Ezekiel 40

Ang Bagong Templo

¹Noong ikasampung araw ng unang buwan, nang ikadalawampuʼt limang taon ng aming pagkabihag at ikalabing-apat na taon mula nang bumagsak ang lungsod, nilukuban ako ng kapangyarihan ng Panginoon .

²At ipinakita sa akin ng Diyos ang isang pangitain. Sa pangitaing iyon, dinala niya ako sa mataas na bundok ng Israel. Nang tumingin ako sa timog ay may nakita akong parang isang lungsod.

³Dinala ako roon ng Panginoon at may nakita akong isang tao na ang mukha ay parang kumikinang na tanso. Nakatayo siya malapit sa pintuan ng bayan at may hawak na panukat. Ang isa ay lubid na gawa sa lino at ang isa ay kahoy.

⁴Sinabi sa akin ng taong iyon, “Anak ng tao, makinig ka at tingnan mong mabuti ang ipapakita ko sa iyo dahil ito ang dahilan kung bakit kita dinala rito. Pagkatapos, sabihin mo sa mga mamamayan ng Israel ang lahat ng nakita mo.”

⁵Nakita ko ang Templo na napapaligiran ng pader. Kinuha ng tao ang panukat niyang kahoy, na ang haba ay sampung talampakan, ayon sa umiiral na sukatan ay sinukat niya ang pader. Labing-isang talampakan ang taas nito at ganoon din ang kapal.

⁶Pagkatapos, pumunta ang tao sa daanan sa Templo na nakaharap sa silangan. Umakyat siya sa mga baitang at sinukat niya ang pasukan ng daanan, at sampung talampakan ang lalim nito.

⁷Sa bawat gilid ng daanang ito ay may tatlong silid na may guwardiyang nagbabantay. Ang bawat silid na itoʼy may sukat na sampung talampakan ang haba at ganoon din ang lawak, at ang kapal ng pader sa pagitan ay walong talampakan. Sa kabila ng mga silid ay may daanang papunta sa balkonahe na nakaharap sa Templo. Ang daanang ito ay sampung talampakan din ang haba.

⁸Sinukat din ng tao ang bulwagan;

⁹at labing-apat na talampakan ang haba nito. Ang kapal ng dingding sa magkabilang daanan ng balkonahe ay tatloʼt kalahating talampakan.

¹⁰Ang tatlong silid na kinaroroonan ng mga bantay ay pare-pareho ang luwang at ang mga pader sa pagitan nito ay pare-pareho rin ang kapal.

¹¹Sinukat din ng tao ang taas ng daanan papunta sa bakuran sa labas at itoʼy dalawampuʼt tatlong talampakan. Ngunit ang taas ng pintuan nito ay labingwalong talampakan.

¹²Sa harap ng bawat silid na kinaroroonan ng mga guwardiyang nagbabantay ay may mababang pader na dalawampung pulgada ang taas at dalawampung pulgada rin ang kapal. At ang mga silid na itoʼy labing-isang talampakan ang haba at ganoon din ang luwang.

¹³Pagkatapos, sinukat ng tao ang luwang ng daanan papunta sa bakuran sa labas, at itoʼy apatnapuʼt apat na talampakan. Ang sukat nitoʼy mula sa likod ng pader ng kuwartong kinaroroonan ng guwardiyang nagbabantay, papunta sa kabilang pader ng silid ding iyon.

¹⁴Sinukat niya ang pader mula sa pintuan papunta sa bulwagang nakaharap sa bakuran sa labas, at 105 na talampakan ang haba nito.

¹⁵Ang haba naman ng daanan mula sa pintuan hanggang sa dulo ng bulwagan ay walumpuʼt walong talampakan.

¹⁶May maliit na bintana sa bawat silid, kung saan naroon ang nagbabantay at sa pader sa gitna ng mga silid. Ang mga pader na ito ay may palamuting nakaukit na puno ng palma.

