Wachunguza nyota wa maawioni kwa jua

¹Yesu alipokwisha kuzaliwa Bet-Lehemu wa Uyuda wakati wa mfalme Herode, ndipo, walipofika Yerusalemu wachunguza nyota waliotoka upande wa maawioni kwa jua.[#Luk. 2:1-7.]

²Wakasema: Yuko wapi aliyezaliwa kuwa mfalme wa Wayuda? Kwani tumeiona nyota yake katika nchi ya maawioni kwa jua, basi, tumekuja kumwangukia.[#4 Mose 24:17; Yes. 60:6.]

³Mfalme Herode alipoyasikia haya akahangaika, nao Yerusalemu wote pamoja naye.

⁴Akawakusanya wote waliokuwa watambikaji wakuu na waandishi wa kwao akapeleleza kwao mahali, Kristo atakapozaliwa.

⁵Nao wakamwambia: Atazaliwa Beti-Lehemu wa Uyuda, kwani ndivyo, alivyoandika mfumbuaji:[#Mika 5:1; Yoh. 7:42.]

⁶Nawe Beti-Lehemu wa nchi ya Yuda,

hu mdogo kamwe katika majumbe ya Yuda.

Kwani mwako ndimo, atakamotoka mtawala

atakayewachunga walio ukoo wangu wa Isiraeli.

⁷Kisha Herode akawaita wale wachunguza nyota na kufichaficha, akazidi kuwauliza vema siku, ile nyota ilipooneka.

⁸Akawatuma Beti-Lehemu akisema: Nendeni, mkapeleleze sana habari za mtoto huyo! Mtakapomwona mnipashe habari, nami nipate kwenda nimwangukie.

⁹Nao walipokwisha msikia mfalme wakashika njia. Walipotazama, ile nyota, waliyoiona maawioni kwa jua, ikawatangulia, mpaka ikaja kusimama juu sawa ya mle alimokuwa yule mtoto.

¹⁰Walipoiona hiyo nyota wakafurahi furaha kubwa mno.

¹¹Wakaingia nyumbani mle, wakamwona mtoto pamoja na mama yake Maria, wakamwangukia na kumnyenyekea. Walipokwisha wakayafungua malimbiko yao, wakamtolea mtoto tunu, dhahabu na uvumba na manemane.[#Sh. 72:10,15; Yes. 60:6.]

¹²Nao walipoonywa kwa ndoto, wasimrudie Herode, wakashika njia nyingine, wakaenda kwao.*

Kukimbilia Misri.

¹³Hao walipokwisha kwenda zao, malaika wa Bwana akamtokea Yosefu katika ndoto akisema: Inuka, mchukue mtoto na mama yake, ukimbilie Misri, ukakae huko, mpaka nitakapokuambia! Kwani Herode atamtafuta mtoto, amwangamize.

¹⁴Kisha akainuka, akamchukua mtoto na mama yake usiku, akaenda Misri.

¹⁵Akakaa huko, mpaka Herode alipokwisha kufa, lipata kutimia neno, Bwana alilolisema kwa mfumbuaji:[#Hos. 11:1.]

Misri ndiko, nilikomwitia mwanangu.

Kuuawa kwa watoto.

¹⁶Herode alipoona, ya kuwa wale wachunguza nyota wamemdanganya akakasirika sana, akatuma watu, wawaue watoto waume wote waliokuwako Beti-Lehemu na vilimani pake pote, waliokuwa wa miaka miwili nao waliopungua, kama alivyoipeleleza siku kwao wachunguza nyota.

¹⁷Ndipo, lilipotimia lililosemwa na mfumbuaji Yeremia kwamba:[#Yer. 31:15.]

¹⁸Sauti imesikiwa Rama, ni kilio na maombolezo mengi.

Raheli anawalilia watoto wake, hakutaka kubembelezwa,

kwani hawako.

Kurudi.

¹⁹Herode alipokwisha kufa, mara malaika wa Bwana akamtokea Yosefu kwa ndoto huko Misri, akamwambia:

²⁰Inuka, umchukue mtoto na mama yake, uende katika nchi ya Isiraeli! Kwani wamekwisha kufa waliotafuta kumwua mtoto.[#2 Mose 4:19.]

²¹Ndipo, alipoinuka, akamchukua mtoto na mama yake, akaiingia nchi ya Isiraeli.

²²Lakini aliposikia, ya kuwa Arkelao ametawala Yudea mahali pa Herode, baba yake, akaogopa kwenda huko. Basi akaagizwa kwa ndoto, aende zake pande za Galilea;

²³kwa hiyo akaja, akakaa mji uitwao Nasareti, lipate kutimia lililosemwa na wafumbuaji:

Ataitwa Mnasareti.*