Isaias 56

Ang Pagpapala sa Lahat ng Bansa

¹Ito ang sinasabi ng Panginoon :

“Pairalin ninyo ang katarungan at katuwiran

dahil malapit ko na kayong iligtas.

²Mapalad ang mga taong gumagawa nito,

ang taong nagpapanatili nito,

Mapalad silang mga sumusunod

sa mga ipinapagawa ko

sa Araw ng Pamamahinga

at hindi nilalapastangan ito.

Mapalad din ang taong

hindi gumagawa ng masama.”

³Huwag isipin ng mga dayuhang nag-alay

ng kanilang sarili sa Panginoon

na hindi sila ibibilang ng Panginoon

sa kanyang mga mamamayan.

Huwag ding isipin

ng mga opisyal na nagpakapon

na dahil hindi na sila magkakaanak,

ay hindi sila maaaring ibilang

sa mga mamamayan ng Diyos.

⁴Sapagkat ito ang sinasabi ng Panginoon ,

“Pagpapalain ko ang mga opisyal nagpakapon

na sumusunod sa mga ipinapagawa ko

sa Araw ng Pamamahinga

at gumagawa ng mga bagay

na nakakalugod sa akin,

at tumutupad sa aking kasunduan.

⁵Papayagan ko silang makapasok sa aking Templo

at pararangalan ko sila nang higit pa

sa karangalang ibibigay sa kanila

kung silaʼy nagkaanak.

At hindi sila makakalimutan

ng mga tao magpakailanman.

⁶Pagpapalain ko rin

ang mga dayuhang nag-alay

ng sarili nila sa Panginoon

para paglingkuran ako, mahalin,

sambahin, at sundin ang aking ipinapagawa

sa Araw ng Pamamahinga,

hindi ito nilalapastangan,

at tumutupad sa aking kasunduan.

⁷Dadalhin ko sila

sa aking banal na bundok

at aaliwin doon sa aking templong dalanginan.

Tatanggapin ko sa aking altar

ang kanilang mga handog na sinusunog

at iba pang mga handog,

sapagkat ang aking bahay ay tatawaging

bahay-panalanginan ng mga tao

mula sa lahat ng bansa.”

⁸Sinabi pa ng Makapangyarihang Panginoon

na nagtipon sa mga Israelitang nabihag,

“Titipunin ko pa ang iba,

maliban doon sa mga natipon ko na.”

Ang Paratang ng Diyos Laban sa Masasama

⁹Lumapit kayo at lipulin sila,

kayong lahat ng mga bansa

na tulad ng mababangis na hayop.

¹⁰Sapagkat ang mga pinuno ng Israel,

silang mga tagapagbantay at mga pastol,

ay parang mga bulag at mga walang nalalaman.

Para silang mga asong hindi tumatahol.

Ang gusto nilaʼy mahiga,

matulog, at managinip.

¹¹Para silang mga asong matatakaw

na walang kabusugan.

Ang mga tagapag-alaga ng Israel

ay walang pang-unawa.

Ang bawat isa sa kanilaʼy gumagawa

ng kahit anong gusto nila,

at ang pansariling kapakanan lang

ang kanilang pinagkakaabalahan.

¹²Sinabi pa nila, “Halikayo,

kumuha tayo ng inumin

at maglasing!

Ang bukas ay tulad lang din ng sa ngayon,

o di kayaʼy mas mabuti pa.”