Mga Hukom 2

Ang Anghel ng Panginoon sa Boquim

¹Pumunta ang anghel ng Panginoon sa Boquim mula sa Gilgal. At sinabi niya sa mga Israelita ang ipinasasabi ng Panginoon, “Inilabas ko kayo sa Ehipto at dinala dito sa lupain na ipinangako ko sa inyong mga ninuno. Sinabi ko noon na hindi ko sisirain ang kasunduan ko sa inyo.

²Sinabi ko rin na huwag kayong gagawa ng kasunduan sa mga tao sa lupaing ito, sa halip ay gibain nʼyo ang kanilang mga altar. Ngunit ano ang ginawa ninyo? Hindi nʼyo ako sinunod!

³Kaya ngayon, hindi ko sila itataboy sa lupain ninyo. Magiging tinik sila sa daraanan ninyo at ang mga diyos nila ay magiging bitag sa inyo.”

⁴Nang matapos sabihin ng anghel ng Panginoon ang lahat ng mga ito, humagulgol sila.

⁵Kaya tinawag nilang Boquim ang lugar na iyon. At naghandog sila doon sa Panginoon .[#2:5 : Ang ibig sabihin, pag-iyak.]

⁶Nang pinauwi na ni Josue ang mga Israelita, umalis ang bawat lahi upang angkinin ang lupaing nakalaan para sa kanila.

⁷At naglingkod sila sa Panginoon habang nabubuhay si Josue. At kahit namatay na siya, patuloy pa rin silang naglingkod sa Panginoon habang nabubuhay ang mga tagapamahala ng Israel na nakakita ng lahat ng kahanga-hangang ginawa ng Panginoon para sa Israel.

⁸Ang lingkod ng Panginoon na si Josue na anak ni Nun ay namatay sa edad na 110.

⁹Inilibing siya sa kanyang minanang lupain doon sa Timnat-heres, sa kaburulan ng Efraim, sa hilaga ng Bundok ng Gaas.

Sumuway ang Israel sa Panginoon

¹⁰Nang mamatay na ang mga tao sa henerasyong iyon, ang sumunod na salinlahi ay nakalimot sa Panginoon , maging sa mga ginawa niya para sa Israel.

¹¹At gumawa ng kasamaan ang mga Israelita sa paningin ng Panginoon at naglingkod sa mga imahen ni Baal.

¹²Itinakwil nila ang Panginoon , ang Diyos ng kanilang mga ninuno, na siyang naglabas sa kanila sa Ehipto. Sinunod nila at sinamba ang ibaʼt ibang diyos ng mga tao sa paligid nila. Nagalit ang Panginoon ,

¹³dahil itinakwil siya ng mga ito at naglingkod sila kay Baal at sa mga imahen ni Astoret.[#2:13 Ang ibang pangalan niya ay Astarte.]

¹⁴Dahil sa galit ng Panginoon sa Israel, pinabayaan niyang lusubin sila ng mga tulisan upang samsamin ang kanilang mga ari-arian. Pinabayaan din sila ng Panginoon na matalo ng mga kaaway sa paligid nila hanggang hindi na nila makayanang ipagtanggol ang kanilang sarili.

¹⁵Tuwing nakikipaglaban sila, pinapatalo sila ng Panginoon , tulad ng sinabi niya. Kaya labis silang nahirapan.

¹⁶Ngayon, binigyan ng Panginoon ang Israel ng mga hukom na magliligtas sa kanila mula sa mga tulisan.[#2:16 : Hindi lang sila hukom, kundi sila rin ay mga pinuno at kumander ng mga sundalo, dahil wala pang mga hari noon.]

¹⁷Ngunit hindi nila pinakinggan ang kanilang mga hukom. Sa halip, tumalikod sila sa Panginoon at sumamba sa ibang mga diyos. Hindi sila katulad ng kanilang mga ninuno. Napakadali nilang tumalikod sa mga utos ng Diyos na sinunod noon ng kanilang mga ninuno.

¹⁸Tinutulungan ng Panginoon ang lahat ng hukom na isinusugo niya. At habang nabubuhay ang hukom nila, inililigtas sila ng Panginoon sa kanilang mga kaaway. Sapagkat naaawa siya sa kanila dahil sa mga pagtitiis nila sa mga nanggigipit at nagpapahirap sa kanila.

¹⁹Ngunit kapag namatay na ang hukom, bumabalik na naman sila sa masasama nilang gawa. Muli silang naglilingkod at sumasamba sa ibang mga diyos nang mas masahol pa sa pagkakasala ng kanilang mga ninuno. Ayaw nilang talikuran ang masasamang gawain nila at ang katigasan ng kanilang mga ulo.

²⁰Kaya lalo pang nagalit ang Panginoon sa kanila. Sinabi ng Panginoon , “Dahil nilabag ng bansang ito ang aking kasunduan sa kanilang mga ninuno, at hindi nila ako sinunod,

²¹hindi ko na itataboy ang natirang mga bansa na hindi nasakop ni Josue bago siya namatay.

²²Gagamitin ko ang mga bansang ito upang subukin ang mga Israelita kung talagang tutuparin nila ang aking mga utos katulad ng kanilang mga ninuno.”

²³Ito ang dahilan kung bakit hindi agad itinaboy ng Panginoon ang natirang mga bansa at hindi niya pinahintulutang matalo ni Josue ang mga ito.