¹Kwa sababu ya dhambi zenu mlizozitenda mbele ya Mungu mnachukuliwa mateka Babeli na Nebukadreza, mfalme wa Wababeli.[#Yer 29:1]

Watu kuwa Uhamishoni kwa Muda Mrefu

²Nanyi mtakapofika Babeli mtakaa huko miaka mingi, muda mrefu, hata vizazi saba; na baada yake nitawatoa huko kwa amani.

³Sasa, huko Babeli, mtaona miungu ya fedha na dhahabu na mti ikichukuliwa mabegani, ambayo yawatia mataifa hofu.

⁴Angalieni basi, msifanane na hao wageni, wala msiingie hofu

⁵kwa sababu ya miungu hiyo mtakapoona umati wa watu wanaoitangulia na kuifuata wakiiabudu. Bali semeni ninyi mioyoni mwenu; Ee BWANA, lazima yetu ni kukuabudu wewe.

⁶Maana malaika wangu yupo pamoja nanyi, na yeye mwenyewe anawatunza nafsi zenu.

⁷Kweli ulimi wake umesuguliwa na fundi, nayo yenyewe imefunikwa dhahabu na fedha, lakini ni miungu ya uongo tu, wala haiwezi kunena.

Miungu Haisaidii chochote

⁸Naam, hutwaa dhahabu, kama kwa mwali apendaye mapambo, na kufanya taji kwa vichwa vya miungu yao.

⁹Hata pengine makuhani huiiba dhahabu na fedha ya miungu yao na kujitwalia wenyewe au hata kuwapa makahaba.

¹⁰Tena, huipamba miungu ya fedha na dhahabu na mti kwa nguo kana kwamba ni wanadamu; lakini hata hivi haiwezi kujiponya na kutu na nondo,

¹¹ingawa imevikwa nguo za urujuani. Na watu huifuta uso kwa sababu ya vumbi la hekaluni lililoitua kwa wingi.

¹²Na huo usioweza kumwua mtu aliyeukosa hushika fimbo ya enzi kana kwamba u mwamuzi wa nchi.

¹³Pia, mkononi mwake mna upanga na shoka, bali hauwezi kujiokoa panapo vita au wanyang'anyi.

¹⁴Hivyo mtajua ya kuwa siyo miungu; basi msiigope.

¹⁵Na kama chombo kitumikacho na watu hakina faida yoyote kilipovunjika, ndivyo ilivyo miungu yao; iliposimamishwa hekaluni

¹⁶macho yake hujaa vumbi kwa miguu ya watu waingiao.

¹⁷Na kama vile uwanda ufungwavyo imara ambamo amefungiwa mtu aliyemwasi mfalme akahukumiwa kufa, ndivyo makuhani wayafungavyo mahekalu yao kwa milango na makufuli, na makomeo, ili miungu isichukuliwe na wanyang'anyi.

¹⁸Huiwashia taa nyingi kuliko wazitumiazo wenyewe, ingawa haiwezi kuona hata moja.

¹⁹I sawasawa na boriti za hekalu, wadudu watokao ardhini huila pamoja na mavazi yake, na watu husema mioyo yao imeliwa!

²⁰Inapotiwa masizi usoni kwa moshi utokao hekaluni haioni kitu;

²¹na juu ya vichwa vyake hutua popo, mbayuwayu, na ndege, hata paka pia.

²²Hivyo mtajua ya kuwa siyo miungu, basi msiiogope.

²³Ijapokuwa imepambwa dhahabu ipate kupendeza, lakini mtu asipoifuta kutu haitang'aa, maana haijui inapoingia uchafu.

²⁴Vitu visivyo na pumzi hununuliwa, hata kwa bei kubwa sana!

