Shukrani za kifalme kwa ushindi

¹Wewe, BWANA, nguvu yangu, nakupenda sana;[#Kum 32:4; 1 Sam 2:2; Zab 91:2]

²BWANA ni jabali langu, na boma langu, na mwokozi wangu,[#Ebr 2:13]

Mungu wangu, mwamba wangu ninayemkimbilia,

Ngao yangu, na pembe ya wokovu wangu, na ngome yangu.

³Namwita BWANA astahiliye kusifiwa,[#Zab 76:4]

Hivyo nitaokoka na adui zangu.

⁴Kamba za mauti zilinizunguka,[#Zab 116:3]

Mafuriko ya uovu yakanitia hofu.

⁵Kamba za kuzimu zilinizunguka,

Mitego ya mauti ikanikabili.

⁶Katika shida yangu nilimwita BWANA,

Na kumlalamikia Mungu wangu.

Akaisikia sauti yangu hekaluni mwake,

Kilio changu kikaingia masikioni mwake.

⁷Ndipo nchi iliyotikisika na kutetemeka,[#Mdo 4:31]

Misingi ya milima ikatingizika;

Ikatikisika kwa sababu alikuwa na ghadhabu.

⁸Kukapanda moshi kutoka puani mwake,

Moto wa kuteketeza ukatoka kinywani mwake,

Makaa ya moto yakamtoka.

⁹Aliziinamisha mbingu akashuka,[#Isa 64:1]

Kukawa na giza kuu chini ya miguu yake.

¹⁰Akapanda juu ya kerubi akaruka,[#Zab 99:1; 104:3]

Naam, aliruka upesi juu ya mabawa ya upepo.

¹¹Alifanya giza kuwa mahali pake pa kujificha,[#Zab 97:2]

Kuwa hema yake ya kumzunguka.

Akiwa katika giza la mawingu mazito yaliyojaa maji.

¹²Toka mwangaza uliokuwa mbele zake

Kukapita mawingu yake makuu.

Ikashuka mvua ya mawe na makaa ya moto.

¹³BWANA alinguruma kutoka mbinguni,[#Zab 29:3]

Yeye Aliye Juu akaitoa sauti yake,

Mvua ya mawe na makaa ya moto.

¹⁴Akaipiga mishale yake akawatawanya,[#Hes 24:8; Kum 32:23; Ayu 6:4; Zab 21:12]

Naam, umeme mwingi sana, akawatapanya.

¹⁵Ndipo ilipoonekana mikondo ya maji,

Misingi ya ulimwengu ikafichuliwa,

Ee BWANA, kwa kukemea kwako,

Kwa mvumo wa pumzi ya puani mwako.

¹⁶Alinishukia kutoka juu, akanichukua,[#Zab 144:7]

Na kunitoa katika maji mengi.

¹⁷Akaniokoa na adui yangu mwenye nguvu,

Na wale walionichukia,

Maana walikuwa na nguvu kuliko mimi.

¹⁸Walinikabili siku ya msiba wangu,

Lakini BWANA alikuwa tegemeo langu.

¹⁹Akanitoa akanipeleka panapo nafasi,[#Zab 118:5]

Aliniponya kwa kuwa alipendezwa nami.

²⁰BWANA alinitendea sawasawa na haki yangu,[#2 Sam 22:21; Mit 18:10; Mt 6:4; 1 Kor 3:8]

Sawasawa na usafi wa mikono yangu akanilipa.

²¹Maana nimezishika njia za BWANA,

Wala sikumwasi Mungu wangu.

²²Hukumu zake zote zilikuwa mbele yangu,

Wala amri zake sikubandukana nazo.

²³Nami nilikuwa mkamilifu mbele zake,

Nikajilinda na uovu wangu.

²⁴Ndipo BWANA akanilipa sawasawa na haki yangu,[#Rut 2:12; Mt 10:41,42]

Sawasawa na usafi wa mikono yangu mbele zake.

²⁵Kwa mtu mwenye fadhili utakuwa mwenye fadhili;[#Mt 18:32-35]

Kwa mkamilifu utajionesha kuwa mkamilifu;

²⁶Kwake ajitakasaye utajionesha kuwa mtakatifu;[#Law 26:23]

Na kwa mpotovu utajionesha kuwa mkaidi.

²⁷Maana Wewe wawaokoa watu wanaoonewa,[#Mit 6:17]

Na macho ya kiburi utayadhili.

²⁸Kwa kuwa Wewe unaiwasha taa yangu;[#Ayu 18:6]

BWANA Mungu wangu aniangazia giza langu.

²⁹Maana kwa msaada wako nafuatia jeshi,

Kwa msaada wa Mungu wangu naruka ukuta.

³⁰Mungu, njia yake ni kamilifu,[#Kum 32:4; Rum 12:3; Ufu 15:3; Zab 12:6]

Ahadi ya BWANA imehakikishwa,

Yeye ndiye ngao yao.

Wote wanaomkimbilia.

³¹Maana ni nani aliye Mungu ila BWANA?[#Kum 32:31; 2 Sam 22:32]

Ni nani aliye mwamba ila Mungu wetu?

³²Mungu ndiye anifungaye mshipi wa nguvu,

Naye anaifanya kamilifu njia yangu.

³³Miguu yangu anaifanya kuwa ya kulungu,[#Hab 3:19]

Na kunisimamisha mahali pangu pa juu.

³⁴Anaifundisha mikono yangu vita,

Mikono yangu ikaupinda upinde wa shaba.

³⁵Nawe umenipa ngao ya wokovu wako,

Mkono wako wa kulia umenitegemeza,

Na unyenyekevu wako umenikuza.

³⁶Umezipanulia nafasi hatua zangu,

Na miguu yangu haikuteleza.

³⁷Nitawafuatia adui zangu na kuwapata,

Wala sitarudi nyuma hadi wakomeshwe.

³⁸Nitawapigapiga wasiweze kusimama,

Wataanguka chini ya miguu yangu.

³⁹Nawe umenipa nguvu za vita,

Hunitiishia chini yangu walionishambulia.

⁴⁰Naam, adui zangu umewafanya wanipe visogo,

Nao walionichukia nimewakatilia mbali.

⁴¹Walipiga yowe, lakini hakuna wa kuokoa,[#Mit 1:28]

Walimwita BWANA lakini hakuwajibu,

⁴²Nikawaponda kama mavumbi mbele ya upepo,

Nikawatupa nje kama matope ya njiani.

⁴³Umeniokoa kutoka kwa mashindano ya watu,

Umenifanya niwe kichwa cha mataifa.

Watu nisiowajua walinitumikia.

⁴⁴Mara tu waliposikia habari zangu,

wakanitii.

Wageni walinijia wakinyenyekea.

⁴⁵Wageni nao walitepetea,[#Mik 7:17]

Walitoka katika ngome zao wakitetemeka.

⁴⁶BWANA ndiye aliye hai;[#Yer 10:10]

Na ahimidiwe mwamba wangu;

Na atukuzwe Mungu wa wokovu wangu;

⁴⁷Ndiye Mungu anilipizaye kisasi;

Na kuwatiisha watu chini yangu.

⁴⁸Huniponya na adui zangu;[#Zab 59:1]

Naam, waniinua juu yao walioniinukia,

Na kuniponya na mtu mjeuri.

⁴⁹Basi, BWANA, nitakushukuru kati ya mataifa,[#Rum 15:9]

Nami nitaliimbia jina lako.

⁵⁰Ampa mfalme wake wokovu mkuu,[#Zab 144:10]

Amfanyia fadhili masihi wake,

Daudi na wazawa wake hata milele.