Salmo 63

Salmo 63

¹O Diyos, kayo ang aking Diyos.

Hinahanap-hanap ko kayo.

Nananabik ako sa inyo nang

buong pusoʼt kaluluwa,

tulad ng lupang tigang sa ulan.

²Nakita ko ang presensya ninyo

doon sa Templo,

nasaksihan ko roon ang inyong kapangyarihan

at kaluwalhatian.

³Akoʼy magpupuri sa inyo,

sapagkat ang inyong wagas na pag-ibig

ay mas mainam pa kaysa buhay.

⁴Pasasalamatan ko kayo

habang akoʼy nabubuhay.

Itataas ko ang aking mga kamay

sa paglapit sa inyo.

⁵Masisiyahan ako tulad ng taong nabusog

sa malinamnam na handaan.

At magpupuri ako sa inyo ng awit ng kagalakan.

⁶Sa aking paghimlay, kayo ang naaalala ko.

Sa buong magdamag, kayo ang iniisip ko.

⁷Dahil kayo ang tumutulong sa akin, aawit ako,[#63:7 : Tingnan ang talababa sa talata 5|PSA 63:5.]

habang akoʼy nasa inyong kalinga.

⁸Lumapit ako sa inyo at inalalayan nʼyo ako

ng inyong kanang kamay

upang hindi ako mapahamak.

⁹Ngunit silang nagtatangka sa aking buhay

ay mapupunta sa lugar ng mga patay.

¹⁰Mamamatay sila sa labanan

at ang kanilang mga bangkay

ay kakainin ng mga asong-gubat.

¹¹Matutuwa ang hari sa ginawa ng Diyos sa kanya.

Matutuwa rin ang mga nangako sa Diyos.

Ngunit ang lahat ng sinungaling

ay patatahimikin ng Diyos!