²⁵Huchukuliwa mabegani kwa sababu haina miguu; na hivyo hudhihirisha watu ya kuwa haiwezi kitu. Wao pia waitumikiao hutahayarika, maana kama wakati wowote ikianguka chini haiwezi kujiinua yenyewe;

²⁶wala mtu akiisimamisha haiwezi kusogea; au, kama ikiwekwa pogo, haiwezi kujisawazisha. Hata hivyo, hutolewa dhabihu, kama wafu watolewavyo.

²⁷Na vile vitu vilivyotolewa sadaka makuhani huviuza na kuvitumia, na wake zao kadhalika huitia nyama chumvi na kuiweka akiba. Bali maskini na wanyonge hawapewi kitu chochote. Mwanamke aliyeingia mwezini, na mwanamke aliyejifungua, huzigusa dhabihu zake.

²⁸Basi, kwa hayo mtajua ya kuwa siyo miungu; kwa hiyo msiogope.

²⁹Yawezaje kuitwa miungu, madhali hata wanawake huweka nyama mbele ya miungu ya fedha na dhahabu na mti?

³⁰Na hekaluni makuhani huketi katika viti, wamerarua nguo zao na kunyoa vichwa vyao na ndevu zao, na kuacha wazi vichwa vyao.

³¹Huomboleza na kulia mbele ya miungu yao, kama watu wafanyavyo kwenye kilio.

³²Pamoja na hayo, makuhani huivua nguo ili kuvika wake zao na watoto wao.

³³Kama ikitendwa mabaya au kama ikitendwa mema, haiwezi kulipa; haiwezi kusimamisha mfalme wala kumshusha.

³⁴Kadhalika, haiwezi kutoa utajiri au umaskini; mtu akiiwekea nadhiri asiitimize haitaitaka kwake kamwe.

³⁵Haiwezi kumponya mtu na mauti, wala kumwokoa mnyonge mikononi mwa mwenye nguvu.

³⁶Haiwezi kufanya kipofu aone tena, wala kuponya mtu aliye katika shida.

³⁷Haiwezi kuhurumia mjane wala kufadhili yatima.

³⁸Vyafanana na mawe yaliyochongwa katika mlima, hivi vitu vya mti vilivyofunikwa dhahabu na fedha; nao wavihudumiao watafedheheshwa.

³⁹Basi, yawezaje mtu kudhani au kusema kwamba ni miungu, madhali hata Wakaldayo wenyewe huidharau?

Upumbavu wa Kuabudu Sanamu

⁴⁰Ambao, wakimwona mtu bubu asiyeweza kusema, humleta na kumtaka amlilie Beli, kana kwamba ni mungu awezaye kufahamu?

⁴¹Lakini wao wenyewe hawawezi kutambua hayo yote na kuiacha miungu hiyo, kwa sababu hawana akili.[#Isa 46:1]

⁴²Wanawake kuketi njiani, wamejifunga kamba, wakifukuza makapi badala ya uvumba;

⁴³na kama mmoja wao akivutwa na mtu apitaye, na kulala naye, humdhihaki mwenzake kwa kuwa hakustahilishwa kama yeye mwenyewe, wala kamba yake haikuvunjwa.

⁴⁴Kila litendwalo juu yake ni la uongo, basi, awezaje mtu kudhani au kusema kwamba i miungu?

⁴⁵Hufanyizwa na seremala au sonara; haiwezi kutokea kitu kingine ila kile kilichoazimiwa nao.

⁴⁶Na hao walioifanyiza hawakai miaka mingi; vitakaaje, basi, vitu vilivyofanyizwa nao?

⁴⁷Hakika wamewaachia watakaowafuata vitu vya uongo na lawama.

⁴⁸Maana wakipatwa na vita au baa, makuhani hushauriana juu ya mahali pa kujificha pamoja nayo.

⁴⁹Basi, imekuwaje watu hawatambui ya kuwa hiyo siyo miungu, ambayo haiwezi kujiponya na vita au baa?

