Exodus 21

¹“Ito ang mga tuntuning ipapatupad mo sa mga Israelita:

Ang Pagtrato sa mga Alipin

²“Kung bibili kayo ng mga aliping Hebreo, maglilingkod siya sa inyo sa loob ng anim na taon. Ngunit sa ikapitong taon, lalaya siya sa pagkaalipin niya na walang babayaran.

³Kung wala siyang asawa nang nabili ninyo, lalaya siyang mag-isa. Ngunit kung may asawa siya nang nabili ninyo, lalaya rin ang kanyang asawa kasama niya.

⁴Kung binigyan siya ng amo niya ng mapapangasawa at nagkaanak sila, lalaya siya sa ikapitong taon, pero ang asawa at ang mga anak niya ay maiiwan sa kanyang amo.

⁵“Ngunit kung sasabihin ng alipin na minamahal niya ang kanyang amo, ang asawaʼt mga anak niya, at hindi niya gustong lumaya,

⁶dadalhin siya ng amo niya sa harapan ng Diyos doon sa may pintuan o hamba ng lugar na pinagsasambahan. Bubutasan ng amo niya ang isa sa tainga niya at magiging alipin siya ng amo niya magpakailanman.[#21:6 : O mga pinuno.]

⁷“Kung ipagbibili ng isang tao ang anak niyang babae upang gawing alipin, hindi siya lalaya kagaya ng lalaking alipin.

⁸Kung hindi masiyahan ang amo niyang pumili sa kanya para sa kanyang sarili, hayaan niya itong matubos. Wala siyang karapatang ipagbili ito sa mga dayuhan dahil hindi niya tinupad ang kanyang responsibilidad sa kanya.

⁹Kung ibibigay ng amo niya ang aliping ito sa kanyang anak bilang asawa, kailangan niya itong ituring siya na anak na babae.

¹⁰Kung gagawin niyang asawa ang alipin, at mag-aasawa pa siya ng iba pang babae, kailangang ipagpatuloy niya ang pagbibigay sa kanya ng mga pagkain at damit, at ang pagsiping sa kanya.

¹¹Kung hindi niya masusunod ang tatlong bagay na ito, papayagan niyang lumaya ang babae nang walang bayad.

Mga Kautusan Tungkol sa mga Krimen

¹²“Ang sinumang makakasakit ng tao at mapatay ito, papatayin din siya.

¹³Ngunit kung hindi niya ito sinadya at pinayagan ko itong mangyari, makakatakas siya sa lugar na ituturo ko sa kanya.

¹⁴Ngunit kung sinadya niya at binalak ang pagpatay, patayin nʼyo siya kahit na lumapit pa siya sa altar ko.

¹⁵“Ang sinumang mananakit sa kanyang ama o ina ay papatayin.[#21:15 : O papatay.]

¹⁶“Ang sinumang dudukot sa isang tao ay papatayin kahit na ipinagbili na niya o hindi ang kanyang dinukot.

¹⁷“Ang sinumang lumapastangan sa kanyang ama at ina ay papatayin.

¹⁸“Halimbawang nag-away ang dalawang tao, sinuntok o binato ang kanyang kaaway at siyaʼy nabalda at hindi na makabangon pero hindi namatay,

¹⁹ngunit kung sa bandang huliʼy makabangon at makalakad ang napilay, kahit na nakatungkod pa siya, ang taong nanakit sa kanyaʼy hindi dapat parusahan. Ngunit kailangang magbayad ang tao sa kanya sa nasayang na panahon, at kailangan siyang alagaan ng taong nanakit hanggang sa gumaling siya.

²⁰“Kapag hinagupit ng tungkod ng sinuman ang kanyang alipin, lalaki man o babae, at agad itong namatay, parurusahan siya.

²¹Ngunit kung makakabangon ang alipin pagkalipas ng isa o dalawang araw, hindi siya parurusahan dahil pagmamay-ari niya ang alipin.

²²“Kung may nag-aaway at nasaktan ang isang buntis, at napaanak ito nang wala pa sa oras, pero walang masamang nangyari sa kanya, pagbabayarin ang nakasakit ayon sa halagang hinihingi ng asawa at pinayagan ng hukom.[#21:22 : O nalaglag.]

²³Ngunit kung malubha ang nangyari sa babae, parurusahan ang responsable dito katulad ng nangyari sa kanya. Kung namatay ito, papatayin din ang responsable dito.

²⁴Kung nabulag ito, bubulagin din siya. Kung nabungi ang ngipin nito, bubungiin din siya. Kung nabali ang kamay o paa nito, babaliin din ang kanyang kamay o paa.

²⁵Kung napaso, papasuin din siya. Kung nasugatan, susugatan din siya. Kung nagalusan, gagalusan din siya.

²⁶“Kung sinuntok ng amo ang kanyang aliping lalaki o babae sa mata at nabulag ito, palalayain niya ito sa pagkaalipin bilang bayad sa mata na binulag niya.

²⁷Kung nabungi niya ang ngipin ng kanyang aliping lalaki o babae, palalayain din niya ito sa pagkaalipin bilang bayad sa ngiping nabungi.

²⁸“Kung ang toro ay nakasuwag ng lalaki o babae at namatay siya, kailangang batuhin ang toro hanggang sa mamatay, at huwag kakainin ang karne nito, pero walang pananagutan dito ang may-ari ng toro.

²⁹Ngunit kung nasanay nang manuwag ang toro at binigyan na ng babala ang may-ari tungkol dito, pero hindi niya ito ikinulong at nakapatay ito ng tao, kailangang batuhin ito hanggang sa mamatay at papatayin din ang may-ari.

³⁰Ngunit kung pagbabayarin ang may-ari upang mabuhay siya, kailangang bayaran niya nang buo ang halagang hinihingi sa kanya.

³¹Ganito rin ang tuntunin kung nakasuwag ang toro ng bata, lalaki man o babae.

³²Kung nakasuwag ang toro ng alipin, lalaki man o babae, kailangang magbayad ang may-ari nito ng 30 pirasong pilak sa amo ng alipin, at kailangang batuhin ang toro.

³³“Kung may taong nagtanggal ng takip ng balon o taong naghukay ng balon at hindi niya ito tinakpan, at may nahulog na baka o asno sa balong iyon,

³⁴dapat magbayad ang may-ari ng balon sa may-ari ng hayop, at magiging kanya na ang hayop.

³⁵“Kung makapatay ang toro ng kapwa toro, ipagbibili ng parehong may-ari ang buháy na toro at hahatiin ang pinagbentahan nito. Hahatiin din nila ang karne ng namatay na toro.

³⁶Ngunit kung nasanay nang manuwag ang torong nakapatay at hindi ito ikinulong ng may-ari, magbabayad ang may-ari ng isang toro kapalit ng namatay, at magiging kanya na ang namatay na toro.