Ezekiel 26

Ang Pahayag Laban sa Tiro

¹Noong unang araw ng buwan, nang ikalabing-isang taon ng aming pagkabihag, sinabi ng Panginoon sa akin,

²“Anak ng tao, natuwa ang mga taga-Tiro nang mawasak ang Jerusalem. Ang sabi nila, ‘Nawasak na ang pangunahing pinupuntahan ng mga mangangalakal kaya dito na sila pupunta sa atin at tayo naman ang uunlad.’

³Kaya ako, ang Makapangyarihang Panginoon , ay nagsasabing kakalabanin ko ang Tiro. Ipasasalakay ko sila sa maraming bansa, darating ang mga ito na parang rumaragasang alon.

⁴Gigibain ang mga pader niya at wawasakin ang kanyang mga tore. Kakalkalin nila ang lupain niya hanggang sa walang matira kundi mga bato.

⁵At magiging bilaran na lang ito ng mga lambat ng mangingisda. Mangyayari ito dahil ako, ang Makapangyarihang Panginoon , ang nagsasabi nito. Ipauubaya ko ang Tiro sa ibang mga bansa at sasamsamin nila ang mga ari-arian niya.

⁶Ang mga mamamayan niya sa mga bukid ay papatayin sa pamamagitan ng espada, at malalaman nilang ako ang Panginoon .”

⁷Sinabi pa ng Makapangyarihang Panginoon , “Mga taga-Tiro, ipasasalakay ko kayo sa hari ng mga hari, kay Haring Nebucadnezar ng Babilonia. Sasalakay siya mula sa hilaga kasama ang maraming sundalo, mga karwahe, mga kabayo at mga mangangabayo.

⁸Ang mga mamamayan ninyo sa baryo ay ipapapatay niya sa pamamagitan ng espada. Sasalakay ang kanyang mga sundalo dala ang mga pangwasak ng pader, at tatambakan nila ng lupa ang gilid ng inyong mga pader upang maakyat ito.

⁹Ipapawasak niya ang mga pader ninyo sa pamamagitan ng trosong pangwasak nito at ang mga tore ninyo sa pamamagitan ng maso.

¹⁰Matatabunan kayo ng alikabok dahil sa dami ng kabayong gagamitin niya sa pagsalakay. Mayayanig ang mga pader ninyo dahil sa yabag ng mga kabayo at karwaheng papasok sa giba ninyong lungsod.

¹¹Mapupuno ng nagtatakbuhang kabayo ang mga lansangan ninyo at papatayin nila ang mga mamamayan ninyo sa pamamagitan ng espada. Mabubuwal ang matitibay na haligi ninyo.

¹²Sasamsamin nila ang mga kayamanan at paninda ninyo. Wawasakin din nila ang mga pader at magagandang bahay ninyo. At itatapon nila sa dagat ang mga bato, kahoy at ang mga matitira sa winasak.

¹³Patitigilin ko ang mga awitan ninyo at pagtugtog ng alpa.

¹⁴Ang lugar ninyo ay gagawin kong isang malapad na bato at magiging patuyuan na lang ng lambat ng mga mangingisda. Hindi na muling maitatayo ang inyong lungsod ninyo sapagkat ako, ang Makapangyarihang Panginoon , ang nagsasabi nito.”

¹⁵“Sinabi pa ng Makapangyarihang Panginoon sa mga taga-Tiro: Ang mga nakatira sa tabing-dagat ay manginginig sa takot kapag narinig nila ang pagkawasak ninyoʼt pagkamatay, at ang pagdaing ng inyong mga sugatan.

¹⁶Ang mga pinuno ng mga tabing-dagat ay bababa sa kanilang trono, huhubarin ang kanilang mga damit panghari at naggagandahang damit-panloob. Uupo sila sa lupa na nanginginig sa takot dahil sa sinapit mo.

¹⁷At tataghoy sila nang ganito para sa iyo:

‘Paano kang bumagsak,

ikaw na tanyag na lungsod na

tinatahanan ng mga tao

sa tabing-dagat?

Makapangyarihan ka sa karagatan

at kinatatakutan ng lahat.

¹⁸At ngayon, ang mga nakatira sa tabing-dagat

ay nanginginig sa takot

sa araw ng iyong pagbagsak;

ang mga isla sa karagatan ay nasindak

dahil sa iyong pagkawasak.’

¹⁹“Sinabi pa ng Makapangyarihang Panginoon : O Tiro, magiging tiwangwang kang lungsod, isang lungsod na walang nakatira. Ibabaon kita sa malalim na tubig.

²⁰Ililibing kita sa kailaliman kasama ng mga tao noong unang panahon. Mananatili kang wasak sa ilalim ng lupa kasama ng mga taong naibaon doon, at hindi ka na makakabalik sa lugar ng mga buháy.

²¹Tatapusin na kita, at nakakatakot ang magiging katapusan mo. Mawawala ka na at kahit hanapin ka, hindi ka na matatagpuan. Ako, ang Makapangyarihang Panginoon , ang nagsasabi nito.”