Msizini!

¹Mwanangu, usikilize werevu wangu ulio wa kweli!

Utegee utambuzi wangu sikio lako,

²upate kuyaangalia mawazo ya moyo,

midomo yako nayo iulinde ujuzi!

³Kwani midomo ya mwanamke mgeni hudondosha asali,

kinywa chake nacho huteleza kuliko mafuta.

⁴Lakini mwisho hutokeza uchungu ulio mkali kuliko wa shubiri,

hukata kuliko upanga wenye makali pande mbili.

⁵Miguu yake hushukia kifo,

kuzimuni ndiko, mwenendo wake unakoelekea,

⁶asiishike njia iendayo uzimani iliyo sawa,

wala asijue, jinsi mapito yake yanavyopotea.

⁷Sasa wanangu, nisikieni!

Msiyaache maneno ya kinywa changu!

⁸Iangalie njia yako, impitie mbali,

usipafikie karibu pa kuingia nyumbani mwake,

⁹usiwape wengine yaliyo utukufu wako,

wala miaka yako isikatwe na mtu asiyeona huruma!

¹⁰Wageni wasijishibishe mali zako, nguvu yako ilizokupatia,

wala mapato, uliyoyasumbukia, yasipelekwe nyumbani mwa wengine!

¹¹Mwisho ukikufikia, utapiga kite;

nyama na nguvu za mwili wako zitakapokuwa zimeishilizwa,

¹²ndipo, utakaposema: Kumbe nilichukizwa nilipoonywa,

moyo wangu ukakataa kuchapwa!

¹³Sikuzisikia sauti za wafunzi wangu,

wala sikuwategea sikio langu walionifundisha.

¹⁴Ikasalia kidogo, wote mzima nikashikwa na mabaya,

nilipokuwa katikati ya mkutano wao wakatao mashauri.

¹⁵Yanywe maji ya shimo lako wewe,

nayo maji yabubujikayo katika kisima chako!

¹⁶Je? Chemchemi zako zitawanyike nje?

navyo vijito vya maji vitawanyike viwanjani?

¹⁷La, sharti maji yao yawe yako peke yako,

yasiwe ya wageni pamoja na wewe!

¹⁸Kisima chako na kibarikiwe,

upate kufurahia mke wa ujana wako!

¹⁹Anafanana na kulungu mke apendezaye,

tena na paa mke afurahishaye,

maziwa yake yakuchangamshe siku zote,

kwa upendo wake na uwe pasipo kukoma kama mtu alewaye.

²⁰Mwanangu, mbona unataka kujilewesha kwa mwanamke mgeni?

Mbona unataka kukumbatia kifua cha mwanamke wa mwingine?

²¹Kwani machoni pa Bwana njia za kila mtu ziko waziwazi,

yeye ndiye anayeyatengeneza mapito ya kila mtu.

²²Manza, alizozikora mwenyewe, zitamnasa asiyemcha Mungu,

akamatwe na kamba za makosa yake.

²³Huyo atakufa, kwa kuwa hakuonyeka,

kwa ujinga wake mwingi atapepesuka, aanguke.