Mdo 9

Kuongoka kwa Sauli

¹Lakini Sauli, akizidi kutisha na kuwaza kuwaua wanafunzi wa Bwana, akamwendea Kuhani Mkuu,[#Mdo 22:3-21; 26:9-20; #Mdo 8:3]

²akataka ampe barua za kuenda Dameski zilizoandikwa kwa masinagogi, ili akiona watu wa Njia hii, waume kwa wake, awafunge na kuwaleta Yerusalemu.

³Hata alipokuwa akisafiri, ikawa anakaribia Dameski; ghafula ikamwangaza kote kote nuru kutoka mbinguni.[#1 Kor 15:8]

⁴Akaanguka chini, akasikia sauti ikimwambia, Sauli, Sauli, mbona waniudhi?

⁵Akasema, U nani wewe, Bwana? Naye akasema, Mimi ndimi Yesu unayeniudhi wewe.[#Mdo 5:39]

⁶Lakini simama, uingie mjini, nawe utaambiwa yakupasayo kutenda.

⁷Na wale watu waliosafiri pamoja naye wakasimama kimya, wakiisikia sauti, wasione mtu.

⁸Sauli akainuka katika nchi, na macho yake yalipofumbuka, hakuona kitu; wakamshika mkono wakamleta mpaka Dameski.

⁹Akawa siku tatu haoni; hali, wala hanywi.

¹⁰Basi palikuwapo Dameski mwanafunzi jina lake Anania. Bwana akamwambia katika maono, Anania. Akasema, Mimi hapa, Bwana.[#Mdo 10:17; 16:9]

¹¹Bwana akamwambia, Simama, enenda zako katika njia iitwayo Nyofu, ukaulize katika nyumba ya Yuda mtu aitwaye Sauli, wa Tarso; maana, angalia, anaomba;[#Mdo 21:39]

¹²naye amemwona mtu, jina lake Anania, akiingia, na kumwekea mikono juu yake, apate kuona tena.

¹³Lakini Anania akajibu, Bwana, nimesikia habari za mtu huyu kwa watu wengi, mabaya mengi aliyowatenda watakatifu wako Yerusalemu;

¹⁴hata hapa ana amri itokayo kwa wakuu wa makuhani awafunge wote wakuitiao Jina lako.[#1 Kor 1:2; Mdo 22:16; 2 Tim 2:22]

¹⁵Lakini Bwana akamwambia, Nenda tu; kwa maana huyu ni chombo kiteule kwangu, alichukue Jina langu mbele ya Mataifa, na wafalme, na wana wa Israeli.[#Rum 1:5; Mdo 25:13; 27:24; 2 Kor 4:7]

¹⁶Maana nitamwonyesha yalivyo mengi yatakayompasa kuteswa kwa ajili ya Jina langu.[#Mdo 23:29; 2 Kor 11:23-28]

¹⁷Anania akaenda zake, akaingia mle nyumbani; akamwekea mikono akisema, Ndugu Sauli, Bwana amenituma, Yesu, yeye aliyekutokea katika njia uliyoijia, upate kuona tena, ukajazwe Roho Mtakatifu.

¹⁸Mara vikaanguka machoni pake vitu kama magamba, akapata kuona, akasimama, akabatizwa;

¹⁹akala chakula, na kupata nguvu.

Sauli Ahubiri katika Dameski

Akawa huko siku kadha wa kadha pamoja na wanafunzi walioko Dameski.

²⁰Mara akamhubiri Yesu katika masinagogi, kwamba yeye ni Mwana wa Mungu.

