Lucas 21

Ang Kaloob ng Biyuda

¹Pinagmamasdan ni Hesus ang mayayamang naghuhulog ng pera sa lalagyan ng mga kaloob sa Templo.

²Nakita rin niya ang isang mahirap na biyuda na naghulog ng dalawang pirasong barya.

³Sinabi ni Hesus, “Sinasabi ko sa inyo ang totoo, mas malaki ang ibinigay ng biyudang iyon kaysa sa kanilang lahat.

⁴Sapagkat silang lahat ay nagbigay mula sa sobra nilang pera, pero ang biyuda ay nagbigay sa kabila ng kanyang kahirapan. Ibinigay niya ang lahat ng ikabubuhay niya.”

Sinabi ni Hesus ang tungkol sa Pagkawasak ng Templo

⁵May ilan doon na nag-uusap tungkol sa mga mamahaling bato ng templo at mga palamuti nito na inihandog ng mga tao. Sinabi sa kanila ni Hesus,

⁶“Darating ang araw na ang lahat ng nakikita ninyong iyan ay magigiba at walang maiiwang bato na magkapatong.”

⁷Tinanong nila si Hesus, “Guro, kailan po mangyayari ang sinabi ninyo? At ano ang mga palatandaan kung malapit nang mangyari iyon?”

⁸Sumagot si Hesus, “Mag-ingat kayo at huwag palinlang. Sapagkat marami ang darating sa aking pangalan at sasabihin nilang sila ang Mesias, at sasabihin din nilang dumating na ang panahon. Huwag kayong maniniwala sa kanila.[#21:8 : Sa literal, na nagsasabi, “Ako iyon.”]

⁹At kung makabalita kayo ng mga digmaan at mga himagsikan, huwag kayong matakot. Kinakailangang mangyari ang mga ito, ngunit hindi pa kaagad darating ang katapusan.”

¹⁰Sinabi pa ni Hesus sa kanila, “Magdidigmaan ang mga bansa at mga kaharian.

¹¹Magkakaroon ng malalakas na lindol, taggutom at mga salot sa ibaʼt ibang lugar. At makakakita kayo ng mga nakakatakot at nakakamanghang palatandaan mula sa langit.

¹²“Ngunit bago mangyari ang lahat ng iyan ay uusigin muna kayo at dadakpin ng mga tao. Dadalhin nila kayo sa mga sinagoga at ipabibilanggo. Iimbestigahan kayo sa harap ng mga hari at mga gobernador dahil sa pagsunod ninyo sa akin.

¹³Magiging pagkakataon nʼyo ito upang magpatotoo sa kanila tungkol sa akin.

¹⁴Kaya itanim ninyo sa inyong isip na hindi kayo dapat mabalisa kung ano ang inyong isasagot.

¹⁵Sapagkat bibigyan ko kayo ng karunungan sa pagsagot para hindi makaimik ang inyong mga kalaban.

¹⁶Ibibigay kayo sa inyong mga kaaway ng sarili ninyong mga magulang, kapatid, kamag-anak at mga kaibigan, at ipapapatay nila ang ilan sa inyo.

¹⁷Kapopootan kayo ng lahat dahil sa pagsunod ninyo sa akin.

¹⁸Ngunit hindi kayo mapapahamak.[#21:18 Sa literal, Hindi malalagas kahit isang buhok ng inyong ulo.]

¹⁹At kung magpapakatatag kayo, magkakaroon kayo ng buhay.

²⁰“Kapag nakita ninyong napapaligiran na ng mga sundalo ang Jerusalem, malalaman ninyong malapit na itong mawasak.

²¹Kaya ang mga nasa Judea ay dapat nang tumakas papunta sa kabundukan, at ang mga nasa Jerusalem ay kailangang umalis agad. At ang mga nasa bukid naman ay huwag nang bumalik pa sa Jerusalem.

²²Sapagkat panahon na iyon ng pagpaparusa, upang matupad ang nakasaad sa Kasulatan.

²³Kaawa-awa ang mga buntis at ang mga nagpapasuso sa mga araw na iyon! Darating ang napakatinding paghihirap sa lupaing ito dahil sa matinding galit ng Diyos sa mga tao rito.

²⁴Ang iba sa kanilaʼy papatayin sa espada, at ang iba namaʼy dadalhing bihag sa ibang mga bansa. At ang Jerusalem ay sasakupin ng mga hindi Hudyo hanggang sa matapos ang panahong itinakda ng Diyos sa kanila.

²⁵“May mga palatandaang makikita sa araw, sa buwan, at sa mga bituin. Mababagabag ang mga bansa at hindi nila malalaman kung ano ang gagawin nila dahil sa malalakas na ugong ng mga alon sa dagat.

²⁶Hihimatayin sa takot ang mga tao dahil sa mga mangyayari sa mundo, dahil mayayanig ang mga kapangyarihan sa langit.

²⁷At makikita nila ang Anak ng Tao na dumarating mula sa ulap na taglay ang kapangyarihan at kaluwalhatian.[#21:27 : O kapangyarihang nagniningning.]

²⁸Kapag nagsimula nang mangyari ang mga bagay na ito, umasa kayo at maghintay dahil malapit na ang pagliligtas sa inyo.”[#21:28 : Sa literal, tumayo kayo at tumingala.]

²⁹Ikinuwento sa kanila ni Hesus ang paghahalintulad na ito: “Tingnan ninyo ang puno ng igos at ang iba pang punongkahoy.

³⁰Kapag nagkakadahon na ang mga ito alam ninyong malapit na ang tag-init.

³¹Ganoon din naman, kapag nakita ninyong nangyayari na ang mga sinasabi kong ito sa inyo, malalaman ninyong malapit na ang paghahari ng Diyos.

³²“Sinasabi ko sa inyo ang totoo, matutupad ang lahat ng ito bago mawala ang henerasyong ito.

³³Ang langit at ang lupa ay maglalaho, ngunit ang mga salita ko ay mananatili magpakailanman.[#21:33 : Ibig sabihin, tiyak na matutupad.]

³⁴“Kaya mag-ingat kayo na huwag mawili sa kalayawan, sa paglalasing, sa pagkaabala sa inyong kabuhayan, at baka biglang dumating ang araw na iyon

³⁵nang hindi ninyo inaasahan. Sapagkat darating ang araw na iyon sa lahat ng tao sa buong mundo.[#21:35 : Sa literal, na parang bitag.]

³⁶Kaya maging handa kayo sa lahat ng oras. Palagi kayong manalangin upang magkaroon kayo ng lakas na mapagtagumpayan ang lahat ng mangyayaring kahirapan, at makatayo kayo sa harap ng Anak ng Tao nang hindi napapahiya.”

³⁷Araw-araw, nagtuturo si Hesus sa templo. Pagsapit ng gabi, pumupunta siya sa Bundok ng mga Olibo para magpalipas ng gabi.

³⁸At maagang pumupunta ang mga tao sa templo upang makinig sa kanya.