kuniuliza: Tazama! Vikosi vya Farao vilivyotoka kwao kuja kuwasaidia wamekwisha kurudi katika nchi yao ya Misri.

⁸Lakini Wakasidi watarudi, waupigie mji huu vita; nao watauteka na kuuteketeza kwa moto.

⁹Hivi ndivyo, Bwana anavyosema: Msijidanganye wenyewe na kusema: Wakasidi wataondoka kwetu kwenda zao! Kwani hawatakwenda.

¹⁰Kwani kama mngevipiga vikosi vyote vya Wakasidi wanaopigana nanyi, wakasalia kwao watu wenye vidonda tu, wangeinuka kila mtu katika hema lake, wauteketeze mji huu kwa moto.

¹¹Ikawa, vikosi vya Wakasidi vilipoondoka Yerusalemu kwa kuvikimbia vikosi vya Farao,

¹²ndipo, Yeremia naye alipotoka Yerusalemu kwenda katika nchi ya Benyamini, alichukue fungu lake lililoko kule kwa watu wa huko katikati.[#Yer. 32:9.]

¹³Alipofika penye lango la Benyamini, kulikuwako mkuu wa walinzi, jina lake Iria, mwana wa Selemia, mwana wa Hanania, akamkamata mfumbuaji Yeremia kwamba: Utawaangukia Wakasidi wewe!

¹⁴Yeremia akajibu: Ni uwongo! Mimi siwaangukii Wakasidi, lakini hakumsikia; ndipo, Iria alipomkamata Yeremia na kumpeleka kwa wakuu.

¹⁵Wakuu wakamtolea Yeremia ukali, wakampiga; kisha wakamtia kifungoni nyumbani mwa mwandishi Yonatani, kwani walikuwa wakiitumia kuwa nyumba ya kifungo.[#Yer. 20:2.]

¹⁶Hivi ndivyo, Yeremia alivyoingia katika ile nyumba yenye mashimo yaliyochimbuliwa upande wa ndani chini; ndimo, Yeremia alimokaa siku nyingi.

¹⁷Kisha mfalme Sedekia akatuma kumchukua; mfalme akamwuliza nyumbani mwake penye njama kwamba: Liko neno lililotoka kwa Bwana? Yeremia akasema: Liko; kisha akamwambia: Utatiwa mkononi mwa mfalme wa Babeli.[#Yer. 34:21.]

¹⁸Yeremia akamwuliza mfalme Sedekia: Nimekukosea nini au watumishi wako au watu wa ukoo huu, mkinitia kifungoni?

¹⁹Wako wapi wafumbuaji wenu waliowafumbulia kwamba: Mfalme wa Babeli hatafika kwenu wala katika nchi hii?

²⁰Sasa sikiliza, bwana wangu mfalme, nayo malalamiko yangu na yakuangukie usoni: Usinirudishe nyumbani mwa Yonatani, nisife mle!

²¹Mfalme Sedekia alipotoa amri, wakamfunga Yeremia tena uani penye kifungo, akapewa kila siku mkate wa ngano uliotoka huko, wachoma mikate wanakokaa, mpaka mikate ilipotoweka mjini. Ndivyo, Yeremia alivyopata kukaa uani penye kifungo.[#Yer. 32:2.]