Mga Hukom 17

Ang mga diyos-diyosan ni Micas

¹May isang lalaking nakatira sa kaburulan ng Efraim na ang pangalan ay Micas.

²Isang araw, sinabi niya sa kanyang ina, “Narinig ko pong isinumpa nʼyo ang kumuha ng inyong isang libo at isang daang pirasong pilak. Narito ang pilak, ako po ang kumuha.”

Sinabi ng kanyang ina, “Anak, pagpalain ka sana ng Panginoon .”

³Ibinalik ni Micas ang isang libo at isang daang pirasong pilak sa kanyang ina, at sinabi ng kanyang ina, “Inihahandog ko itong pilak sa Panginoon para sa kapakanan ng aking anak. Gagamitin ko ito para magpagawa ng mga imahen ng diyos-diyosan na yari sa kahoy at bakal. Kaya ibinabalik ko itong pilak saʼyo.”

⁴Pagkatapos, kumuha siya ng dalawandaang piraso ng pilak at ibinigay sa platero. Ginamit ito ng platero para gumawa ng mga imaheng yari sa kahoy at bakal. Nang natapos na, inilagay niya ang mga ito sa bahay ni Micas.

⁵May sariling sambahan si Micas at nagpagawa siya ng efod at mga diyos-diyosan. At ginawa niyang pari ang isa sa mga anak niyang lalaki.

⁶Nang panahong iyon, walang hari sa Israel, kaya ang bawat isa ay gumagawa ng kahit anong gusto nilang gawin.

⁷May isang binatilyong Levita mula sa Bethlehem na sakop ng Juda. Siya ay nakikitira sa lahi ni Juda.

⁸Isang araw, umalis siya upang maghanap ng matitirhan sa ibang lugar. Sa kanyang pag-alis, napadaan siya sa bahay ni Micas sa kaburulan ng Efraim.

⁹Tinanong siya ni Micas, “Taga-saan ka?”

Sumagot siya, “Taga-Bethlehem po ako, na sakop ng Juda, at isa po akong Levita. Naghahanap po ako ng matitirhan.”

¹⁰Sinabi ni Micas, “Sa akin ka na lang tumira. Gagawin kitang tagapayo ko at pari. At bawat taon, bibigyan kita ng sampung pirasong pilak, bukod pa sa mga damit at pagkain.”

¹¹Kaya pumayag ang Levita na makitira sa kanya, at ang binata ay itinuring niyang isa sa kanyang mga anak.

¹²Ginawa siyang pari ni Micas at doon pinatira sa kanyang bahay.

¹³Sinabi ni Micas, “Ngayon, natitiyak kong pagpapalain ako ng Panginoon dahil may pari na akong Levita.”