ASILI, TABIA NA KAZI YA HEKIMA. NJIA ZA KUJIPATIA HEKIMA

Wafalme watafute hekima

¹Hekima ndiyo bora kupita nguvu,

Na mwenye busara kuliko shujaa.

Basi, enyi wafalme, sikilizeni; enyi waamuzi wa miisho ya dunia jifunzeni;

²sikieni ninyi mtawalao watu wengi, na kujisifia umati wa mataifa.

³Kwa maana mlipewa falme zenu na BWANA, na milki zenu na Aliye Juu ambaye atazichunguza kazi zenu, na kuyahojihoji mashauri yenu;[#Rum 13:1]

⁴kwa sababu, kisha kuwa wakuu wa ufalme wake, hamhukumu kwa adili, wala kuishika torati, wala kulifuata shauri la Mungu.

⁵Yeye atawajia ghafla kwa kitisho, madhali hukumu bila huruma huwaangukia wenye cheo;

⁶mradi mtu mnyonge aweza kusamehewa katika rehema, bali wakuu watakabiliwa na hukumu hasa.

⁷Kwa kuwa BWANA, Mfalme wa wote, hatajizuia kwa ajili ya mtu yeyote, wala hajali ukuu, kwa sababu ndiye Yeye aliyewafanya wadogo na wakuu pia.

⁸Naye huwazingatia watu wote pasipo upendeleo. Walakini uchunguzi ulio halisi huwajilia wenye uwezo.

⁹Kwa hiyo, enyi wafalme, nawaambia ninyi maneno yangu, ili mjifunze hekima, msije mkapotea njiani.

¹⁰Maana wale waliotunza kwa utakatifu mambo yale yaliyo matakatifu watahesabiwa kuwa watakatifu wenyewe; nao wale waliofundishwa hayo wataona neno la kujiteta.

¹¹Basi fanyeni shauku ya maneno yangu; yatafuteni, na kwa malezi yake mtapata adabu.

Maelezo juu ya Hekima

¹²Hekima hung'aa, wala hafifii;

Huonekana upesi nao wampendao.

Hupatikana nao wamtafutao.

¹³Hutangulia kujionesha kwao wamtakao,

¹⁴Amtafutaye mapema hana kazi ngumu;

Atamkuta ameketi mlangoni pake.

¹⁵Kumtia fikirani ni ufahamu mkamilifu;

Naye mwenye kukesha kwa ajili yake

Atakuwa mara hana masumbufu.

¹⁶Yeye huzunguka zunguka mwenyewe,

Akiwatafuta wao wanaomstahili;

Njiani hujidhihirisha kwao kwa upendo.

Hukutana nao katika kila kusudi;

¹⁷Mwanzo wake hasa ni kutaka malezi;

Na kuangalia malezi ni kumpenda.

¹⁸Kumpenda ni kuzishika sheria zake

Kuzitii sheria zake ni kuuimarisha unyofu;

¹⁹Na unyofu hutuleta karibu na Mungu.

²⁰Basi kutaka Hekima huwaongoza watu wapate kumiliki.

²¹Nanyi, enyi wafalme wa watu, ikiwa mnapendezwa na viti vya enzi na fimbo za enzi, heshimuni Hekima mpate kumiliki milele.

Sulemani aeleza maana ya Hekima

²²Lakini mimi nitawajulisha Hekima, asili yake na chanzo chake ni nini, wala sitawaficheni siri zake; bali kutokea awali ya kuumbwa ulimwengu nitatafuta habari zake, na kuzidhihirisha kwa wazi, bila kuyaepuka yaliyo kweli.

²³Lakini mimi sitachukua husuda yenye kununa kuwa mwenzangu njiani, kwa maana husuda haina urafiki na Hekima;

²⁴lakini wingi wa wenye hekima ni wokovu kwa ulimwengu, na mfalme mwenye ufahamu huwaletea watu wake raha.

²⁵Kwa hiyo ninyi mpate malezi kwa maneno yangu, na hivyo mtafaidiwa pia.