¹⁷Pagkatapos, dinala ako ng tao sa bakuran sa labas ng Templo. Nakita ko roon ang tatlumpung silid na nakahilera sa daanang bato na nakapaikot sa bakuran.

¹⁸Ang daanang bato na ito sa bandang ibaba ay umaabot hanggang sa gilid ng mga daanang papasok sa bakuran. Ang lawak ng daanang bato ay kapantay ng haba ng mga daanang iyon.

¹⁹Pagkatapos, sinukat ng tao ang layo mula sa daanang papasok sa bakuran sa labas ng Templo hanggang sa daanang papunta sa loob ng bakuran ng Templo at ang layo ay 175 talampakan.

²⁰Pagkatapos, sinukat ng tao ang haba at taas ng daanan sa hilaga. Ang daanang ito ay papunta sa labas ng patyo.

²¹Ang bawat gilid ng daanan ay may tatlo ring silid na kinaroroonan ng mga guwardiyang nagbabantay. Ang luwang ng mga silid na ito at ang pader sa pagitan, pati ang mga balkonahe nito ay katulad din ng daanan sa silangan. Ang haba ng daanan sa hilaga ay walumpuʼt walong talampakan at ang luwang ay apatnapuʼt apat na talampakan.

²²Ang mga bintana, balkonahe at palamuting palma ay katulad din ng nasa silangang daanan. May pitong baitang pataas sa daanan at may balkonahe sa dulo nito.

²³Mayroon ding daanan papunta sa bakuran sa loob, sa gawing hilagang daanan katulad ng daanan sa silangan. Sinukat din ng tao ang layo ng dalawang daanan, at itoʼy 175 talampakan.

²⁴Pagkatapos, dinala ako ng tao sa dakong timog at may nakita akong daanan doon. Sinukat niya ang balkonahe at ang magkabilang pader nito at ang sukat nito ay katulad din ng mga una niyang sinukat.

²⁵May mga bintana rin ito sa paligid ng daanan, at balkonahe katulad ng iba. Ang haba ng daanan ay walumpuʼt walong talampakan at ang luwang ay apatnapuʼt apat na talampakan.

²⁶Pito ang baitang nito paakyat sa daanan at may balkonahe sa dulo nito. Ang mga pader sa gilid ng daanan ay may mga palamuting palma.

²⁷Mayroon ding daanan ang bakuran sa loob, na nakaharap sa timog. Sinukat ito ng tao at ang layo mula sa daanang ito hanggang sa daanan sa labas sa timog ay 175 talampakan.

²⁸Pagkatapos, dinala ako ng tao sa bakuran sa loob. Doon kami dumaan sa daanang nasa timog. Sinukat niya ang daanan at katulad din ito ng iba.

²⁹Mayroon din itong mga silid na kinaroroonan ng mga guwardiya na nagbabantay. Ang laki ng mga silid nito at ang mga pader sa gitna, pati ang mga balkonahe ay katulad din ng iba. Mayroon ding mga bintana sa palibot ng daanan at ng balkonahe. Ang haba ng daanan ay walumpuʼt walong talampakan at ang luwang naman ay apatnapuʼt apat na talampakan.

³⁰(Ang mga balkonahe ng mga daanan na nakapaligid sa bakuran sa loob ay may habang walong talampakan at may luwang na apatnapuʼt apat na talampakan.)

³¹Ang balkonahe ng daanan sa bandang timog ay nakaharap sa bakuran sa labas, at napapalamutian ito ng puno ng palma na nakaukit sa mga pader. May walong baitang paitaas sa daanang ito.

³²Pagkatapos, muli akong dinala ng tao sa bakuran sa loob. Sa gawing silangan kami dumaan. Sinukat niya ang daanan at katulad din ito ng iba.