⁵⁰Basi, kwa kuwa ni ya mti tu na kufunikwa dhahabu na fedha, itajulikana halafu kuwa ni ya uongo, hata itakuwa dhahiri kwa mataifa yote na wafalme kama hiyo si miungu ila ni kazi ya mikono ya wanadamu, wala hamna kazi ya Mungu ndani yake.

⁵¹Ni nani, basi, asiyeweza kuijua ya kuwa si miungu?

⁵²Madhali haiwezi kusimamisha mfalme katika nchi, wala kuwapa watu mvua.

⁵³Wala haiwezi kujitetea yenyewe, wala kumponya aliyeonewa, maana haina uwezo; hufanana na kunguru kati ya mbingu na nchi.

⁵⁴Maana, kama mtoto ukiiangukia nyumba ya miungu ya mti, au iliyofunikwa dhahabu au fedha, makuhani wake watakimbia na kujiokoa, bali hiyo yenyewe itateketea kama boriti.

⁵⁵Zaidi ya hayo, hawezi kushindana na mfalme au adui;

⁵⁶Basi, mtu awezaje kuikubali au kuidhania kuwa ni miungu?

⁵⁷Tena, miungu hiyo ya mti, iliyofunikwa fedha au dhahabu, haiwezi kujiepusha na wezi au wanyang'anyi. Wenye nguvu watainyang'anya dhahabu yake na fedha, na nguo ilizovikwa, na kwenda nazo, wala haitaweza kujisaidia.

⁵⁸Kwa hiyo ni afadhali kuwa mfalme aoneshaye utu wake, au chombo cha nyumbani kifaacho kwa matumizi ya mwenyewe, kuliko kuwa miungu ya uongo kama hiyo. Hata mlango wa nyumba ulindao vitu vya nyumbani hafaa kuliko hiyo miungu ya uongo; au nguzo ya mti katika nyumba kuu kuliko hiyo miungu ya uongo.

⁵⁹Maana jua na mwezi na nyota zitoazo nuru na kutumwa kufanya kazi zake zinatii.

⁶⁰Nao umeme unapomeremeta hupendeza macho; na kadhalika upepo huvuma kila mahali.

⁶¹Tena, Mungu anapoyaamuru mawingu yapite juu ya dunia yote, hufanya yalivyoagizwa. Na moto upelekwao kutoka juu kuiteketeza milima na misitu, hufanya ulivyoamriwa.

⁶²Bali hiyo haiwezi kufananishwa na viumbe hivyo kwa uzuri wala kwa uwezo.

⁶³Kwa sababu hiyo haimpasi mtu kudhani wala kusema kwamba ni miungu, madhali haiwezi kuamua mashauri wala kuwafaa watu.

⁶⁴Basi, kwa kuwa mnajua kama hiyo si miungu msiiogope.

⁶⁵Mradi haiwezi kulaani wafalme wala kuwabariki;

⁶⁶haiwezi kuonesha ishara mbinguni katikati ya mataifa, wala kung'aa kama jua au kuitoa nuru kama mwezi.

⁶⁷Bora wanyama kuliko hiyo, maana wao waweza kujificha kichakani na kujisaidia.

⁶⁸Bali hatuoni dalili yoyote ya kuonesha kama hiyo ni miungu; basi, msiiogope.

⁶⁹Kama mti mkavu katika shamba la matango, ambao haulindi kitu, ndivyo ilivyo miungu yao ya mti, na iliyofunikwa dhahabu na fedha.

⁷⁰Au, kwa mfano mwingine, inafanana na mchongoma wa shambani ambao kila ndege kuutua, au mzoga uliotupwa nje gizani.

⁷¹Basi, kwa urujuani na kitani safi inayooza juu yake, ninyi mtaijua kuwa si miungu, na halafu hiyo yenyewe itaoza na kuwa lawama katika nchi.

⁷²Basi, afadhali mtu wa haki asiye na sanamu, maana yeye atakuwa mbali na lawama.