Watu najisi

¹Kisha BWANA akanena na Musa, na kumwambia,

²Waamrishe wana wa Israeli kwamba wamtoe kila mwenye ukoma kambini, na kila mtu aliye na kisonono, na kila aliye najisi kwa ajili ya maiti;[#Law 13:3,46; Hes 12:14; Kum 23:10; 24:8,9; 2 Fal 5:27; 7:3; 2 Nya 26:20; Isa 52:11; Lk 17:12; Law 15:2; 21:1; Hes 9:6,10; 19:11; #5:2 Maana katika Kiebrania si yakini.]

³mtawatoa nje wote, wanaume kwa wanawake, mtawaweka nje ya kambi; ili wasizitie unajisi kambi zao, ambazo mimi naketi katikati yazo.[#Kut 25:8; 29:45; Law 26:11,12; Kum 32:19; Yos 22:19; Zab 76:2; Eze 37:26-28; Zek 2:10; Yn 14:17,23; 2 Kor 6:16; Ufu 21:3]

⁴Wana wa Israeli wakafanya hivyo, wakawatoa na kuwaweka nje ya kambi; kama BWANA alivyonena na Musa, ndivyo walivyofanya wana wa Israeli.

Toba na Ukombozi

⁵Kisha BWANA akanena na Musa, na kumwambia,[#Law 6:1-7]

⁶Uwaambie wana wa Israeli, Mtu mume au mke atakapofanya dhambi yoyote, ifanywayo na binadamu, kumwasi BWANA, na mtu huyo akawa na hatia;[#Law 6:2,3]

⁷ndipo watakapoungama dhambi yao waliyoifanya; naye atatoa fidia kwa hatia yake, kwa utimilifu wake, tena ataongeza juu yake sehemu ya tano, na kumpa huyo aliyemkosea.[#Law 5:5; 26:40; Yos 7:19; Law 6:5]

⁸Lakini ikiwa mtu huyo hana jamaa ya karibu ambaye inampasa kurudishiwa kwa ajili ya hiyo hatia, kile kitakachorudishwa kwa BWANA kwa hiyo hatia kitakuwa cha kuhani, pamoja na kondoo dume wa upatanisho, ambaye kwa huyo utafanywa upatanisho kwa ajili yake.[#Law 7:7]

⁹Tena kila sadaka ya kuinuliwa, ya vitu vitakatifu vya wana wa Israeli, watakavyovileta kwa kuhani, vitakuwa ni vyake.[#Kut 29:28]

¹⁰Tena vitu vilivyowekwa wakfu na mtu awaye yote, vitakuwa ni vya kuhani; kitu chochote mtu atakachompa kuhani, kitakuwa chake.[#Law 10:13]

Kuhusu Mke asiye Mwaminifu

¹¹Kisha BWANA akanena na Musa, na kumwambia,

¹²Nena na wana wa Israeli, uwaambie, kama mke wa mtu yeyote akikengeuka, na kumkosa mumewe,[#Mit 2:16; 7:10-27; Hos 4:13]

¹³na mwanamume akalala naye kwa uasherati, na jambo hilo likafichika kwa mumewe, likawa jambo lisilojulikana, na huyo mwanamke akawa najisi, wala hapana shahidi aliyeshuhudia juu yake, wala hakufumaniwa;[#Law 18:20; 20:10; Mit 30:20]

¹⁴kisha mumewe akashikwa na roho ya wivu, akamwonea wivu mkewe, naye akawa najisi huyo mwanamke; au kama akiingiwa na roho ya wivu, akamwonea wivu mkewe, naye hakuwa na unajisi huyo mke;[#Mit 6:34; Wim 8:6; Isa 19:14]

¹⁵ndipo huyo mume atamchukua mkewe, aende naye kwa kuhani, naye ataleta sadaka yake kwa ajili yake, yaani, sehemu ya kumi ya efa; asitie mafuta juu yake, wala asitie ubani juu yake; maana, ni sadaka ya unga ya wivu, ni sadaka ya unga ya ukumbusho ya kukumbukia uovu.[#Law 5:11; Isa 53:2; 1 Fal 17:18; Eze 29:16; #5:15 Efa moja ni karibu sawa na lita 22 za unga wa shayiri.]

