Mwongofu hupata mema, mpotovu hupata mabaya.

¹Mwana mwerevu wa kweli humfurahisha baba yake,

lakini mwana mpumbavu humpatia mama yake majonzi.

²Malimbiko yaliyopatwa kwa uovu hayafai kitu,

lakini wongofu huponya kufani.

³Bwana hatamwacha mwongofu, afe kwa njaa,

lakini tamaa zao wasiomcha huzikumba.

⁴Afanyaye kazi na kulegeza mikono hapati kitu,

lakini mikono yao wajihimizao hupata mali.

⁵Avunaye siku za kipupwe ni mwenye akili,

lakini alalaye siku za mavuno hujipatia soni.

⁶Mbaraka hukikalia kichwa cha mwongofu,

lakini vinywani mwao wasiomcha Mungu yamo makorofi.

⁷Ukumbuko wa mwongofu huleta mbaraka,

lakini majina yao wasiomcha Mungu huoza.

⁸Mwerevu wa moyo huonyeka,

lakini mjinga anayejisemea tu hujiangamiza.

⁹Aendeleaye pasipo kukosa huenda na kutulia,

lakini azipotoaye njia zake hujulikana.

¹⁰Akonyezaye kwa jicho hukasirisha,

naye mjinga anayejisemea tu hujiangamiza.

¹¹Kinywa cha mwongofu ni kisima cha uzima,

lakini vinywani mwao wasiomcha Mungu yamo makorofi.

¹²Uchukivu huleta magomvi,

lakini upendo huyafunika makosa yote.

¹³Midomoni mwake mtambuzi huoneka werevu wa kweli,

lakini apotelewaye na akili hupaswa na fimbo mgongoni.

¹⁴Werevu wa kweli hulimbika ujuzi,

lakini kinywa chake mjinga ni mwangamizo ulio karibu.

¹⁵Mali zake mkwasi ni boma lake lenye nguvu,

lakini ukosefu wao wanyonge kuwalegeza mioyo.

¹⁶Kazi yake mwongofu humwelekeza penye uzima,

lakini mapato yake asiyemcha Mungu humkosesha.

¹⁷Aangaliaye akikanywa yumo katika njia ya kwenda uzimani,

lakini akataaye maonyo hujipoteza.

¹⁸Mwenye uchukivu moyoni husema madanganyifu,

naye aenezaye masingizio ni mpumbavu.

¹⁹Asemaye maneno mengi hakosi kuwa mpotovu,

lakini ajuaye kuizuia midomo yake ni mjuzi kweli.

²⁰Ulimi wa mwongofu ni fedha zilizochaguliwa,

lakini mioyo yao wasiomcha Mungu haina kima.

²¹Midomo ya mwongofu hulisha wengi,

lakini wajinga hufa kwa kupotelewa na akili.

²²Mbaraka ya Bwana huwapatia watu mali,

lakini masumbuko ya mtu hayaziongezi kamwe.

²³Kwake mpumbavu ni kama mchezo kufanya mabaya, ayawazayo moyoni,

lakini mtu mwenye utambuzi hufanya yenye werevu wa kweli.

²⁴Asiyemcha Mungu anayoyaogopa, ndiyo yanayomjia,

lakini waongofu hupewa wayatakayo.

²⁵Upepo mkali unapopitia, asiyemcha Mungu hayupo tena,

lakini mwongofu anao msingi wa kale na kale.

²⁶Kama siki inavyoyatendea meno na kama moshi unavyoyatendea macho,

ndivyo, mvivu anavyowatendea waliomtuma.

²⁷Kumcha Bwana huziongeza siku za kuwapo,

lakini miaka yao wasiomcha Mungu hukatwa.

²⁸Kungojea kwao waongofu hugeuka kuwa furaha,

lakini matumaini yao wasiomcha Mungu hupotea.

²⁹Njia ya Bwana ni ngome yake amchaye Mungu,

lakini ni mwangamizo wao wafanyao maovu.

³⁰Mwongofu hatukusiki kale na kale,

lakini wasiomcha Mungu hawatakaa katika nchi.

³¹Kinywa cha mwongofu huchipuza yenye werevu wa kweli,

lakini ulimi usemao mapotovu utang'olewa.

³²Midomo ya mwongofu huyajua yapendezayo,

lakini vinywa vyao wasiomcha Mungu hujua mapotovu.