Juan 20

Muling Nabuhay si Hesus

¹Kinaumagahan ng Linggo, habang madilim pa, pumunta si Maria na taga-Magdala sa libingan. Nakita niyang naalis na ang batong nakatakip sa pintuan nito.

²Kaya tumakbo siya at pumunta kay Simon Pedro at sa alagad na malapit sa puso ni Hesus. At sinabi niya sa kanila, “Kinuha nila sa libingan ang Panginoon at hindi namin alam kung saan siya dinala.”

³Kaya tumakbo si Pedro papunta sa libingan kasama ang nasabing alagad.

⁴Pareho silang tumakbo, pero mas mabilis ang isa kaysa kay Pedro, kaya nauna itong nakarating sa libingan.

⁵Yumuko siya at sumilip sa loob ng libingan. Nakita niya ang mga telang lino na ipinambalot kay Hesus, pero hindi siya pumasok.

⁶Kasunod naman niyang dumating si Simon Pedro, at pumasok siya sa loob ng libingan. Nakita niya roon ang mga telang lino,

⁷maging ang ipinambalot sa ulo ni Hesus. Nakatiklop ito sa mismong lugar nito, at nakahiwalay sa mga telang lino.

^8-9Pumasok na rin ang alagad na naunang nakarating, at nakita rin niya ang mga ito. Kahit na hindi pa nila nauunawaan ang tungkol sa sinasabi ng Kasulatan na si Hesus ay muling mabubuhay, naniwala siya.

¹⁰Pagkatapos nito, umuwi ang dalawang alagad.

Nagpakita si Hesus kay Maria na Taga-Magdala

¹¹Naiwan si Maria sa labas ng libingan na umiiyak. Habang umiiyak, sumilip siya sa loob ng libingan

¹²at nakita niya ang dalawang anghel na nakaputi. Nakaupo sila sa pinaglagyan ng bangkay ni Hesus, isa sa may ulunan at isa sa may paanan.

¹³Tinanong nila si Maria, “Babae, bakit ka umiiyak?”

Sumagot siya, “May kumuha sa Panginoon ko, at hindi ko alam kung saan siya dinala.”

¹⁴Pagkasabi nitoʼy lumingon siya at nakita si Hesus na nakatayo, pero hindi niya nakilala na si Hesus iyon.

¹⁵Tinanong siya ni Hesus, “Babae, bakit ka umiiyak? Sino ba ang hinahanap mo?”

Sa pag-aakalang siya ang hardinero doon, sumagot si Maria, “Kung kayo po ang kumuha sa kanya, ituro nʼyo sa akin kung saan nʼyo siya dinala, at kukunin ko siya.”

¹⁶Sinabi ni Hesus sa kanya, “Maria!”

Humarap si Maria kay Hesus at sinabi sa wikang Hebreo, “Raboni!” (na ang ibig sabihin ay “Guro”).

¹⁷Sinabi ni Hesus, “Huwag mo akong hawakan, dahil hindi pa ako nakakabalik sa aking Ama. Pumunta ka sa mga kapatid ko at sabihing babalik na ako sa aking Ama na inyong Ama, at sa aking Diyos na inyong Diyos.”

¹⁸Kaya pinuntahan ni Maria na taga-Magdala ang mga alagad ni Hesus at ibinalita sa kanila na nakita niya ang Panginoon. At sinabi niya sa kanila ang mga ipinasasabi ni Hesus.

Nagpakita si Hesus sa mga Alagad Niya

¹⁹Nang takip-silim na ng araw na iyon ng Linggo, nagsama-sama ang mga alagad ni Hesus. Ikinandado nila ang mga pinto dahil sa takot sa mga pinuno ng mga Hudyo. Dumating si Hesus at tumayo sa gitna nila, at sinabi, “Sumainyo ang kapayapaan.”

²⁰Pagkasabi niya nito, ipinakita niya ang mga kamay at tagiliran niya. Labis na natuwa ang mga alagad nang makita nila ang Panginoon.

²¹Muling sinabi ni Hesus sa kanila, “Sumainyo ang kapayapaan. Kung paanong sinugo ako ng Ama, isinusugo ko rin kayo.”

²²Pagkasabi niya nito, hiningahan niya sila at sinabi, “Tanggapin nʼyo ang Banal na Espiritu.

²³Kung patatawarin nʼyo ang kasalanan ng isang tao, pinatawad na siya ng Diyos. At kung hindi nʼyo patatawarin ang kanyang kasalanan, hindi rin siya pinatawad ng Diyos.”

Ang Pagdududa ni Tomas

²⁴Si Tomas (na tinatawag na Kambal), na isa rin sa labindalawang alagad ay hindi nila kasama noong nagpakita si Hesus.

²⁵Kaya ibinalita nila sa kanya na nakita nila ang Panginoon.

Ngunit sinabi niya sa kanila, “Hindi ako maniniwala hanggaʼt hindi ko nakikita ang mga sugat ng pagkakapako sa mga kamay niya at mahipo ang mga ito, pati na ang sugat sa kanyang tagiliran.”

²⁶Makalipas ang walong araw, nagtipon ulit ang mga alagad ni Hesus sa loob ng bahay. Kasama na nila si Tomas. Kahit nakakandado ang mga pinto, dumating si Hesus at tumayo sa gitna nila, at sinabi, “Sumainyo ang kapayapaan.”

²⁷Sinabi ni Hesus kay Tomas, “Tingnan mo ang mga kamay ko. Hipuin mo, pati na rin ang aking tagiliran. Huwag ka nang magduda; maniwala ka na.”

²⁸Sinabi ni Tomas sa kanya, “Panginoon ko at Diyos ko!”

²⁹Sinabi ni Hesus sa kanya, “Naniniwala ka na ba dahil nakita mo ako? Mapalad ang mga naniniwala kahit hindi nila ako nakita.”

Ang Layunin ng Aklat na Ito

³⁰Marami pang himalang ginawa si Hesus na nasaksihan ng mga alagad niya ang hindi naisulat sa aklat na ito.

³¹Ngunit ang nasa aklat na itoʼy isinulat upang sumampalataya kayo na si Hesus nga ang Mesias, ang Anak ng Diyos. At kung sasampalataya kayo sa kanya, magkakaroon kayo ng buhay.