Amri ya kupiga kambi na kuingia

¹BWANA akanena na Musa na Haruni, na kuwaambia,

²Wana wa Israeli watapanga kila mtu penye bendera yake mwenyewe, na alama za nyumba za baba zao; kuikabili hema ya kukutania ndiko watakakopanga kwa kuizunguka pande zote.[#Hes 1:52; 24:2-9]

³Na hao watakaopanga upande wa mashariki, kwa kuelekea maawio ya jua, ndio wale wa bendera ya kambi ya Yuda, kwa majeshi yao; na mkuu wa wana wa Yuda atakuwa Nashoni mwana wa Aminadabu.[#Hes 10:14; Rut 4:20; 1 Nya 2:10; Mt 1:4; Lk 3:32,33]

⁴Na jeshi lake, na wale waliohesabiwa kwao, walikuwa elfu sabini na nne na mia sita.

⁵Na hao watakaopanga karibu naye ni kabila la Isakari; na mkuu wa wana wa Isakari atakuwa Nethaneli mwana wa Suari;[#Hes 7:18,23]

⁶na jeshi lake, na wale waliohesabiwa kwao, walikuwa elfu hamsini na nne na mia nne;[#Hes 26:25]

⁷na kabila la Zabuloni; na mkuu wa wana wa Zabuloni atakuwa Eliabu mwana wa Heloni;[#Mwa 49:13; Kum 33:18]

⁸na jeshi lake, na wale waliohesabiwa kwao, walikuwa elfu hamsini na saba na mia nne.

⁹Hao wote waliohesabiwa katika kambi ya Yuda walikuwa elfu mia moja themanini na sita na mia nne, kwa makundi yao. Hao ndio watakaotangulia mbele.[#Hes 10:14; 1 Nya 5:2; Zab 78:52]

¹⁰Upande wa kusini kutakuwa na bendera ya kambi ya Reubeni kwa majeshi yao; na mkuu wa wana wa Reubeni atakuwa Elisuri mwana wa Shedeuri.[#Kum 33:6; 1 Nya 5:1]

¹¹Na jeshi lake, na wale waliohesabiwa kwao, walikuwa elfu arubaini na sita na mia tano.

¹²Na hao watakaopanga karibu naye ni kabila la Simeoni; na mkuu wa wana wa Simeoni atakuwa Shelumieli mwana wa Suri-shadai;

¹³na jeshi lake, na wale waliohesabiwa kwao, walikuwa elfu hamsini na tisa na mia tatu;

¹⁴na kabila la Gadi; na mkuu wa wana wa Gadi atakuwa Eliasafu mwana wa Deueli;

¹⁵na jeshi lake, na wale waliohesabiwa kwao, walikuwa elfu arubaini na tano, mia sita na hamsini.

¹⁶Wote waliohesabiwa katika kambi za Reubeni walikuwa elfu mia moja hamsini na moja na mia nne na hamsini, kwa majeshi yao. Nao ndio watakaofuata wakiwa kundi la pili.[#Hes 10:18; Mwa 49:3; 1 Nya 5:1]

¹⁷Ndipo hema ya kukutania itasafiri, pamoja na kambi za Walawi katikati ya kambi zote; kama wapangavyo kambi, watasafiri vivyo hivyo, kila mtu mahali pake, penye bendera zao.[#Mdo 7:44; Ebr 8:2; 1 Kor 14:40]

¹⁸Upande wa magharibi kutakuwa na bendera ya kambi ya Efraimu kwa majeshi yao; na mkuu wa wana wa Efraimu atakuwa Elishama mwana wa Amihudi.[#Mwa 48:14-20; Zab 80:1; Hos 11:3]

¹⁹Na jeshi lake, na wale waliohesabiwa kwao walikuwa elfu arubaini na mia tano.

²⁰Na karibu naye itakuwa kabila la Manase; na mkuu wa wana wa Manase atakuwa Gamalieli mwana wa Pedasuri;

²¹na jeshi lake, na wale waliohesabiwa kwao, walikuwa elfu thelathini na mbili na mia mbili;

²²tena kabila la Benyamini; na mkuu wa wana wa Benyamini atakuwa Abidani mwana wa Gideoni;[#Zab 68:27; Ufu 7:8]

²³na jeshi lake, na wale waliohesabiwa kwao, walikuwa elfu thelathini na tano na mia nne.

²⁴Wote waliohesabiwa katika kambi ya Efraimu walikuwa elfu mia moja na nane na mia moja, kwa majeshi yao. Nao ndio watakaoondoka wakiwa kundi la tatu.[#Hes 10:22]

²⁵Upande wa kaskazini kutakuwa na bendera ya kambi ya Dani kwa majeshi yao; na mkuu wa wana wa Dani atakuwa Ahiezeri mwana wa Amishadai.[#Kum 32:22]

²⁶Na jeshi lake, na wale waliohesabiwa kwao, walikuwa elfu sitini na mbili na mia saba.

²⁷Na hao watakaopanga karibu naye ni kabila la Asheri; na mkuu wa wana wa Asheri atakuwa Pagieli mwana wa Okrani;

²⁸na jeshi lake, na wale waliohesabiwa kwao, walikuwa elfu arubaini na moja na mia tano;

²⁹kisha kabila la Naftali; na mkuu wa wana wa Naftali atakuwa Ahira mwana wa Enani;[#Mwa 30:8; 49:21; 2 Fal 15:29; Ufu 7:6]

³⁰na jeshi lake, na wale waliohesabiwa kwao, walikuwa elfu hamsini na tatu na mia nne.

³¹Wote waliohesabiwa katika kambi ya Dani walikuwa elfu mia moja hamsini na saba na mia sita. Hao ndio watakaoondoka mwisho kwa kufuata bendera yao.[#Hes 10:25; #2:31 Katika Kiebrania ni ‘kufuata vikosi vyao’.]

³²Hao ndio waliohesabiwa katika wana wa Israeli kwa nyumba za baba zao; wote waliohesabiwa katika kambi kwa majeshi yao, walikuwa elfu mia sita na tatu na mia tano na hamsini.[#Kut 12:37; 38:26; Hes 1:46; 11:21]

³³Lakini Walawi hawakuhesabiwa katika wana wa Israeli; kama BWANA alivyomwagiza Musa.[#Hes 1:47; 26:57-62]

³⁴Hivyo ndivyo walivyofanya wana wa Israeli; kama BWANA alivyomwamuru Musa; ndivyo walivyojipanga kufuata bendera zao, na ndivyo walivyosafiri, kila mtu kwa jamaa zao, kwa nyumba za baba zao.[#Kut 39:42; Hes 24:2,9; Zab 119:6; Isa 45:12; Lk 1:6; 1 Kor 14:40]