Ripoti ya Petro kwa kanisa katika Yerusalemu

¹Basi mitume na ndugu waliokuwako katika Yudea wakapata habari ya kwamba watu wa Mataifa nao wamelipokea neno la Mungu.

²Na Petro alipopanda kwenda Yerusalemu, wale walio wa tohara wakashindana naye,[#Mdo 10:45]

³wakisema, Uliingia kwa watu wasiotahiriwa ukala nao.[#Gal 2:12; Efe 2:11]

⁴Petro akaanza kuwaeleza kwa taratibu, akasema,

⁵Nilikuwa katika mji wa Yafa, nikiomba, roho yangu ikazimia, nikaona maono; chombo kinashuka, kama nguo kubwa inateremshwa kutoka mbinguni kwa pembe zake nne, kikanifikia.[#Mdo 10:9-48]

⁶Nikakitazama sana, nikifikiri, nikaona wanyama wa nchi wenye miguu minne, na wanyama wa mwituni, wale watambaao, na ndege wa angani.

⁷Nikasikia na sauti ikiniambia, Ondoka, Petro, ukachinje ule.

⁸Nikasema, Hasha, Bwana, kwa maana kitu kilicho kichafu au kilicho najisi hakijawahi kuingia kinywani mwangu.

⁹Sauti ikanijibu mara ya pili kutoka mbinguni, Alivyovitakasa Mungu, usivinene wewe najisi.

¹⁰Jambo hili likatendeka mara tatu, kisha vitu vyote vikavutwa tena juu mbinguni.

¹¹Na tazama, mara hiyo watu watatu wakasimama mbele ya nyumba tuliyokuwamo, waliotumwa kwangu kutoka Kaisaria.

¹²Roho akaniambia nifuatane nao, nisione tashwishi. Ndugu hawa sita nao wakaenda pamoja nami, tukaingia katika nyumba ya mtu yule;

¹³akatueleza jinsi alivyomwona malaika aliyesimama nyumbani mwake na kumwambia, Tuma watu kwenda Yafa ukamwite Simoni aitwaye Petro,

¹⁴atakayekuambia maneno ambayo yatakuokoa, wewe na nyumba yako yote.

¹⁵Ikawa nilipoanza kunena, Roho Mtakatifu akawashukia kama alivyotushukia sisi mwanzo.

¹⁶Nikalikumbuka neno lile la Bwana, jinsi alivyosema, Yohana alibatiza kwa maji kweli, bali ninyi mtabatizwa kwa Roho Mtakatifu.[#Mdo 1:5]

¹⁷Basi ikiwa Mwenyezi Mungu amewapa wao karama ile ile aliyotupa sisi tuliomwamini Bwana Yesu Kristo, mimi ni nani niweze kumpinga Mungu?

¹⁸Waliposikia maneno haya wakanyamaza, wakamtukuza Mungu, wakisema, Basi, Mungu amewajalia hata mataifa nao toba liletalo uzima.[#Mdo 13:48; 14:27]

Kanisa la Antiokia

¹⁹Basi wale waliotawanyika kwa sababu ya ile dhiki iliyotukia kwa habari ya Stefano, wakasafiri hadi Foinike na Kipro na Antiokia, wasilihubiri lile neno ila kwa Wayahudi peke yao.[#Mdo 8:1-4]

²⁰Lakini baadhi ya hao walikuwa watu wa Kipro na Kirene, nao walipofika Antiokia wakasema na Wayahudi wa Kigiriki, wakihubiri Habari Njema za Bwana Yesu.

²¹Mkono wa Bwana ukawa pamoja nao, watu wengi wakaamini, wakamwelekea Bwana.[#Mdo 2:47]

²²Habari hizo za watu hao zikafika masikioni mwa kanisa lililokuwako katika Yerusalemu; wakamtuma Barnaba, aende hadi Antiokia.[#Mdo 4:36]

²³Naye, alipofika na kuiona neema ya Mungu akafurahi, akawasihi wote waambatane na Bwana kwa moyo wote.[#Mdo 13:43]

²⁴Maana alikuwa mtu mwema amejaa Roho Mtakatifu na imani; watu wengi wakaongezeka upande wa Bwana.[#Mdo 5:14; 6:5]

²⁵Kisha akatoka akaenda Tarso kumtafuta Sauli;[#Mdo 9:30]

²⁶hata alipokwisha kumwona akamleta Antiokia. Ikawa kwa muda wa mwaka mzima wakakusanyika pamoja na kanisa na kuwafundisha watu wengi. Na wanafunzi waliitwa Wakristo kwanza hapo Antiokia.[#Gal 2:11; Mdo 26:28; 1 Pet 4:16]

²⁷Siku zizo hizo manabii waliteremka kutoka Yerusalemu hadi Antiokia.[#Mdo 13:1; 15:32]

²⁸Na tulipokusanyika akasimama mmoja wao, jina lake Agabo, akaonesha kwa uweza wa Roho Mtakatifu kwamba njaa kubwa itakuja karibu katika dunia nzima, nayo ikatukia katika siku za Klaudio.[#Mdo 21:10]

²⁹Na wale wanafunzi, kila mtu kwa kadiri ya alivyofanikiwa, wakaazimu kupeleka msaada kwa ndugu zao waliokaa Yudea.[#Gal 2:10]

³⁰Wakafanya hivyo, wakawapelekea wazee kwa mikono ya Barnaba na Sauli.[#Mdo 12:25]