¹⁶Basi kuhani atamleta mwanamke akaribie, na kumweka mbele za BWANA;[#Law 1:3; Yer 17:10; 1 Nya 28:9; Mal 3:5; Ebr 13:4]

¹⁷kisha kuhani atatwaa maji matakatifu katika chombo cha udongo; kisha kuhani atatwaa katika vumbi lililo pale chini ya maskani, na kulitia katika hayo maji;

¹⁸kisha kuhani atamweka mwanamke mbele za BWANA, naye atazifungua nywele za kichwani mwa huyo mwanamke, kisha atampa hiyo sadaka ya unga ya ukumbusho mikononi mwake, ambayo ni sadaka ya unga ya wivu, naye kuhani atakuwa na hayo maji ya uchungu yaletayo laana mkononi mwake;

¹⁹tena kuhani atamwapisha huyo mwanamke, naye atamwambia mwanamke, Kwamba hakulala mtu mume pamoja nawe, tena ikiwa hukukengeuka kutenda maovu, ukiwa chini ya mumeo, maji haya ya uchungu yaletayo laana yasikudhuru;

²⁰lakini ikiwa umekengeuka ukiwa chini ya mumeo, na kwamba u hali ya unajisi, na mwanamume amelala nawe, asiyekuwa mumeo;

²¹hapo ndipo kuhani atamwapisha mwanamke kwa kiapo cha kuapiza, kisha kuhani atamwambia huyo mwanamke maneno haya, BWANA na akufanye wewe uwe laana na kiapo kati ya watu wako, hapo BWANA akufanyapo paja lako kupooza, na tumbo lako kuvimba;[#Mwa 9:25; Yos 6:26; 1 Sam 14:24; Neh 10:29; Mal 4:6; Mt 26:74; Isa 65:15; Yer 29:22]

²²na maji yaletayo laana yatakuingia matumboni mwako, na kukuvimbisha tumbo, na kukupoozesha paja lako; na mwanamke ataitika, Amina, Amina.[#Zab 109:18; Mit 1:31; Eze 3:3; Kum 27:15]

²³Kisha kuhani ataziandika laana hizo ndani ya kitabu, na kuzifuta katika maji ya uchungu;

²⁴kisha atamnywesha mwanamke hayo maji ya uchungu yaletayo laana; nayo maji yaletayo laana yataingia ndani yake, nayo yatageuka kuwa uchungu.

²⁵Kisha kuhani ataitwaa hiyo sadaka ya unga ya wivu, kwa kuiondoa mkononi mwa huyo mwanamke, naye ataitikisa sadaka ya unga mbele ya BWANA, na kuisongeza pale madhabahuni;[#Kut 29:24; Law 8:27]

²⁶kisha kuhani atatwaa konzi moja ya sadaka ya unga, kuwa ni ukumbusho wake, na kuuteketeza madhabahuni, baadaye atamnywesha mwanamke hayo maji.[#Law 2:2,9]

²⁷Kisha hapo atakapokwisha kumnywesha maji, ndipo itakapokuwa, kama amekuwa hali ya unajisi na kumkosea mumewe, hayo maji yaletayo laana yatamwingia ndani yake, nayo yatakuwa uchungu, na tumbo lake litavimba, na paja lake litapooza; na huyo mwanamke atakuwa laana kati ya watu wake.[#Kum 28:37; Zab 83:9; Mhu 7:26; Isa 65:15; Yer 24:9; Zek 8:13]

²⁸Na kama mwanamke hakuwa na unajisi lakini yu safi; ndipo ataachiliwa, naye atazaa wana.[#Ayu 17:8,9; Zab 37:5,6; Rum 5:3-5]

²⁹Hii ndiyo sheria ya wivu, mwanamke, ambaye yu chini ya mumewe, akikengeuka, na kupata unajisi;

³⁰au, roho ya wivu ikimwingia mtu mume, naye akamwonea wivu mkewe; ndipo atakapomweka huyo mwanamke mbele za BWANA, na kuhani atatenda juu yake sheria hii yote.

³¹Na huyo mume atakuwa hana uovu, na mwanamke atauchukua uovu wake.[#Law 20:17; Eze 18:4; Rum 2:8,9]