Werevu na ujinga unavyosema.

¹Kula kitonge kikavu cha wali na kutulia ni kwema,

kuliko karamu za nyumbani mlimo na magomvi tele.

²Mtumishi mwenye akili humshinda mwana wa bwana wake atwezaye,

hugawanya mali zilizoachawa na Bwana pamoja na ndugu zake yule.

³Chungu cha kuyeyushia hujaribu fedha, nayo tanuru hujaribu dhahabu,

lakini aijaribuye mioyo ni Bwana.

⁴Mtenda mabaya husikiliza midomo isemayo mapotovu,

mwongo naye hutega sikio penye ulimi usemao mateto.

⁵Afyozaye maskini humsimanga aliyemwumba,

afurahiaye mwangamizo hana budi hupatilizwa.

⁶Kilemba cha wazee ni wana wa wana wao,

nao utukufu wa wana ndio wazazi wao.

⁷Mjinga hapaswi na maneno mazuri,

sembuse mkuu na maneno ya uwongo!

⁸Matunzo ni kama kito kipendezacho machoni pake ayatoaye,

po pote anapojielekeza hufanikiwa.

⁹Afunikaye makosa hutafuta kupendwa,

lakini azushaye mambo ya kale hutenganisha rafiki waliopendana.

¹⁰Mtambuzi akikanywa husikia zaidi

kuliko mpumbavu akipigwa fimbo mia.

¹¹Mbaya anayoyatafuta ni ukatavu tu,

kwa hiyo kwake hutumwa mjumbe mshupavu.

¹²Kukutana na chui mke aliyenyang'anywa watoto ni kwema

kuliko kukutana na mpumbavu aufuataye ujinga wake.

¹³Mtu aliyepata mema akiyalipa kwa kufanya mabaya,

basi, nyumbani mwake yeye mabaya hayakomeki.

¹⁴Kuzua magomvi ni kufungua maji, yajiendee tu;

kwa hiyo acha magomvi ukiwa hujakenua meno bado.

¹⁵Kumkania akosaye na kumsingizia asiyekosa,

kote kuwili humtapisha Bwana.

¹⁶Je? Fedha mkononi mwa mpumbavu ni za nini?

Za kununua werevu wa kweli? Tena akili haziko!

¹⁷Rafiki hupenda siku zote,

naye huzaliwa penye masongano, awe ndugu kweli.

¹⁸Mtu aliyepotelewa na akili ni yule anayepeana mkono na mwingine,

anayejitoa kwa mwingine kuwa dhamana ya mwenziwe.

¹⁹Apendaye ugomvi hupenda kupotoa,

aukuzaye mlango wake hutafuta mbomoko.

²⁰Mwenye moyo mdanganyifu hapati mema,

naye mwenye ulimi wa upotovu huangushwa na mabaya.

²¹Azaaye mpumbavu hujipatia majonzi,

hata babake mjinga hapati furaha.

²²Moyo wenye furaha husaidia vema kupona magonjwa,

lakini roho ipondekayo hukausha kiini cha mifupa.

²³Asiyemcha Mungu huchukua mapenyezo na kuyaficha kifuani,

ayapotoe mashauri, yasifuate njia zilizo sawa.

²⁴Machoni pake mtambuzi upo werevu wa kweli,

lakini macho ya mpumbavu hutembea mapeoni kwa nchi.

²⁵Mwana mpumbavu humsikitisha baba yake,

naye mama yake aliyemzaa humpatia machungu.

²⁶Mtu asiyekosa haifai humtoza fedha,

wala hupiga wakuu kwa ajili ya unyofu wao.

²⁷Ayazuiaye maneno yake ni mwenye ujuzi wa kweli,

naye aitulizaye roho yake ni mtu mtambuzi.

²⁸Naye mjinga akinyamaza huwaziwa kuwa mwerevu wa kweli,

aifumbaye midomo yake ni mtambuzi.