²¹Na wote waliosikia wakashangaa, wakasema, Siye huyu aliyewaharibu walioliitia Jina hili huko Yerusalemu? Na hapa alikuwa amekuja kwa kusudi hilo, awafunge na kuwapeleka kwa wakuu wa makuhani?[#Mdo 8:1; 9:1,14; 26:10]

²²Sauli akazidi kuwa hodari, akawatia fadhaa Wayahudi waliokaa Dameski, akithibitisha ya kuwa huyu ndiye Kristo.[#Mdo 18:28]

Sauli Aokoka Kuuawa na Wayahudi

²³Hata siku nyingi zilipopita, Wayahudi wakafanya shauri ili wamwue;[#2 Kor 11:32-33; #Mdo 23:12-29]

²⁴lakini hila yao ikajulikana na Sauli. Wakamvizia malangoni mchana na usiku wapate kumwua.[#Mdo 23:16]

²⁵Wanafunzi wake wakamtwaa usiku wakamshusha ukutani, wakimtelemsha katika kapu.

Sauli akiwa Yerusalemu

²⁶Na Sauli alipofika Yerusalemu, alijaribu kujiunga na wanafunzi, nao walikuwa wakimwogopa wote, wasisadiki ya kuwa yeye ni mwanafunzi.[#Gal 1:17-19]

²⁷Lakini Barnaba akamtwaa, akampeleka kwa mitume, akawaeleza jinsi alivyomwona Bwana njiani, na ya kwamba alisema naye, na jinsi alivyohubiri kwa ushujaa katika Dameski kwa jina la Yesu.[#Mdo 9:20]

²⁸Naye akawa pamoja nao katika Yerusalemu akiingia na kutoka.

²⁹Akahubiri kwa jina la Bwana kwa ushujaa, akinena na kuhojiana na Wayahudi wa Kiyunani. Nao wakajaribu kumwua.

³⁰Lakini ndugu walipopata habari wakamchukua mpaka Kaisaria, wakampeleka aende Tarso.[#Mdo 11:25; Gal 1:21]

³¹Basi kanisa likapata raha katika Uyahudi wote na Galilaya na Samaria, likajengwa, likiendelea na kuongezeka katika kicho cha Bwana, na faraja ya Roho Mtakatifu.

Kuponywa kwa Ainea

³²Hata Petro alipokuwa akizunguka-zunguka pande zote akawatelemkia na watakatifu waliokaa Lida.

³³Akamwona mtu mmoja huko, jina lake Ainea, mtu huyo amelala kitandani miaka minane; maana alikuwa amepooza.

³⁴Petro akamwambia, Ainea, Yesu Kristo akuponya; ondoka, ujitandikie. Mara akaondoka.

³⁵Na watu wote waliokaa Lida na Sharoni wakamwona, wakamgeukia Bwana.

Petro akiwa Lida na Yafa

³⁶Na mwanafunzi mmoja alikuwako Yafa, jina lake Tabitha, tafsiri yake ni Dorkasi (yaani paa); mwanamke huyu alikuwa amejaa matendo mema na sadaka alizozitoa.

³⁷Ikawa siku zile akaugua, akafa; hata walipokwisha kumwosha, wakamweka orofani.

³⁸Na kwa kuwa mji wa Lida ulikuwa karibu na Yafa, nao wanafunzi wamesikia ya kwamba Petro yuko huko, wakatuma watu wawili kwake, kumsihi na kusema, Usikawie kuja kwetu.

³⁹Petro akaondoka akafuatana nao. Alipofika, wakampeleka juu orofani wajane wote wakasimama karibu naye, wakilia na kumwonyesha zile kanzu na nguo alizozishona Dorkasi wakati ule alipokuwa pamoja nao.

⁴⁰Petro akawatoa nje wote, akapiga magoti, akaomba, kisha akaelekea yule maiti, akanena, Tabitha, ondoka. Naye akafumbua macho yake, na alipomwona Petro akajiinua, akaketi.[#Mk 5:40,41]

⁴¹Akampa mkono, akamwinua; hata akiisha kuwaita wale watakatifu na wajane akamweka mbele yao, hali yu hai.[#Mdo 9:32]

⁴²Ikajulikana katika mji mzima wa Yafa; watu wengi wakamwamini Bwana.

⁴³Basi Petro akakaa siku kadha wa kadha huko Yafa, nyumbani mwa mtu mmoja, jina lake Simoni, mtengenezaji wa ngozi.[#Mdo 10:6]