The chat will start when you send the first message.
1Umalis si Hesus sa Ilog Jordan na puspos ng Banal na Espiritu, at dinala siya ng Espiritu sa ilang.
2Nanatili siya roon nang apatnapung araw, at sa mga araw na iyon, tinukso siya ng diyablo. Hindi siya kumain sa buong panahong iyon kaya gutom na gutom siya pagkatapos.
3Sinabi sa kanya ng diyablo, “Kung ikaw nga ang Anak ng Diyos, utusan mo ang batong ito na maging tinapay.”
4Ngunit sinagot siya ni Hesus, “Sinasabi sa Kasulatan, ‘Hindi lamang sa tinapay nabubuhay ang tao.’ ”[#4:4 Deu. 8:3.]
5Dinala siya ng diyablo sa isang napakataas na lugar, at sa isang iglap ay ipinakita sa kanya ang lahat ng kaharian ng mundo.
6At sinabi ng diyablo kay Hesus, “Ibibigay ko sa iyo ang karapatang mamuno sa lahat ng ito at ang kadakilaang kalakip nito, dahil ipinagkaloob sa akin ang mga iyan at maibibigay ko sa kahit kanino ko gusto.
7Kaya kung sasambahin mo ako, mapapasaiyo ang lahat ng iyan.”
8Ngunit sumagot si Hesus, “Sinasabi sa Kasulatan, ‘Sambahin mo ang Panginoon na iyong Diyos at siya lamang ang dapat mong paglingkuran.’ ”[#4:8 Deu. 6:13.]
9Pagkatapos, dinala siya ng diyablo sa Jerusalem, sa pinakamataas na bahagi ng Templo, at sinabi sa kanya, “Kung ikaw nga ang Anak ng Diyos, magpatihulog ka.
10Sapagkat sinasabi sa Kasulatan:
‘Uutusan ng Diyos ang kanyang mga anghel
na ingatan ka.
11Aalalayan ka nila
upang hindi tumama ang iyong mga paa sa bato.’ ”
12Ngunit sumagot si Hesus, “Sinasabi rin sa Kasulatan, ‘Huwag mong susubukin ang Panginoon na iyong Diyos.’ ”[#4:12 Deu. 6:16.]
13Matapos siyang tuksuhin ng diyablo sa lahat ng paraan, iniwan siya nito at naghintay ng ibang pagkakataon.
14Bumalik si Hesus sa Galilea na taglay ang kapangyarihan ng Espiritu. Kumalat sa lahat ng lugar doon ang balita tungkol sa kanya.
15Nagturo siya sa mga sinagoga, at pinuri siya ng lahat.
16Umuwi si Hesus sa Nazaret, sa bayang kinalakihan niya. At katulad ng nakaugalian niya, pumunta siya sa sinagoga sa Araw ng Pamamahinga. Tumayo siya upang bumasa ng Kasulatan.
17Ibinigay sa kanya ang aklat ni Propeta Isaias. Binuksan niya ito at binasa ang bahaging nagsasabing:
18“Ang Espiritu ng Panginoon ay sumasaakin,
dahil hinirang niya ako
para ipangaral ang Magandang Balita sa mga dukha.
Sinugo niya ako para ipahayag sa mga bihag na lalaya na sila,
at sa mga bulag na makakakita na sila.
Sinugo rin niya ako upang palayain ang mga inaapi,
19at ipahayag na dumating na ang panahon ng pagpapala ng Panginoon.”[#4:19 Isa. 61:1‑2. Ito ay hango sa saling Septuagint.]
20Pagkatapos, ibinilot ni Hesus ang Kasulatan at isinauli sa katiwala, at saka naupo. Nakatutok sa kanya ang mga mata ng lahat ng naroon.
21Sinimulan niyang mangaral sa kanila, “Sa araw na itoʼy natupad na ang Kasulatang inyong narinig.”
22Pinuri siya ng lahat at humanga sa mga kamangha-manghang salita na kanyang sinabi. Napatanong sila, “Hindi baʼt anak siya ni Jose?”
23Sinabi ni Hesus sa kanila, “Tiyak na babanggitin ninyo sa akin ang kawikaang ito: ‘Manggagamot, gamutin mo muna ang iyong sarili.’ Ang gusto ninyong sabihin ay, ‘Gawin mo rin dito sa sarili mong bayan ang mga nabalitaan naming ginawa mo sa Capernaum.’ ”
24Dagdag pa niya, “Sinasabi ko sa inyo ang totoo, walang propetang tinatanggap sa sarili niyang bayan.
