Mungu Amesema Kupitia Mwanaye

¹Zamani Mungu alisema na baba zetu kwa kuwatumia manabii. Alisema nao mara nyingi na kwa njia nyingi tofauti.

²Lakini sasa katika siku hizi za mwisho Mungu amesema nasi tena kupitia Mwana wake. Mungu aliuumba ulimwengu wote kupitia Mwana wake. Na alimchagua Mwana kumiliki mambo yote.

³Huyo Mwana huuonesha utukufu wa Mungu. Yeye ni nakala halisi ya asili yake Mungu, na huviunganisha vitu vyote pamoja kwa amri yake yenye nguvu. Mwana aliwasafisha watu kutoka katika dhambi zao. Kisha akaketi upande wa kuume wa Mungu, aliye Mkuu huko Mbinguni.[#1:3 Mahali pa heshima na mamlaka (nguvu).]

⁴Mwana akawa mkuu zaidi kuliko malaika, na Mungu akampa jina lililo kuu zaidi kuliko lolote katika majina yao.

⁵Mungu kamwe hajamwambia malaika yeyote maneno haya:

“Wewe ni Mwanangu.

Mimi leo hii nimekuwa Baba yako.”

Mungu pia kamwe hajasema juu ya malaika,

“Nitakuwa Baba yake,

naye atakuwa mwanangu.”

⁶Na kisha, pale Mungu anapomtambulisha Mwanaye mzaliwa wa kwanza ulimwenguni, anasema,[#1:6 Hii inaweza kumaanisha ulimwengu ambamo Yesu alizaliwa (tazama Lk 2:1-14) au inaweza kuwa na maana ile ile kama katika 2:5, yaani, ulimwengu unaokuja; ambamo Kristo ametajwa kama mfalme baada ya kufufuka kwake (tazama Flp 2:9-11).]

“Basi malaika wote wa Mungu wamwabudu yeye.”

⁷Hivi ndivyo Mungu alivyosema kuhusu malaika:

“Yeye huwabadilisha malaika zake kuwa upepo

na watumishi wake kuwa miali ya moto.”

⁸Lakini hivi ndivyo alivyosema kuhusu Mwana wake:

“Mungu, ufalme wako utadumu milele na milele.

Unatumia mamlaka yako kwa haki.

⁹Unapenda kilicho sahihi na kuchukia kilicho na makosa.

Hivyo Mungu, Mungu wako, amekuchagua wewe,

na amekupa heshima na furaha zaidi kupita yeyote aliye kama wewe.”

¹⁰Pia Mungu alisema,

“Ee Bwana, mwanzo uliiumba dunia,

na mikono yako ikaliumba anga.

¹¹Vitu hivi vitatoweka, lakini wewe utaendelea kuwepo.

Vyote vitachakaa kama mavazi makuu kuu.

¹²Utavikunja hivyo kama koti,

navyo vitabadilishwa kama mavazi.

Lakini wewe hubadiliki,

na uhai wako hautafikia mwisho.”

¹³Na Mungu hakuwahi kusema haya kwa malaika:

“Ukae mkono wangu wa kuume

hadi nitakapowaweka adui zako chini ya uwezo wako.”

¹⁴Malaika wote ni roho ambao humtumikia Mungu nao hutumwa kuwasaidia wale watakaoupokea wokovu.