Sala ya ushindi wa kitaifa baada ya kushindwa

¹Ee Mungu, umetutupa na kututawanya,

Umekuwa na hasira, uturudishe tena.

²Umeitetemesha nchi na kuipasua,

Upaponye palipobomoka, maana inatikisika.

³Umewaonesha watu wako mazito,

Na kutunywesha mvinyo ya kutuyumbisha.

⁴Umewapa wakuogopao bendera,[#Isa 11:10]

Ili itwekwe kwa ajili ya kweli.

⁵Ili wapenzi wako waopolewe,[#Zab 108:6]

Utuokoe kwa mkono wako wa kulia, utuitikie.

⁶Mungu amenena kwa utakatifu wake,[#Zab 89:35; Mwa 12:6; Yos 13:27]

Nami nikishangilia.

Nitaigawanya Shekemu,

Na kulipima bonde la Sukothi.

⁷Gileadi ni yangu, na Manase ni yangu,[#Kum 33:17; Mwa 49:10]

Na Efraimu ni kinga ya kichwa changu.

Yuda ni fimbo yangu ya kifalme,

⁸Moabu ni bakuli langu la kunawia.

Nitamtupia Edomu kiatu changu,

Na kumpigia Filisti kelele za vita.

⁹Ni nani atakayenipeleka hadi mji wenye boma?

Ni nani atakayeniongoza hadi Edomu?

¹⁰Ee Mungu, si Wewe uliyetutupa?[#Zab 44:9]

Wala, Ee Mungu, hutoki na majeshi yetu?

¹¹Utuletee msaada juu ya mtesi,

Maana wokovu wa binadamu haufai kitu.

¹²Kwa msaada wa Mungu tutatenda makuu,[#1 Nya 19:13]

Maana Yeye atawakanyaga watesi wetu.