³³May mga silid din ito na kinaroroonan ng mga guwardiyang nagbabantay. Ang laki ng mga silid nito, at mga pader sa gitna, pati ang mga balkonahe nito ay katulad din ng sa iba. Mayroon ding mga bintana sa paligid ng daanan at ng balkonahe. Ang haba naman ng daanan ay walumpuʼt walong talampakan at ang luwang ay apatnapuʼt apat na talampakan.

³⁴Ang balkonahe nito ay nakaharap sa bakuran sa labas, at may mga palamuting palma na nakaukit sa magkabilang pader. May walong baitang din pataas sa daanang ito.

³⁵Pagkatapos, dinala ako ng tao sa daanan sa hilaga. Sinukat niya ang daanang ito at katulad din ito ng iba.

³⁶May mga silid din ito na kinaroroonan ng mga guwardiyang nagbabantay. Ang luwang ng mga silid na ito, at ang mga pader sa gitna, pati ang mga balkonahe ay katulad din ng iba. May mga bintana rin ito sa paligid ng daanan. At ang haba ng daanan ay walumpuʼt walong talampakan at ang luwang ay apatnapuʼt apat na talampakan.

³⁷Ang balkonahe nito ay nakaharap sa bakuran sa labas, at may mga palamuting puno ng palma na nakaukit sa pader. May walong baitang pataas sa daanang ito.

³⁸Pagkatapos, may nakita akong silid na may pintuan, sa tapat ng balkonahe sa daanang nasa hilaga. Doon sa silid na iyon hinuhugasan ang mga handog na sinusunog.

³⁹Sa magkabilang panig ng balkonahe ay may dalawang mesa na pinagkakatayan ng mga hayop na handog na sinusunog, handog para sa kasalanan at handog na pambayad ng kasalanan.

⁴⁰Mayroon pang dalawang mesa sa magkabilang tabi ng hagdan bago umakyat sa daanan sa hilaga.

⁴¹Kaya walong lahat ang mesa na pinagkakatayan ng mga handog. Apat sa balkonahe at apat sa tabi ng daan.

⁴²Mayroon ding apat na mesa roon na gawa sa batong tinapyas. Doon inilalagay ang mga kagamitan na pangkatay ng hayop na handog na sinusunog, at iba pang mga handog. Itoʼy dalawampuʼt isang pulgada ang taas, ang luwang at haba ay parehong mahigit na tatlumpung pulgada.

⁴³Sa palibot ng dingding ng balkonahe ay may mga sabitan na tatlong pulgada ang haba. At naroon sa mga mesa ang mga karneng ihahandog.

⁴⁴May dalawang silid doon sa bakuran sa loob. Ang isa ay nasa tabi ng daanan sa hilaga, nakaharap sa timog at ang isa naman ay nasa tabi ng daanan sa timog, nakaharap sa hilaga.

⁴⁵Sinabi sa akin ng tao, “Ang silid na nakaharap sa timog ay para sa mga paring namamahala sa Templo,

⁴⁶at ang silid na nakaharap sa hilaga ay para sa mga paring namamahala sa altar. Ang mga ito ay mga anak na lalaki ni Sadoc, at sila lang na mga Levita ang pinayagang makalapit at maglingkod sa harap ng Panginoon .”

⁴⁷Sinukat ng tao ang luwang ng bulwagan at itoʼy 175 talampakan at ganoon din ang haba. Ang altar ay nasa harap ng Templo.

⁴⁸Pagkatapos, dinala ako ng tao sa balkonahe ng Templo at sinukat niya ang magkabilang pader ng daanan ng balkonahe, at ang bawat pader ay may taas na walong talampakan at limang talampakan ang kapal. Ang luwang ng daanan ng balkonahe ay dalawampuʼt limang talampakan.

⁴⁹Ang haba ng balkonahe ay tatlumpuʼt limang talampakan at ang luwang ay dalawampuʼt isang talampakan. May sampung baitang ito pataas papunta sa balkonahe at may haligi sa magkabilang tabi.