¹Basi Myahudi ana nini zaidi? Na kutahiriwa kwafaa nini?

²Kwafaa sana kwa kila njia. Kwanza kwa kuwa wamekabidhiwa mausia ya Mungu.[#Rum 9:4; Kum 4:7,8; Zab 147:19,20; 103:7; 1 Pet 4:11]

³Ni nini, basi, ikiwa baadhi yao hawakuamini? Je! Kutoamini kwao kutaubatili uaminifu wa Mungu?[#Rum 9:6; 11:29; 2 Tim 2:13]

⁴La hasha! Mungu aonekane kuwa kweli japo kila mtu ni mwongo; kama ilivyoandikwa,[#Zab 51:4; 116:11]

Ili ujulikane kuwa una haki katika maneno yako,

Ukashinde uingiapo katika hukumu.

⁵Lakini, ikiwa udhalimu wetu waithibitisha haki ya Mungu, tuseme nini? Je! Mungu ni dhalimu aletaye ghadhabu? (Nasema kwa jinsi ya kibinadamu.)

⁶Hasha! Kwa maana hapo Mungu atawezaje kuuhukumu ulimwengu?

⁷Lakini, ikiwa kweli ya Mungu imezidi kudhihirisha utukufu wake kwa sababu ya uongo wangu, mbona mimi ningali nahukumiwa kuwa ni mwenye dhambi?

⁸Kwa nini tusiseme (kama tulivyosingiziwa, na kama wengine wanavyokaza kusema ya kwamba twasema hivyo), Na tufanye mabaya, ili yaje mema? Ambao kuhukumiwa kwao kuna haki.[#Rum 6:1,2]

Hakuna mwenye haki

⁹Ni nini basi? Tu bora kuliko wengine? La! Hata kidogo. Kwa maana tumekwisha kuwashitaki Wayahudi na Wagiriki ya kwamba pia wamekuwa chini ya dhambi;[#Rum 1:18—2:24]

¹⁰kama ilivyoandikwa, ya kwamba,[#Zab 14:1-3; 53:1-3]

Hakuna mwenye haki hata mmoja.

¹¹Hakuna afahamuye;

Hakuna amtafutaye Mungu.

¹²Wote wamepotoka, wameoza wote pia;

Hakuna mtenda mema, la! Hata mmoja.

¹³Koo lao ni kaburi wazi,[#Zab 5:9; 140:3]

Kwa ndimi zao wametumia hila.

Sumu ya fira iko chini ya midomo yao.

¹⁴Vinywa vyao vimejaa laana na uchungu.[#Zab 10:7]

¹⁵Miguu yao ina mbio kumwaga damu.[#Isa 59:7-8]

¹⁶Uharibifu na mashaka yamo njiani mwao.

¹⁷Wala njia ya amani hawakuijua.

¹⁸Kumcha Mungu hakupo machoni pao.[#Zab 36:1]

¹⁹Basi twajua ya kuwa mambo yote inenayo torati huyanena kwa hao walio chini ya torati, ili kila kinywa kifumbwe, na ulimwengu wote uwe chini ya hukumu ya Mungu;[#Rum 2:12; Gal 3:22]

²⁰kwa sababu hakuna mwenye mwili atakayehesabiwa haki mbele zake kwa matendo ya sheria; kwa maana kutambua dhambi huja kwa njia ya sheria.[#Zab 143:2; Gal 2:16; Rum 7:7]

Haki kupitia kwa imani

²¹Lakini sasa, haki ya Mungu imedhihirika pasipo sheria; inashuhudiwa na Torati na Manabii;[#Mdo 10:43; Rum 1:17]

²²ni haki ya Mungu iliyo kwa njia ya imani katika Yesu Kristo kwa wote waaminio. Maana hakuna tofauti;[#Gal 2:16]

²³kwa sababu wote wamefanya dhambi, na kupungukiwa na utukufu wa Mungu;[#Rum 9:19; 5:2]

²⁴wanahesabiwa haki bure kwa neema yake, kwa njia ya ukombozi ulio katika Kristo Yesu;[#Rum 5:1; Efe 2:8]

²⁵ambaye Mungu amekwisha kumweka awe upatanisho kwa njia ya imani katika damu yake, ili aoneshe haki yake, kwa sababu ya kuziachilia katika ustahimili wa Mungu dhambi zote zilizotangulia kufanywa;[#Law 16:12-15; Ebr 4:16; Efe 1:7; #3:25 Upatanisho hapa maana yake ni, Kiti cha rehema.]

²⁶apate kuonesha haki yake wakati huu, ili awe mwenye haki na mwenye kumhesabia haki yeye amwaminiye Yesu.

²⁷Ku wapi, basi, kujisifu? Kumefungiwa nje. Kwa sheria ya namna gani? Kwa sheria ya matendo? La! Bali kwa sheria ya imani.[#1 Kor 1:9,31]

²⁸Basi, twaona ya kuwa mwanadamu huhesabiwa haki kwa imani pasipo matendo ya sheria.[#Gal 2:16]

²⁹Au je! Mungu ni Mungu wa Wayahudi tu? Siye Mungu wa Mataifa pia? Naam, ni Mungu wa Mataifa pia;[#Rum 10:12]

³⁰kama kwa kweli Mungu ni mmoja, atakayewahesabia haki wale waliotahiriwa katika imani, nao wale wasiotahiriwa atawahesabia haki kwa njia ya imani iyo hiyo.[#Kum 6:4; Gal 3:20; Rum 4:11,12]

³¹Basi, je! Twaibatilisha sheria kwa imani hiyo? La hasha! Kinyume cha hayo twaithibitisha sheria.[#Rum 4:3; 8:4; Mt 5:17]