25Alalahanin ninyo ang nangyari noong panahon ni Propeta Elias. Hindi umulan sa loob ng tatloʼt kalahating taon, at nagkaroon ng matinding taggutom sa buong lupain. Maraming biyuda sa Israel noon,
26pero hindi pinapunta ng Diyos si Elias sa kaninuman sa kanila. Sa halip, pinapunta siya sa isang biyudang hentil sa Sarepta na sakop ng Sidon.
27Ganyan din ang nangyari noong panahon ni Propeta Eliseo. Maraming tao sa Israel ang may malubhang sakit sa balat, ngunit wala ni isa man sa kanila ang gumaling. Sa halip, si Naaman pa na taga-Siria ang tanging pinagaling ni Eliseo.”[#4:27 : Sa ibang salin ng Bibliya, ketong. Ang Griyegong salita nito ay ginamit sa ibaʼt ibang klase ng sakit sa balat na itinuturing na marumi ayon sa Lev. 13.]
28Nang marinig nila ito, galit na galit ang lahat ng nasa sinagoga.
29Nagtayuan sila at ipinagtabuyan siya palabas ng bayan, at dinala malapit sa gilid ng burol, na kinatatayuan ng kanilang bayan, para ihulog siya sa bangin.
30Ngunit lumakad lang siya sa kalagitnaan nila at umalis.
31Mula sa Nazaret, pumunta si Hesus sa bayan ng Capernaum na sakop ng Galilea. Tuwing Araw ng Pamamahinga, nagtuturo siya sa sinagoga.
32Namangha ang mga tao sa mga aral niya dahil may awtoridad ang mga salita niya.
33May isang lalaki noon sa sinagoga na sinasaniban ng demonyo. Sumigaw ito nang malakas,
34“Ano ang pakay mo sa amin, Hesus na taga-Nazaret? Naparito ka ba para puksain kami? Kilala kita. Ikaw ang Banal na sugo ng Diyos!”
35Ngunit sinaway siya ni Hesus, “Tumahimik ka at lumabas sa kanya!” At sa harapan ng lahat, itinumba ng demonyo ang lalaki at saka umalis nang hindi niya ito sinasaktan.
36Namangha ang mga tao at sinabi nila sa isaʼt isa, “Pambihira ang mga salita niya – may kapangyarihan at kakayahang magpalayas ng masasamáng espiritu, at sumusunod sila!”
37Kaya kumalat ang balita tungkol kay Hesus sa bawat dako ng lupaing iyon.
38Umalis si Hesus sa sinagoga at pumunta sa bahay ni Simon. Mataas noon ang lagnat ng biyenang babae ni Simon, kaya nakiusap sila kay Hesus na pagalingin siya.
39Tumayo si Hesus sa tabi ng maysakit at inutusan ang lagnat na umalis, at nawala ito. Kaagad na bumangon ang babae at pinagsilbihan sina Hesus.
40Nang palubog na ang araw, dinala ng mga tao kay Hesus ang kanilang mga maysakit, anuman ang kanilang karamdaman. Ipinatong ni Hesus ang mga kamay niya sa bawat isa sa kanila at gumaling silang lahat.
41Lumabas din ang mga demonyo sa mga taong sinapian habang sumisigaw, “Ikaw ang Anak ng Diyos!” Ngunit sinaway sila ni Hesus at pinagbawalang magsalita, dahil alam nilang siya ang Mesias.
42Kinaumagahan, maagang umalis ng bayan si Hesus at pumunta sa isang lugar na walang katao-tao. Hinanap siya ng mga tao, at nang makita siya ay pinakiusapang huwag munang umalis sa bayan nila.
43Ngunit sinabi sa kanila ni Hesus, “Kailangan ko ring ipangaral sa iba pang mga bayan ang Magandang Balita tungkol sa kaharian ng Diyos, dahil ito ang dahilan kung bakit ako isinugo.”[#4:43 : Ang ibig sabihin ay “paghahari ng Diyos na nahayag noong dumating si Kristo at ganap na mararanasan sa pagbalik niya.”]
44Nagpatuloy siyang mangaral sa mga sinagoga sa Judea.